সূক্ত 32

32.1

দর্ভঃ। ১-১০ ভৃগুঃ (আয়ুষ্কামঃ)। দর্ভঃ। অনুষ্টুপ্, ৮ পুরস্তাদ্বৃহতী, ৯ ত্রিষ্টুপ্, ১০ জগতী।

শতকাণ্ডো দুশ্চ্যবনঃ সহস্রপর্ণ উত্তিরঃ ।
দর্ভো য উগ্র ওষধিস্তং তে বধ্নাম্যায়ুষে ॥১॥

32.2

নাস্য কেশান্ প্র বপন্তি নোরসি তাডমা ঘ্নতে ।
যস্মা অছিন্নপর্ণেন দর্ভেণ শর্ম যচ্ছতি ॥২॥

32.3

দিবি তে তূলমোষধে পৃথিব্যামসি নিষ্ঠিতঃ ।
ত্বয়া সহস্রকাণ্ডেনায়ুঃ প্র বর্ধয়ামহে ॥৩॥

32.4

তিস্রো দিবো অত্যতৃণৎ তিস্র ইমাঃ পৃথিবীরুত।
ত্বয়াহং দুর্হার্দো জিহ্বাং নি তৃণদ্মি বচাংসি ॥৪॥

32.5

ত্বমসি সহমানোঽহমস্মি সহস্বান্।
উভৌ সহস্বন্তৌ ভূত্বা সপত্নান্সহিষীবহি ॥৫॥

32.6

সহস্ব নো অভিমাতিং সহস্ব পৃতনায়তঃ ।
সহস্ব সর্বান্ দুর্হার্দঃ সুহার্দো মে বহূন্ কৃধি ॥৬॥

32.7

দর্ভেণ দেবজাতেন দিবি ষ্টম্ভেন শশ্বদিৎ।
তেনাহং শশ্বতো জনাঁ অসনং সনবানি চ ॥৭॥

32.8

প্রিয়ং মা দর্ভ কৃণু ব্রহ্মরাজন্যাঽভ্যাং শূদ্রায় চার্যায় চ ।
যস্মৈ চ কাময়ামহে সর্বস্মৈ চ বিপশ্যতে ॥৮॥

32.9

যো জায়মানঃ পৃথিবীমদৃংহদ্ যো অস্তভ্নাদন্তরিক্ষং দিবং চ ।
যং বিভ্রতং ননু পাপ্মা বিবেদ স নোঽয়ং দর্ভো বরুণো দিবা কঃ ॥৯॥

32.10

সপত্নহা শতকাণ্ডঃ সহস্বানোষধীনাং প্রথমঃ সং বভূব ।
স নোঽয়ং দর্ভঃ পরি পাতু বিশ্বতস্তেন সাক্ষীয় পৃতনাঃ পৃতন্যতঃ ॥১০॥