Sukta 17

17.1

(1-12) 1-11 krishnah, 12 vasishthah, indrah, 1-10 jagati, 11-12 trishtup

अच्छा॑ म॒ इन्द्रं॑ म॒तयः॑ स्व॒र्विदः॑ स॒ध्रीची॒र्विश्वा॑ उश॒तीर॑नूषत ।
परि॑ ष्वजन्ते॒ जन॑यो॒ यथा॒ पतिं॒ मर्यं॒ न शु॒न्ध्युं म॒घवा॑नमू॒तये॑ ॥१॥

Achchha ma indram matayah svarvidah sadhrichirvishva ushatiranushata
Pari shvajante janayo yatha patim maryam na shundhyum maghavanamutaye

17.2

न घा॑ त्व॒द्रिगप॑ वेति मे॒ मन॒स्त्वे इत् कामं॑ पुरुहूत शिश्रय ।
राजे॑व दस्म॒ नि ष॒दोऽधि॑ ब॒र्हिष्य॒स्मिन्त्सु सोमे॑व॒पान॑मस्तु ते ॥२॥

Na gha tvadrigapa veti me manastve it kamam puruhuta shishraya
Rajeva dasma ni shadodhi barhishyasmintsu somevapanamastu te

17.3

वि॒षू॒वृदिन्द्रो॒ अमु॑तेरु॒त क्षु॒धः स इद् रा॒यो म॒घवा॒ वस्व॑ ईशते ।
तस्येदि॒मे प्र॑व॒णे स॒प्त सिन्ध॑वो॒ वयो॑ वर्धन्ति वृष॒भस्य॑ शु॒ष्मिणः॑ ॥३॥

Vishuvridindro amuteruta kshudhah sa id rayo maghava vasva ishate
Tasyedime pravane sapta sindhavo vayo vardhanti vrishabhasya shushminah

17.4

वयो॒ न वृ॒क्षं सु॑पला॒शमास॑द॒न्त्सोमा॑स॒ इन्द्रं॑ म॒न्दिन॑श्चमू॒षदः॑ ।
प्रैषा॒मनी॑कं॒ शव॑सा॒ दवि॑द्युतद् वि॒दत् स्व॑१र्मन॑वे॒ ज्योति॒रार्य॑म् ॥४॥

Vayo na vriksham supalashamasadantsomasa indram mandinashchamushadah
Praishamanikam shavasa davidyutad vidat sva1rmanave jyotiraryam

17.5

कृ॒तं न श्व॒घ्नी वि चि॑नोति॒ देव॑ने सं॒वर्गं॒ यन्म॒घवा॒ सूर्यं॒ जय॑त्।
न तत् ते॑ अ॒न्यो अनु॑ वी॒र्यं शक॒न्न पु॑रा॒णो म॑घव॒न् नोत नूत॑नः ॥५॥

Kritam na shvaghni vi chinoti devane sanvargam yanmaghava suryam jayat
Na tat te anyo anu viryam shakanna purano maghavan nota nutanah

17.6

विशं॑विशं म॒घवा॒ पर्य॑शायत॒ जना॑नां॒ धेना॑ अव॒चाक॑श॒द् वृषा॑ ।
यस्याह॑ श॒क्रः सव॑नेषु॒ रण्य॑ति॒ स ती॒व्रैः सोमैः॑ सहते पृतन्य॒तः ॥६॥

Vishanvisham maghava paryashayata jananam dhena avachakashad vrisha
Yasyaha shakrah savaneshu ranyati sa tivraih somaih sahate pritanyatah

17.7

आपो॒ न सिन्धु॑म॒भि यत् स॒मक्ष॑र॒न्त्सोमा॑स॒ इन्द्रं॑ कु॒ल्या इ॑व ह्र॒दम्।
वर्ध॑न्ति॒ विप्रा॒ महो॑ अस्य॒ साद॑ने॒ यवं॒ न वृ॒ष्टिर्दि॒व्येन॒ दानु॑ना ॥७॥

Apo na sindhumabhi yat samaksharantsomasa indram kulya iva hradam
Vardhanti vipra maho asya sadane yavam na vrishtirdivyena danuna

17.8

वृषा॒ न क्रु॒द्धः प॑तय॒द् रजः॒स्वा यो अ॒र्यप॑त्नी॒रकृ॑णोदि॒मा अ॒पः ।
स सु॑न्व॒ते म॒घवा॑ जी॒रदा॑न॒वेऽवि॑न्द॒ज्ज्योति॒र्मन॑वे ह॒विष्म॑ते ॥८॥

Vrisha na kruddhah patayad rajahsva yo aryapatnirakrinodima apah
Sa sunvate maghava jiradanavevindajjyotirmanave havishmate

17.9

उज्जा॑यतां पर॒शुज्योति॑षा स॒ह भू॒या ऋ॒तस्य॑ सु॒दुघा॑ पुराण॒वत्।
वि रो॑चतामरु॒षो भा॒नुना॒ शुचिः॒ स्व॑१र्ण शु॒क्रं शु॑शुचीत॒ सत्प॑तिः ॥९॥

Ujjayatam parashujyotisha saha bhuya ritasya sudugha puranavat
Vi rochatamarusho bhanuna shuchih sva1rna shukram shushuchita satpatih

17.10

गोभि॑ष्टरे॒माम॑तिं दु॒रेवां॒ यवे॑न॒ क्षुधं॑ पुरुहूत॒ विश्वा॑म्।
व॒यं राज॑भिः प्रथ॒मा धना॑न्य॒स्माके॑न वृ॒जने॑ना जयेम ॥१०॥

Gobhishtaremamatim durevam yavena kshudham puruhuta vishvam
Vayam rajabhih prathama dhananyasmakena vrijanena jayema

17.11

बृह॒स्पति॑र्नः॒ परि॑ पातु प॒श्चादु॒तोत्त॑रस्मा॒दध॑रादघा॒योः ।
इन्द्रः॑ पु॒रस्ता॑दु॒त म॑ध्य॒तो नः॒ सखा॒ सखि॑भ्यो॒ वरि॑वः कृणोतु ॥११॥

Brihaspatirnah pari patu pashchadutottarasmadadharadaghayoh
Indrah purastaduta madhyato nah sakha sakhibhyo varivah krinotu

17.12

बृह॑स्पते यु॒वमिन्द्र॑श्च॒ वस्वो॑ दि॒व्यस्ये॑शाथे उ॒त पार्थि॑वस्य ।
ध॒त्तं र॒यिं स्तु॑व॒ते की॒रये॑ चिद् यू॒यं पा॑त स्व॒स्तिभिः॒ सदा॑ नः ॥१२॥

Brihaspate yuvamindrashcha vasvo divyasyeshathe uta parthivasya
Dhattam rayim stuvate kiraye chid yuyam pata svastibhih sada nah