সূক্ত 1

1.1

অধ্যাত্ম-প্রকরণম্। ১-৬০ ব্রহ্মা। অধ্যাত্মং, রোহিতাদিত্যদৈবত্যম্, (৩ মরুতঃ, ২৮-৩১ অগ্নীঃ, ৩১ বহুদেবতাঃ)। ত্রিষ্টুপ্; ৩-৫, ৯, ১২, ১৫ জগতী (১৫ অতিজাগতগর্ভা পরা); ৮ ভুরিক্, ১৭ পঞ্চপদা ককুম্মতী জগতী; ১৩ অতিশাক্বরগর্ভাঽতিজগতী; ১৪ ত্রিপদা পুরঃ পরশাক্বরা বিপরীতপাদলক্ষ্মা পঙ্ক্তিঃ; ১৮-১৯ পঞ্চপদা ককুম্মত্যতিজগতী (১৮ পরশাক্বরা ভুরিক্, ১৯ পরাতিজাগতা) ; ২১ আর্ষী নিচৃদ্গায়ত্রী; ২২-২৩, ২৭ প্রকৃতা; ২৬ বিরাট্ পরোষ্ণিক্; ২৮-৩০ (২৮ ভুরিক্), ৩২, ৩৯-৪০, ৪৫-৫৬, ৫৮ অনুষ্টুপ্; (৫২, ৫৫ পথ্যাপঙ্ক্তিঃ, ৫৫ ককুম্মতী বৃহতীগর

উদেহি বাজিন্ যো অপ্স্ব১ন্তরিদং রাষ্ট্রং প্র বিশ সূনৃতাবৎ।
যো রোহিতো বিশ্বমিদং জজান স ত্বা রাষ্ট্রায় সুভৃতং বিভর্তু ॥১॥

1.2

উদ্ বাজ আ গন্ যো অপ্স্ব১ন্তর্বিশ আ রোহ ত্বদ্যোনয়ো যাঃ ।
সোমং দধানোঽপ ওষধীর্গাশ্চতুষ্পদো দ্বিপদ আ বেশয়েহ ॥২॥

1.3

যূয়মুগ্রা মরুতঃ পৃশ্নিমাতর ইন্দ্রেণ যুজা প্র মৃণীত শত্রূন্।
আ বো রোহিতঃ শৃণবৎ সুদানবস্ত্রিষপ্তাসো মরুতঃ স্বাদুসংমুদঃ ॥৩॥

1.4

রুহো রুরোহ রোহিত আ রুরোহ গর্ভো জনীনাং জনুষামুপস্থম্।
তাভিঃ সংরব্ধমন্ববিন্দন্ ষডুর্বীর্গাতুং প্রপশ্যন্নিহ রাষ্ট্রমাহাঃ ॥৪॥

1.5

আ তে রাষ্ট্রমিহ রোহিতোঽহার্ষীদ্ ব্যাঽস্থন্মৃধো অভয়ং তে অভূৎ।
তস্মৈ তে দ্যাবাপৃথিবী রেবতীভিঃ কামং দুহাতামিহ শক্বরীভিঃ ॥৫॥

1.6

রোহিতো দ্যাবাপৃথিবী জজান তত্র তন্তুং পরমেষ্ঠী ততান ।
তত্র শিশ্রিয়েঽজ একপাদোঽদৃংহদ্ দ্যাবাপৃথিবী বলেন ॥৬॥

1.7

রোহিতো দ্যাবাপৃথিবী অদৃংহৎ তেন স্বঽ স্তভিতং তেন নাকঃ ।
তেনান্তরিক্ষং বিমিতা রজাংসি তেন দেবা অমৃতমন্ববিন্দন্ ॥৭॥

1.8

বি রোহিতো অমৃশদ্ বিশ্বরূপং সমাকুর্বাণঃ প্ররুহো রুহশ্চ ।
দিবং রূঢ্বা মহতা মহিম্না সং তে রাষ্ট্রমনক্তু পয়সা ঘৃতেন ॥৮॥

1.9

যাস্তে রুহঃ প্ররুহো যাস্ত আরুহো যাভিরাপৃণাসি দিবমন্তরিক্ষম্।
তাসাং ব্রহ্মণা পয়সা ববৃধানো বিশি রাষ্ট্রে জাগৃহি রোহিতস্য ॥৯॥

