সূক্ত 1

1.1

শত্রুসেনাসংমোহনম্। ১-৬ অথর্বা। সেনামোহনম্, ১ অগ্নিঃ, ২ মরুতঃ, ৩-৬ ইন্দ্রঃ। ত্রিষ্টুপ্, ২ বিরাড্গর্ভা ভুরিক্, ৩-৬ অনুষ্টুপ্, ৫ বিরাট্ পুরউষ্ণিক্।

অগ্নির্নঃ শত্রূন্ প্রত্যেতু বিদ্বান্ প্রতিদহন্নভিশস্তিমরাতিম্।
স সেনাং মোহয়তু পরেষাং নির্হস্তাংশ্চ কৃণবজ্জাতবেদাঃ ॥১॥

1.2

যূয়মুগ্রা মরুত ঈদৃশে স্থাভি প্রেত মৃণত সহধ্বম্।
অমীমৃণন্ বসবো নাথিতা ইমে অগ্নির্হ্যেঽষাং দূতঃ প্রত্যেতু বিদ্বান্ ॥২॥

1.3

অমিত্রসেনাং মঘবন্নস্মান্ ছত্রূয়তীমভি।
যুবং তানিন্দ্র বৃত্রহন্নগ্নিশ্চ দহতং প্রতি ॥৩॥

1.4

প্রসূত ইন্দ্র প্রবতা হরিভ্যাং প্র তে বজ্রঃ প্রমৃণন্নেতু শত্রূন্।
জহি প্রতীচো অনূচঃ পরাচো বিষ্বক্ সত্যং কৃণুহি চিত্তমেষাম্ ॥৪॥

1.5

ইন্দ্র সেনাং মোহয়ামিত্রাণাম্।
অগ্নের্বাতস্য ধ্রাজ্যা তান্ বিষূচো বি নাশয় ॥৫॥

1.6

ইন্দ্রঃ সেনাং মোহয়তু মরুতো ঘ্নন্ত্বোজসা ।
চক্ষূংস্যগ্নিরা দত্তাং পুনরেতু পরাজিতা ॥৬॥