Sukta 2

2.1

Shatrusenasammohanam, 1-6 atharva, senamohanam, 1-2 agnih, 3-4 indrah, 5 dyauh, 6 marutah, trishtup, 2-4 anushtup

अ॒ग्निर्नो॑ दू॒तः प्र॒त्येतु॑ वि॒द्वान् प्र॑ति॒दह॑न्न॒भिश॑स्ति॒मरा॑तिम्।
स चि॒त्तानि॑ मोहयतु॒ परे॑षां॒ निर्ह॑स्तांश्च कृणवज्जा॒तवे॑दाः ॥१॥

Agnirno dutah pratyetu vidvan pratidahannabhishastimaratim
Sa chittani mohayatu paresham nirhastanshcha krinavajjatavedah

2.2

अ॒यम॒ग्निर॑मूमुह॒द् यानि॑ चि॒त्तानि॑ वो हृ॒दि।
वि वो॑ धम॒त्वोक॑सः॒ प्र वो॑ धमतु स॒र्वतः॑ ॥२॥

Ayamagniramumuhad yani chittani vo hridi
Vi vo dhamatvokasah pra vo dhamatu sarvatah

2.3

इन्द्र॑ चि॒त्तानि॑ मो॒हय॑न्न॒र्वाङाकू॑त्या चर ।
अ॒ग्नेर्वात॑स्य॒ ध्राज्या॒ तान् विषू॑चो॒ वि ना॑शय ॥३॥

Indra chittani mohayannarvangakutya chara
Agnervatasya dhrajya tan vishucho vi nashaya

2.4

व्याऽकूतय एषामि॒ताथो॑ चि॒त्तानि॑ मुह्यत ।
अथो॒ यद॒द्यैषां॑ हृदि तदे॑षां॒ परि॒ निर्ज॑हि ॥४॥

Vyakutaya eshamitatho chittani muhyata
Atho yadadyaisham hridi tadesham pari nirjahi

2.5

अ॒मीषां॑ चि॒त्तानि॑ प्रतिमो॒हय॑न्ती गृहा॒णाङ्गा॑न्यप्वे॒ परे॑हि ।
अ॒भि प्रेहि॒ निर्द॑ह हृ॒त्सु शोकै॒र्ग्राह्या॒मित्रां॒स्तम॑सा विध्य॒ शत्रू॑न् ॥५॥

Amisham chittani pratimohayanti grihananganyapve parehi
Abhi prehi nirdaha hritsu shokairgrahyamitranstamasa vidhya shatrun

2.6

अ॒सौ या सेना॑ मरुतः॒ परे॑षाम॒स्मा॑नैत्य॒भ्योज॑सा॒ स्पर्ध॑माना ।
तां वि॑ध्यत॒ तम॒साप॑व्रतेन॒ यथै॑षाम॒न्यो अ॒न्यं न जा॒नात् ॥६॥

Asau ya sena marutah pareshamasmanaityabhyojasa spardhamana
Tam vidhyata tamasapavratena yathaishamanyo anyam na janat