সূক্ত 2

2.1

শত্রুসেনাসংমোহনম্। ১-৬ অথর্বা। সেনামোহনম্, ১-২ অগ্নিঃ, ৩-৪ ইন্দ্রঃ, ৫ দ্যৌঃ, ৬ মরুতঃ। ত্রিষ্টুপ্, ২-৪ অনুষ্টুপ্।

অগ্নির্নো দূতঃ প্রত্যেতু বিদ্বান্ প্রতিদহন্নভিশস্তিমরাতিম্।
স চিত্তানি মোহয়তু পরেষাং নির্হস্তাংশ্চ কৃণবজ্জাতবেদাঃ ॥১॥

2.2

অয়মগ্নিরমূমুহদ্ যানি চিত্তানি বো হৃদি।
বি বো ধমত্বোকসঃ প্র বো ধমতু সর্বতঃ ॥২॥

2.3

ইন্দ্র চিত্তানি মোহয়ন্নর্বাঙাকূত্যা চর ।
অগ্নের্বাতস্য ধ্রাজ্যা তান্ বিষূচো বি নাশয় ॥৩॥

2.4

ব্যাঽকূতয় এষামিতাথো চিত্তানি মুহ্যত ।
অথো যদদ্যৈষাং হৃদি তদেষাং পরি নির্জহি ॥৪॥

2.5

অমীষাং চিত্তানি প্রতিমোহয়ন্তী গৃহাণাঙ্গান্যপ্বে পরেহি ।
অভি প্রেহি নির্দহ হৃত্সু শোকৈর্গ্রাহ্যামিত্রাংস্তমসা বিধ্য শত্রূন্ ॥৫॥

2.6

অসৌ যা সেনা মরুতঃ পরেষামস্মানৈত্যভ্যোজসা স্পর্ধমানা ।
তাং বিধ্যত তমসাপব্রতেন যথৈষামন্যো অন্যং ন জানাৎ ॥৬॥