1.10

যস্তে বিশস্তপসঃ সংবভূবুর্বত্সং গায়ত্রীমনু তা ইহাগুঃ ।
তাস্ত্বা বিশন্তু মনসা শিবেন সংমাতা বত্সো অভ্যেঽতু রোহিতঃ ॥১০॥

1.11

ঊর্ধ্বো রোহিতো অধি নাকে অস্থাদ্ বিশ্বা রূপাণি জনয়ন্ যুবা কবিঃ ।
তিগ্মেনাগ্নির্জ্যোতিষা বি ভাতি তৃতীয়ে চক্রে রজসি প্রিয়াণি ॥১১॥

1.12

সহস্রশৃঙ্গো বৃষভো জাতবেদা ঘৃতাহুতঃ সোমপৃষ্ঠঃ সুবীরঃ ।
মা মা হাসীন্নাথিতো নেৎ ত্বা জহানি গোপোষং চ মে বীরপোষং চ ধেহি ॥১২॥

1.13

রোহিতো যজ্ঞস্য জনিতা মুখং চ রোহিতায় বাচা শ্রোত্রেণ মনসা জুহোমি ।
রোহিতং দেবা যন্তি সুমনস্যমানাঃ স মা রোহৈঃ সামিত্যৈ রোহয়তু ॥১৩॥

1.14

রোহিতো যজ্ঞং ব্যদধাদ্ বিশ্বকর্মণে তস্মাৎ তেজাংস্যুপ মেমান্যাগুঃ ।
বোচেয়ং তে নাভিং ভুবনস্যাধি মজ্মনি ॥১৪॥

1.15

আ ত্বা রুরোহ বৃহত্যূ৩ত পঙ্ক্তিরা ককুব্ বর্চসা জাতবেদঃ ।
আ ত্বা রুরোহোষ্ণিহাক্ষরো বষট্কার আ ত্বা রুরোহ রোহিতো রেতসা সহ ॥১৫॥

1.16

অয়ং বস্তে গর্ভং পৃথিব্যা দিবং বস্তেঽয়মন্তরিক্ষম্।
অয়ং ব্রধ্নস্য বিষ্টপি স্বর্লোকান্ ব্যাঽনশে ॥১৬॥

1.17

বাচস্পতে পৃথিবী নঃ স্যোনা স্যোনা যোনিস্তল্পা নঃ সুশেবা ।
ইহৈব প্রাণঃ সখ্যে নো অস্তু তং ত্বা পরমেষ্ঠিন্ পর্যগ্নিরায়ুষা বর্চসা দধাতু ॥১৭॥

1.18

বাচস্পত ঋতবঃ পঞ্চ যে নৌ বৈশ্বকর্মণাঃ পরি যে সংবভূবুঃ ।
ইহৈব প্রাণঃ সখ্যে নো অস্তু তং ত্বা পরমেষ্ঠিন্ পরি রোহিত আয়ুষা বর্চসা দধাতু ॥১৮॥

1.19

বাচস্পতে সৌমনসং মনশ্চ গোষ্ঠে নো গা জনয় যোনিষু প্রজাঃ ।
ইহৈব প্রাণঃ সখ্যে নো অস্তু তং ত্বা পরমেষ্ঠিন্ পর্যহমায়ুষা বর্চসা দধাতু ॥১৯॥

1.20

পরি ত্বা ধাৎ সবিতা দেবো অগ্নির্বর্চসা মিত্রাবরুণাবভি ত্বা ।
সর্বা অরাতীরবক্রামন্নেহীদং রাষ্ট্রমকরঃ সুনৃতাবৎ ॥২০॥

1.21

যং ত্বা পৃষতী রথে প্রষ্টির্বহতি রোহিত । শুভা যাসি রিণন্নপঃ ॥২১॥

1.22

অনুব্রতা রোহিণী রোহিতস্য সূরিঃ সুবর্ণা বৃহতী সুবর্চাঃ ।
তয়া বাজান্ বিশ্বরূপাং জয়েম তয়া বিশ্বাঃ পৃতনা অভি ষ্যাম ॥২২॥

1.23

ইদং সদো রোহিণী রোহিতস্যাসৌ পন্থাঃ পৃষতী যেন যাতি ।
তাং গন্ধর্বাঃ কশ্যপা উন্নয়ন্তি তাং রক্ষন্তি কবয়োঽপ্রমাদম্ ॥২৩॥

