সূক্ত 2

2.1

অধ্যাত্মম্। ১-৪৬ ব্রহ্ম। অধ্যাত্মং, রোহিতাদিত্যদৈবত্যম্। ত্রিষ্টুপ্; ১, ১২-১৫, ৩৯-৪১ অনুষ্টুপ্; ২-৩,৮,৪৩ জগতী; ১০ আস্তারপঙ্ক্তিঃ; ১১ বৃহতীগর্ভা; ১৬-২৪ আর্ষী গায়ত্রী; ২৫ ককুম্মত্যাস্তারপঙ্ক্তিঃ; ২৬পুরোদ্ব্যতিজাগতা ভুরিগ্জগতী; ২৭ বিরাড্ জগতী; ২৯ বার্হতগর্ভাঽনুষ্টুপ্; ৩০ পঞ্চপদোষ্ণিগ্বৃহতীগর্ভাঽতিজগতী; ৩৪ আর্ষী পঙ্ক্তিঃ; ৩৭ পঞ্চপদা বিরাড্-গর্ভা জগতা; ৪৪-৪৫ জগতী (৪৪ চতুষ্পদা পুরঃশাক্বরা ভুরিক্; ৪৫ অতিজাগতগর্ভা)।

উদস্য কেতবো দিবি শুক্রা ভ্রাজন্ত ঈরতে ।
আদিত্যস্য নৃচক্ষসা মহিব্রতস্য মীঢুষঃ ॥১॥

2.2

দিশাং প্রজ্ঞানাং স্বরয়ন্তমর্চিষা সুপক্ষমাশুং পতয়ন্তমর্ণবে।
স্তবাম সূর্যং ভুবনস্য গোপাং যো রশ্মিভির্দিশ আভাতি সর্বাঃ ॥২॥

2.3

যৎ প্রাঙ্ প্রত্যঙ্ স্বধয়া যাসি শীভং নানারূপে অহনী কর্ষি মায়য়া ।
তদাদিত্য মহি তৎ তে মহি শ্রবো যদেকো বিশ্বং পরি ভূম জায়সে ॥৩॥

2.4

বিপশ্চিতং তরণিং ভ্রাজমানং বহন্তি যং হরিতঃ সপ্ত বহ্বীঃ ।
স্রুতাদ্ যমত্ত্রির্দিবমুন্নিনায় তং ত্বা পশ্যন্তি পরিয়ান্তমাজিম্ ॥৪॥

2.5

মা ত্বা দভন্ পরিয়ান্তমাজিং স্বস্তি দুর্গাং অতি যাহি শীভম্।
দিবং চ সূর্য পৃথিবীং চ দেবী মহোরাত্রে বিমিমানো যদেষি ॥৫॥

2.6

স্বস্তি তে সূর্য চরসে রথায় যেনোভাবন্তৌ পরিয়াসি সদ্যঃ ।
যং তে বহন্তি হরিতো বহিষ্ঠাঃ শতমশ্বা যদি বা সপ্ত বহ্বীঃ ॥৬॥

2.7

সুখং সূর্য রথমংশুমন্তং স্যোনং সুবহ্নিমধি তিষ্ঠ বাজিনম্।
যং তে বহন্তি হরিতো বহিষ্ঠাঃ শতমশ্বা যদি বা সপ্ত বহ্বীঃ ॥৭॥

2.8

সপ্ত সূর্যো হরিতো যাতবে রথে হিরণ্যত্বচসো বৃহতীরয়ুক্ত ।
অমোচি শুক্রো রজসঃ পরস্তাদ্ বিধূয় দেবস্তমো দিবমারুহৎ ॥৮॥

2.9

উৎ কেতুনা বৃহতা দেব আগন্নপাবৃক্ তমোঽভি জ্যোতিরশ্রৈৎ।
দিব্যঃ সুপর্ণঃ স বীরো ব্যঽখ্যদদিতেঃ পুত্রো ভুবনানি বিশ্বা ॥৯॥

2.10

উদ্যন্ রশ্মীনা তনুষে বিশ্বা রুপাণি পুষ্যসি ।
উভা সমুদ্রৌ ক্রতুনা বি ভাসি সর্বাংল্লোকান্ পরিভূর্ভ্রাজমানঃ ॥১০॥

2.11

পূর্বাপরং চরতো মায়য়ৈতৌ শিশূ ক্রীডন্তৌ পরি যাতোঽর্ণবম্।
বিশ্বান্যো ভুবনা বিচষ্টে হৈরণ্যৈরন্যং হরিতো বহন্তি ॥১১॥

