Sukta 16

16.1

1-12 ayasyah, brihaspatih, trishtup

उ॒द॒प्रुतो॒ न वयो॒ रक्ष॑माणा॒ वाव॑दतो अ॒भ्रिय॑स्येव॒ घोषाः॑ ।
गि॒रि॒भ्रजो॒ नोर्मयो॒ मद॑न्तो॒ बृह॒स्पति॑म॒भ्य॑१र्का अ॑नावन् ॥१॥

Udapruto na vayo rakshamana vavadato abhriyasyeva ghoshah
Giribhrajo normayo madanto brihaspatimabhya1rka anavan

सं गोभि॑रङ्गिर॒सो नक्ष॑माणो॒ भग॑ इ॒वेद॑र्य॒मणं॑ निनाय ।
जने॑ मि॒त्रो न दम्प॑ती अनक्ति॒ बृह॑स्पते वा॒जया॒शूंरि॑वा॒जौ ॥२॥

Sam gobhirangiraso nakshamano bhaga ivedaryamanam ninaya
Jane mitro na dampati anakti brihaspate vajayashunrivajau

सा॒ध्व॒र्या अ॑ति॒थिनी॑रिषि॒रा स्पा॒र्हाः सु॒वर्णा॑ अनव॒द्यरू॑पाः ।
बृह॒स्पतिः॒ पर्व॑तेभ्यो वि॒तूर्या॒ निर्गा ऊ॑पे॒ यव॑मिव स्थि॒विभ्यः॑ ॥३॥

Sadhvarya atithinirishira sparhah suvarna anavadyarupah
Brihaspatih parvatebhyo viturya nirga upe yavamiva sthivibhyah

आ॒प्रु॒षा॒यन् मधु॑न ऋ॒तस्य॒ योनि॑मवक्षि॒पन्न॒र्क उ॒ल्कामि॑व॒ द्योः ।
बृह॒स्पति॑रु॒द्धर॒न्नश्म॑नो॒ गा भूम्या॑ उ॒द्नेव॒ वि त्वचं॑ बिभेद ॥४॥

Aprushayan madhuna ritasya yonimavakshipannarka ulkamiva dyoh
Brihaspatiruddharannashmano ga bhumya udneva vi tvacham bibheda

अप॒ ज्योति॑षा॒ तमो॑ अ॒न्तरि॑क्षादु॒द्नः शीपा॑लमिव॒ वात॑ आजत्।
बृह॒स्पति॑रनु॒मृश्या॑ व॒लस्या॒भ्रमि॑व॒ वात॒ आ च॑क्र॒ आ गाः ॥५॥

Apa jyotisha tamo antarikshadudnah shipalamiva vata ajat
Brihaspatiranumrishya valasyabhramiva vata a chakra a gah

य॒दा व॒लस्य॒ पीय॑तो॒ जसुं॒ भेद् बृह॒स्पति॑रग्नि॒तपो॑भिर॒र्कैः ।
द॒द्भिर्न जि॒ह्वा परि॑विष्ट॒माद॑दा॒विर्नि॒धींर॑कृणोदु॒स्रिया॑णाम् ॥६॥

Yada valasya piyato jasum bhed brihaspatiragnitapobhirarkaih
Dadbhirna jihva parivishtamadadavirnidhinrakrinodusriyanam

बृह॒स्पति॒रम॑त॒ हि त्यदा॑सां॒ नाम॑ स्व॒रीणां॒ सद॑ने॒ गुहा॒ यत्।
आ॒ण्डेव॑ भि॒त्वा श॑कु॒नस्य॒ गर्भ॒मुदु॒स्रियाः॒ पर्व॑तस्य॒ त्मना॑जत् ॥७॥

Brihaspatiramata hi tyadasam nama svarinam sadane guha yat
Andeva bhitva shakunasya garbhamudusriyah parvatasya tmanajat

अश्नापि॑नद्धं॒ मधु॒ पर्य॑पश्य॒न्मत्स्यं॒ न दी॒न उ॒दनि॑ क्षि॒यन्त॑म्।
निष्टज्ज॑भार चम॒सं न वृ॒क्षाद् बृह॒स्पति॑र्विर॒वेणा॑ वि॒कृत्य॑ ॥८॥

Ashnapinaddham madhu paryapashyanmatsyam na dina udani kshiyantam
Nishtajjabhara chamasam na vrikshad brihaspatirviravena vikritya

सोषाम॑विन्द॒त् स स्वः॑१ सो अ॒ग्निं सो अ॒र्केण॒ वि ब॑बाधे॒ तमां॑सि ।
बृह॒स्पति॒र्गोव॑पुषो व॒लस्य॒ निर्म॒ज्जानं॒ न पर्व॑णो जभार ॥९॥

Soshamavindat sa svah1 so agnim so arkena vi babadhe tamansi
Brihaspatirgovapusho valasya nirmajjanam na parvano jabhara

हि॒मेव॑ प॒र्णा मु॑षि॒ता वना॑नि॒ बृह॒स्पति॑नाकृपयद् व॒लो गाः ।
अ॒ना॒नु॒कृ॒त्यम॑पु॒नश्च॑कार॒ यात् सूर्या॒मासा॑ मि॒थ उ॒च्चरा॑तः ॥१०॥

Himeva parna mushita vanani brihaspatinakripayad valo gah
Ananukrityamapunashchakara yat suryamasa mitha uchcharatah

अ॒भि श्या॒वं न कृश॑नेभि॒रश्वं॒ नक्ष॑त्रेभिः पि॒तरो॒ द्याम॑पिंशन्।
रात्र्यां॒ तमो॒ अद॑धु॒र्ज्योति॒रह॒न् बृह॒स्पति॑र्भि॒नदद्रिं॑ वि॒दद् गाः ॥११॥

Abhi shyavam na krishanebhirashvam nakshatrebhih pitaro dyamapinshan
Ratryam tamo adadhurjyotirahan brihaspatirbhinadadrim vidad gah

इ॒दम॑कर्म॒ नमो॑ अभ्रि॒याय॒ यः पू॒र्वीरन्वा॒नोन॑वीति ।
बृह॒स्पतिः॒ स हि गोभिः॒ सो अश्वैः॒ स वी॒रेभिः॒ स नृभि॑र्नो॒ वयो॑ धात् ॥१२॥

Idamakarma namo abhriyaya yah purviranvanonaviti
Brihaspatih sa hi gobhih so ashvaih sa virebhih sa nribhirno vayo dhat