সূক্ত 17

17.1

(১-১২) ১-১১ কৃষ্ণঃ, ১২ বসিষ্ঠঃ। ইন্দ্রঃ। ১-১০ জগতী, ১১-১২ ত্রিষ্টুপ্।

অচ্ছা ম ইন্দ্রং মতয়ঃ স্বর্বিদঃ সধ্রীচীর্বিশ্বা উশতীরনূষত ।
পরি ষ্বজন্তে জনয়ো যথা পতিং মর্যং ন শুন্ধ্যুং মঘবানমূতয়ে ॥১॥

ন ঘা ত্বদ্রিগপ বেতি মে মনস্ত্বে ইৎ কামং পুরুহূত শিশ্রয় ।
রাজেব দস্ম নি ষদোঽধি বর্হিষ্যস্মিন্ত্সু সোমেবপানমস্তু তে ॥২॥

বিষূবৃদিন্দ্রো অমুতেরুত ক্ষুধঃ স ইদ্ রায়ো মঘবা বস্ব ঈশতে ।
তস্যেদিমে প্রবণে সপ্ত সিন্ধবো বয়ো বর্ধন্তি বৃষভস্য শুষ্মিণঃ ॥৩॥

বয়ো ন বৃক্ষং সুপলাশমাসদন্ত্সোমাস ইন্দ্রং মন্দিনশ্চমূষদঃ ।
প্রৈষামনীকং শবসা দবিদ্যুতদ্ বিদৎ স্ব১র্মনবে জ্যোতিরার্যম্ ॥৪॥

কৃতং ন শ্বঘ্নী বি চিনোতি দেবনে সংবর্গং যন্মঘবা সূর্যং জয়ৎ।
ন তৎ তে অন্যো অনু বীর্যং শকন্ন পুরাণো মঘবন্ নোত নূতনঃ ॥৫॥

বিশংবিশং মঘবা পর্যশায়ত জনানাং ধেনা অবচাকশদ্ বৃষা ।
যস্যাহ শক্রঃ সবনেষু রণ্যতি স তীব্রৈঃ সোমৈঃ সহতে পৃতন্যতঃ ॥৬॥

আপো ন সিন্ধুমভি যৎ সমক্ষরন্ত্সোমাস ইন্দ্রং কুল্যা ইব হ্রদম্।
বর্ধন্তি বিপ্রা মহো অস্য সাদনে যবং ন বৃষ্টির্দিব্যেন দানুনা ॥৭॥

বৃষা ন ক্রুদ্ধঃ পতয়দ্ রজঃস্বা যো অর্যপত্নীরকৃণোদিমা অপঃ ।
স সুন্বতে মঘবা জীরদানবেঽবিন্দজ্জ্যোতির্মনবে হবিষ্মতে ॥৮॥

উজ্জায়তাং পরশুজ্যোতিষা সহ ভূয়া ঋতস্য সুদুঘা পুরাণবৎ।
বি রোচতামরুষো ভানুনা শুচিঃ স্ব১র্ণ শুক্রং শুশুচীত সত্পতিঃ ॥৯॥

গোভিষ্টরেমামতিং দুরেবাং যবেন ক্ষুধং পুরুহূত বিশ্বাম্।
বয়ং রাজভিঃ প্রথমা ধনান্যস্মাকেন বৃজনেনা জয়েম ॥১০॥

বৃহস্পতির্নঃ পরি পাতু পশ্চাদুতোত্তরস্মাদধরাদঘায়োঃ ।
ইন্দ্রঃ পুরস্তাদুত মধ্যতো নঃ সখা সখিভ্যো বরিবঃ কৃণোতু ॥১১॥

বৃহস্পতে যুবমিন্দ্রশ্চ বস্বো দিব্যস্যেশাথে উত পার্থিবস্য ।
ধত্তং রয়িং স্তুবতে কীরয়ে চিদ্ যূয়ং পাত স্বস্তিভিঃ সদা নঃ ॥১২॥