2.12

দিবি ত্বাত্ত্রিরধারয়ৎ সূর্যা মাসায় কর্তবে ।
স এষি সুধৃতস্তপন্ বিশ্বা ভূতাবচাকশৎ ॥১২॥

2.13

উভাবন্তৌ সমর্ষসি বত্সঃ সংমাতরাবিব ।
নন্বে৩তদিতঃ পুরা ব্রহ্ম দেবা অমী বিদুঃ ॥১৩॥

2.14

যৎ সমুদ্রমনু শ্রিতং তৎ সিষাসতি সূর্যঃ ।
অধ্বাস্য বিততো মহান্ পূর্বশ্চাপরশ্চ যঃ ॥১৪॥

2.15

তং সমাপ্নোতি জূতিভিস্ততো নাপ চিকিত্সতি ।
তেনামৃতস্য ভক্ষং দেবানাং নাব রুন্ধতে ॥১৫॥

2.16

উদু ত্যং জাতবেদসং দেবং বহন্তি কেতবঃ ।
দৃশে বিশ্বায় সূর্যম্ ॥১৬॥

2.17

অপ ত্যে তায়বো যথা নক্ষত্রা যন্ত্যক্তুভিঃ ।
সূরায় বিশ্বচক্ষসে ॥১৭॥

2.18

অদৃশ্রন্নস্য কেতবো বি রশ্ময়ো জনাঁ অনু ।
ভ্রাজন্তো অগ্নয়ো যথা ॥১৮॥

2.19

তরণির্বিশ্বদর্শতো জ্যোতিষ্কৃদসি সূর্য ।
বিশ্বমা ভাসি রোচন ॥১৯॥

2.20

প্রত্যঙ্ দেবানাং বিশঃ প্রত্যঙ্ঙুদেষি মানুষীঃ ।
প্রত্যঙ্ বিশ্বং স্বর্দৃশে ॥২০॥

2.21

যেনা পাবক চক্ষসা ভুরণ্যন্তং জনাঁ অনু ।
ত্বং বরুণ পশ্যসি ॥২১॥

2.22

বি দ্যামেষি রজস্পৃথ্বহর্মিমানো অক্তুভিঃ ।
পশ্যন্ জন্মানি সূর্য ॥২২॥

2.23

সপ্ত ত্বা হরিতো রথে বহন্তি দেব সূর্য ।
শোচিষ্কেশং বিচক্ষণম্ ॥২৩॥

2.24

অয়ুক্ত সপ্ত শুন্ধ্যুবঃ সূরো রথস্য নপ্ত্যঃ ।
তাভির্যাতি স্বয়ুক্তিভিঃ ॥২৪॥

2.25

রোহিতো দিবমারুহৎ তপসা তপস্বী।
স যোনিমৈতি স উ জায়তে পুনঃ স দেবানামধিপতির্বভূব ॥২৫॥

2.26

যো বিশ্বচর্ষণিরুত বিশ্বতোমুখো যো বিশ্বতস্পাণিরুত বিশ্বতস্পৃথঃ ।
সং বাহুভ্যাং ভরতি সং পতত্রৈর্দ্যাবাপৃথিবী জনয়ন্ দেব একঃ ॥২৬॥

2.27

একপাদ্ দ্বিপদো ভূয়ো বি চক্রমে দ্বিপাৎ ত্রিপাদমভ্যেঽতি পশ্চাৎ।
দ্বিপাদ্ধ ষট্পদো ভূয়ো বি চক্রমে ত একপদস্তন্বং১ সমাসতে ॥২৭॥

2.28

অতন্দ্রো যাস্যন্ হরিতো যদাস্থাদ্ দ্বে রূপে কৃণুতে রোচমানঃ ।
কেতুমানুদ্যন্ত্সহমানো রজাংসি বিশ্বা আদিত্য প্রবতো বি ভাসি ॥২৮॥

2.29

বণ্মহাং অসি সূর্য বডাদিত্য মহাং অসি ।
মহাংস্তে মহতো মহিমা ত্বমাদিত্য মহাং অসি ॥২৯॥

2.30

রোচসে দিবি রোচসে অন্তরিক্ষে পতঙ্গ পৃথিব্যাং রোচসে রোচসে অপ্স্ব১ন্তঃ ।
উভা সমুদ্রৌ রুচ্যা ব্যাঽপিথ দেবো দেবাসি মহিষঃ স্বর্জিৎ ॥৩০॥

2.31

অর্বাঙ্ পরস্তাৎ প্রয়তো ব্যধ্ব আশুর্বিপশ্চিৎ পতয়ন্ পতঙ্গঃ ।
বিষ্ণুর্বিচিত্তঃ শবসাধিতিষ্ঠন্ প্র কেতুনা সহতে বিশ্বমেজৎ ॥৩১॥

