সূক্ত 53

53.1

কালঃ। ১-১০ ভৃগুঃ। কালঃ। অনুষ্টুপ্, ১-৪ ত্রিষ্টুপ্, ৫ নিচৃৎ পুরস্তাদ্বৃহতী।

কালো অশ্বো বহতি সপ্তরশ্মিঃ সহস্রাক্ষো অজরো ভূরিরেতাঃ ।
তমা রোহন্তি কবয়ো বিপশ্চিতস্তস্য চক্রা ভুবনানি বিশ্বা ॥১॥

53.2

সপ্ত চক্রান্ বহতি কাল এষ সপ্তাস্য নাভীরমৃতং ন্বক্ষঃ ।
স ইমা বিশ্বা ভুবনান্যঞ্জৎ কালঃ স ঈয়তে প্রথমো নু দেবঃ ॥২॥

53.3

পূর্ণঃ কুম্ভোঽধি কাল আহিতস্তং বৈ পশ্যামো বহুধা নু সন্তঃ।
স ইমা বিশ্বা ভুবনানি প্রত্যঙ্কালং তমাহুঃ পরমে ব্যোমন্ ॥৩॥

53.4

স এব সং ভুবনান্যাভরৎ স এব সং ভুবনানি পর্যৈৎ।
পিতা সন্নভবৎ পুত্র এষাং তস্মাদ্ বৈ নান্যৎ পরমস্তি তেজঃ ॥৪॥

53.5

কালোঽমূং দিবমজনয়ৎ কাল ইমাঃ পৃথিবীরুত।
কালে হ ভূতং ভব্যং চেষিতং হ বি তিষ্ঠতে ॥৫॥

53.6

কালো ভূতিমসৃজত কালে তপতি সূর্যঃ ।
কালে হ বিশ্বা ভূতানি কালে চক্ষুর্বি পশ্যতি ॥৬॥

53.7

কালে মনঃ কালে প্রাণঃ কালে নাম সমাহিতম্।
কালেন সর্বা নন্দন্ত্যাগতেন প্রজা ইমাঃ ॥৭॥

53.8

কালে তপঃ কালে জ্যেষ্ঠং কালে ব্রহ্ম সমাহিতম্।
কালো হ সর্বস্যেশ্বরো যঃ পিতাসীৎ প্রজাপতেঃ ॥৮॥

53.9

তেনেষিতং তেন জাতং তদু তস্মিন্ প্রতিষ্ঠিতম্।
কালো হ ব্রহ্ম ভূত্বা বিভর্তি পরমেষ্ঠিনম্ ॥৯॥

53.10

কালঃ প্রজা অসৃজত কালো অগ্রে প্রজাপতিম্।
স্বয়ংভূঃ কশ্যপঃ কালাৎ তপঃ কালাদজায়ত ॥১০॥