সূক্ত 9

9.1

শান্তিঃ। ১-১৪ বসিষ্ঠঃ (শন্তাতিঃ) শান্তিঃ, বহুদৈবন্যম্। অনুষ্টুপ্, শান্তিঃ, বহুদৈবন্যম্। অনুষ্টুপ্, বিরাডুরোবৃহতী, পঞ্চপদা পথ্যাপঙ্ক্তিঃ, ৯ পঞ্চপদা ককুম্মতী, ১২ ত্র্যবসানা সপ্তপদাঽষ্টিঃ, ১৪ চতুষ্পদা সংকৃতিঃ।

শান্তা দ্যৌঃ শান্তা পৃথিবী শান্তমিদমুর্ব১ন্তরিক্ষম্।
শান্তা উদন্বতীরাপঃ শান্তা নঃ সন্ত্বোষধীঃ ॥১॥

9.2

শান্তানি পূর্বরূপাণি শান্তং নো অস্তু কৃতাকৃতম্।
শান্তং ভূতং চ ভব্যং চ সর্বমেব শমস্তু নঃ ॥২॥

9.3

ইয়ং যা পরমেষ্ঠিনী বাগ্ দেবী ব্রহ্মসংশিতা ।
যয়ৈব সসৃজে ঘোরং তয়ৈব শান্তিরস্তু নঃ ॥৩॥

9.4

ইদং যৎ পরমেষ্ঠিনং মনো বাং ব্রহ্মসংশিতম্।
যেনৈব সসৃজে ঘোরং তেনৈব শান্তিরস্তু নঃ ॥৪॥

9.5

ইমানি যানি পঞ্চেন্দ্রিয়াণি মনঃষষ্ঠানি মে হৃদি ব্রহ্মণা সংশিতানি ।
যৈরেব সসৃজে ঘোরং তৈরেব শান্তিরস্তু নঃ ॥৫॥

9.6

শং নো মিত্রঃ শং বরুণঃ শং বিষ্ণুঃ শং প্রজাপতিঃ ।
শং ন ইন্দ্রো বৃহস্পতিঃ শং নো ভবত্বর্যমা ॥৬॥

9.7

শং নো মিত্রঃ শং বরুণঃ শং বিবস্বাংছমন্তকঃ ।
উত্পাতাঃ পার্থিবান্তরিক্ষাঃ শং নো দিবিচরা গ্রহাঃ ॥৭॥

9.8

শং নো ভূমির্বেপ্যমানা শমুল্কা নির্হতং চ যৎ।
শং গাবো লোহিতক্ষীরাঃ শং ভূমিরব তীর্যতীঃ ॥৮॥

9.9

নক্ষত্রমুল্কাভিহতং শমস্তু নঃ শং নোঽভিচারাঃ শমু সন্তু কৃত্যাঃ ।
শং নো নিখাতা বল্গাঃ শমুল্কা দেশোপসর্গাঃ শমু নো ভবন্তু ॥৯॥

9.10

শং নো গ্রহাশ্চান্দ্রমসাঃ শমাদিত্যশ্চ রাহুণা।
শং নো মৃত্যুর্ধূমকেতুঃ শং রুদ্রাস্তিগ্মতেজসঃ ॥১০॥

9.11

শং রুদ্রাঃ শং বসবঃ শমাদিত্যাঃ শমগ্নয়ঃ ।
শং নো মহর্ষয়ো দেবাঃ শং দেবাঃ শং বৃহস্পতিঃ ॥১১॥

9.12

ব্রহ্ম প্রজাপতির্ধাতা লোকা বেদাঃ সপ্তঋষয়োঽগ্নয়ঃ ।
তৈর্মে কৃতং স্বস্ত্যয়নমিন্দ্রো মে শর্ম যচ্ছতু ব্রহ্মা মে শর্ম যচ্ছতু ।
বিশ্বে মে দেবাঃ শর্ম যচ্ছন্তু সর্বে মে দেবাঃ শর্ম যচ্ছন্তু ॥১২॥

9.13

যানি কানি চিচ্ছান্তানি লোকে সপ্তঋষয়ো বিদুঃ ।
সর্বাণি শং ভবন্তু মে শং মে অস্ত্বভয়ং মে অস্তু ॥১৩॥

9.14

পৃথিবী শান্তিরন্তরিক্ষং শান্তির্দ্যৌঃ শান্তিরাপঃ শান্তিরোষধয়ঃ শান্তির্বনস্পতয়ঃ শান্তির্বিশ্বে মে দেবাঃ শান্তিঃ সর্বে মে দেবাঃ শান্তিঃ শান্তিঃ শান্তিঃ শান্তিভিঃ ।
তাভিঃ শান্তিভিঃ সর্ব শান্তিভিঃ শময়ামোঽহং যদিহ ঘোরং যদিহ ক্রূরং যদিহ পাপং তচ্ছান্তং তচ্ছিবং সর্বমেব শমস্তু নঃ ॥১৪॥