1.24

সূর্যস্যাশ্বা হরয়ঃ কেতুমন্তঃ সদা বহন্ত্যমৃতাঃ সুখং রথম্।
ঘৃতপাবা রোহিতো ভ্রাজমানো দিবং দেবঃ পৃষতীমা বিবেশ ॥২৪॥

1.25

যো রোহিতো বৃষভস্তিগ্মশৃঙ্গঃ পর্যগ্নিং পরি সূর্যং বভূব ।
যো বিষ্টভ্নাতি পৃথিবীং দিবং চ তস্মাদ্ দেবা অধি সৃষ্টীঃ সৃজন্তে ॥২৫॥

1.26

রোহিতো দিবমারুহন্মহতঃ পর্যর্ণবাৎ। সর্বা রুরোহ রোহিতো রুহঃ ॥২৬॥

1.27

বি মিমীষ্ব পয়স্বতীং ঘৃতাচীং দেবানাং ধেনুরনপস্পৃগেষা।
ইন্দ্রঃ সোমং পিবতু ক্ষেমো অস্ত্বগ্নিঃ প্র স্তৌতু বি মৃধো নুদস্ব ॥২৭॥

1.28

সমিদ্ধো অগ্নিঃ সমিধানো ঘৃতবৃদ্ধো ঘৃতাহুতঃ ।
অভীষাড্ বিশ্বাষাডগ্নিঃ সপত্নান্ হন্তু যে মম ॥২৮॥

1.29

হন্ত্বেনান্ প্র দহত্বরির্যো নঃ পৃতন্যতি ।
ক্রব্যাদাগ্নিনা বয়ং সপত্নান্ প্র দহামসি ॥২৯॥

1.30

অবাচীনানব জহীন্দ্র বজ্রেণ বাহুমান্।
অধা সপত্নান্ মামকানগ্নেস্তেজোভিরাদিষি ॥৩০॥

1.31

অগ্নে সপত্নানধরান্ পাদয়াস্মদ্ ব্যথয়া সজাতমুত্পিপানং বৃহস্পতে ।
ইন্দ্রাগ্নী মিত্রাবরুণাবধরে পদ্যন্তামপ্রতিমন্যূয়মানাঃ ॥৩১॥

1.32

উদ্যংস্ত্বং দেব সূর্য সপত্নানব মে জহি ।
অবৈনানশ্মনা জহি তে যন্ত্বধমং তমঃ ॥৩২॥

1.33

বত্সো বিরাজো বৃষভো মতীনামা রুরোহ শুক্রপৃষ্ঠোঽন্তরিক্ষম্।
ঘৃতেনার্কমভ্যঽর্চন্তি বত্সং ব্রহ্ম সন্তং ব্রহ্মণা বর্ধয়ন্তি ॥৩৩॥

1.34

দিবং চ রোহ পৃথিবীং চ রোহ রাষ্ট্রং চ রোহ দ্রবিণং চ রোহ ।
প্রজাং চ রোহামৃতং চ রোহ রোহিতেন তন্বং১ সং স্পৃশস্ব ॥৩৪॥

1.35

যে দেবা রাষ্ট্রভৃতোঽভিতো যন্তি সূর্যম্।
তৈষ্টে রোহিতঃ সংবিদানো রাষ্ট্রং দধাতু সুমনস্যমানঃ ॥৩৫॥

1.36

উৎ ত্বা যজ্ঞা ব্রহ্মপূতা বহন্ত্যধ্বগতো হরয়স্ত্বা বহন্তি ।
তিরঃ সমুদ্রমতি রোচসেঽর্ণবম্ ॥৩৬॥

1.37

রোহিতে দ্যাবাপৃথিবী অধি শ্রিতে বসুজিতি গোজিতি সংধনাজিতি ।
সহস্রং যস্য জনিমানি সপ্ত চ বোচেয়ং তে নাভিং ভুবনস্যাধি মজ্মনি ॥৩৭॥

1.38

যশা যাসি প্রদিশো দিশশ্চ যশাঃ পশূনামুত চর্ষণীনাম্।
যশাঃ পৃথিব্যা অদিত্যা উপস্থেঽহং ভূয়াসং সবিতেব চারুঃ ॥৩৮॥

1.39

অমুত্র সন্নিহ বেত্থেতঃ সংস্তানি পশ্যসি ।
ইতঃ পশ্যন্তি রোচনং দিবি সূর্যং বিপশ্চিতম্ ॥৩৯॥