2.32

চিত্রশ্চিকিত্বান্ মহিষঃ সুপর্ণ আরোচয়ন্ রোদসী অন্তরিক্ষম্।
অহোরাত্রে পরি সূর্যং বসানে প্রাস্য বিশ্বা তিরতো বীর্যাঽণি ॥৩২॥

2.33

তিগ্মো বিভ্রাজন্ তন্বং১ শিশানোঽরংগমাসঃ প্রবতো ররাণঃ ।
জ্যোতিষ্মান্ পক্ষী মহিষো বয়োধা বিশ্বা আস্থাৎ প্রদিশঃ কল্পমানঃ ॥৩৩॥

2.34

চিত্রং দেবানাং কেতুরনীকং জ্যোতিষ্মান্ প্রদিশঃ সূর্য উদ্যন্।
দিবাকরোঽতি দ্যুম্নৈস্তমাংসি বিশ্বাতারীদ্ দুরিতানি শুক্রঃ ॥৩৪॥

2.35

চিত্রং দেবানামুদগাদনীকং চক্ষুর্মিত্রস্য বরুণস্যাগ্নেঃ ।
আপ্রাদ্ দ্যাবাপৃথিবী অন্তরিক্ষং সূর্য আত্মা জগতস্তস্থুষশ্চ ॥৩৫॥

2.36

উচ্চা পতন্তমরুণং সুপর্ণং মধ্যে দিবস্তরণিং ভ্রাজমানম্।
পশ্যাম ত্বা সবিতারং যমাহুরজস্রং জ্যোতির্যদবিন্দদত্ত্রিঃ ॥৩৬॥

2.37

দিবস্পৃষ্ঠে ধাবমানং সুপর্ণমদিত্যাঃ পুত্রং নাথকাম উপ যামি ভীতঃ ।
স নঃ সূর্য প্র তির দীর্ঘমায়ুর্মা রিষাম সুমতৌ তে স্যাম ॥৩৭॥

2.38

সহস্রাহ্ণ্যং বিয়তাবস্য পক্ষৌ হরের্হংসস্য পততঃ স্বর্গম্।
স দেবান্ত্সর্বানুরস্যুপদদ্য সংপশ্যন্ যাতি ভুবনানি বিশ্বা ॥৩৮॥

2.39

রোহিতঃ কালো অভবদ্ রোহিতোঽগ্রে প্রজাপতিঃ ।
রোহিতো যজ্ঞানাং মুখং রোহিতঃ স্ব১রাভরৎ ॥৩৯॥

2.40

রোহিতো লোকো অভবদ্ রোহিতোঽত্যতপদ্ দিবম্।
রোহিতো রশ্মিভির্ভূমিং সমুদ্রমনু সং চরৎ ॥৪০॥

2.41

সর্বা দিশঃ সমচরদ্ রোহিতোঽধিপতির্দিবঃ ।
দিবং সমুদ্রমাদ্ ভূমিং সর্বং ভূতং বি রক্ষতি ॥৪১॥

2.42

আরোহন্ছুক্রো বৃহতীরতন্দ্রো দ্বে রূপে কৃণুতে রোচমানঃ ।
চিত্রশ্চিকিত্বান্ মহিষো বাতমায়া যাবতো লোকানভি যদ্ বিভাতি ॥৪২॥

2.43

অভ্য১ন্যদেতি পর্যন্যদস্যতেঽহোরাত্রাভ্যাং মহিষঃ কল্পমানঃ ।
সূর্যং বয়ং রজসি ক্ষিয়ন্তং গাতুবিদং হবামহে নাধমানাঃ ॥৪৩॥

2.44

পৃথিবীপ্রো মহিষো নাধমানস্য গাতুরদব্ধচক্ষুঃ পরি বিশ্বং বভূব ।
বিশ্বং সংপশ্যন্ত্সুবিদত্রো যজত্র ইদং শৃণোতু যদহং ব্রবীমি ॥৪৪॥

2.45

পর্যস্য মহিমা পৃথিবীং সমুদ্রং জ্যোতিষা বিভ্রাজন্ পরি দ্যামন্তরিক্ষম্।
সর্বং সংপশ্যন্ত্সুবিদত্রো যজত্র ইদং শৃণোতু যদহং ব্রবীমি ॥৪৫॥

2.46

অবোধ্যগ্নিঃ সমিধা জনানাং প্রতি ধেনুমিবায়তীমুষাসম্।
যহ্বা ইব প্র বয়ামুজ্জিহানাঃ প্র ভানবঃ সিস্রতে নাকমচ্ছ ॥৪৬॥