1.40

দেবো দেবান্ মর্চয়স্যন্তশ্চরস্যর্ণবে।
সমানমগ্নিমিন্ধতে তং বিদুঃ কবয়ঃ পরে ॥৪০॥

1.41

অবঃ পরেণ পর এনাবরেণ পদা বত্সং বিব্রতী গৌরুদস্থাৎ।
সা কদ্রীচী কং স্বিদর্ধং পরাগাৎ ক্বঽস্বিৎ সূতে নহি যূথে অস্মিন্ ॥৪১॥

1.42

একপদী দ্বিপদী সা চতুষ্পদ্যষ্টাপদী নবপদী বভূবুষী ।
সহস্রাক্ষরা ভুবনস্য পঙ্ক্তিস্তস্যাঃ সমুদ্রা অধি বি ক্ষরন্তি ॥৪২॥

1.43

আরোহন্ দ্যামমৃতঃ প্রাব মে বচঃ ।
উৎ ত্বা যজ্ঞা ব্রহ্মপূতা বহন্ত্যধ্বগতো হরয়স্ত্বা বহন্তি ॥৪৩॥

1.44

বেদ তৎ তে অমর্ত্য যৎ ত আক্রমণং দিবি।
যৎ তে সধস্থং পরমে ব্যোঽমন্ ॥৪৪॥

1.45

সূর্যো দ্যাং সূর্যঃ পৃথিবীং সূর্য আপোঽতি পশ্যতি ।
সূর্যো ভূতস্যৈকং চক্ষুরা রুরোহ দিবং মহীম্ ॥৪৫॥

1.46

উর্বীরাসন্ পরিধয়ো বেদির্ভূমিরকল্পত ।
তত্রৈতাবগ্নী আধত্ত হিমং ঘ্রংসং চ রোহিতঃ ॥৪৬॥

1.47

হিমং ঘ্রংসং চাধায় যূপান্ কৃত্বা পর্বতান্।
বর্ষাজ্যাবগ্নী ঈজাতে রোহিতস্য স্বর্বিদঃ ॥৪৭॥

1.48

স্বর্বিদো রোহিতস্য ব্রহ্মণাগ্নিঃ সমিধ্যতে ।
তস্মাদ্ ঘ্রংসস্তস্মাদ্ধিমস্তস্মাদ্ যজ্ঞোঽজায়ত ॥৪৮॥

1.49

ব্রহ্মণাগ্নী বাবৃধানৌ ব্রহ্মবৃদ্ধৌ ব্রহ্মাহুতৌ ।
ব্রহ্মেদ্ধাবগ্নী ঈজাতে রোহিতস্য স্বর্বিদঃ ॥৪৯॥

1.50

সত্যে অন্যঃ সমাহিতোঽপ্স্ব১ন্যঃ সমিধ্যতে ।
ব্রহ্মেদ্ধাবগ্নী ঈজাতে রোহিতস্য স্বর্বিদঃ ॥৫০॥

1.51

যং বাতঃ পরি শুম্ভতি যং বেন্দ্রো ব্রহ্মণস্পতিঃ ।
ব্রহ্মেদ্ধাবগ্নী ঈজাতে রোহিতস্য স্বর্বিদঃ ॥৫১॥

1.52

বেদিং ভূমিং কল্পয়িত্বা দিবং কৃত্বা দক্ষিণাম্।
ঘ্রংসং তদগ্নিং কৃত্বা চকার বিশ্বমাত্মন্বদ্ বর্ষেণাজ্যেন রোহিতঃ ॥৫২॥

1.53

বর্ষমাজ্যং ঘ্রংসো অগ্নির্বেদির্ভূমিরকল্পত ।
তত্রৈবান্ পর্বতানগ্নির্গীর্ভিরূর্ধ্বাঁ অকল্পয়ৎ ॥৫৩॥

1.54

গীর্ভিরূর্ধ্বান্ কল্পয়িত্বা রোহিতো ভূমিমব্রবীৎ।
ত্বয়ীদং সর্বং জায়তাং যদ্ ভূতং যচ্চ ভাব্যঽম্ ॥৫৪॥

1.55

স যজ্ঞঃ প্রথমো ভূতো ভব্যো অজায়ত ।
তস্মাদ্ধ জজ্ঞ ইদং সর্বং যৎ কিং চেদং বিরোচতে রোহিতেন ঋষিণাভৃতম্ ॥৫৫॥

1.56

যশ্চ গাং পদা স্ফুরতি প্রত্যঙ্ সূর্যং চ মেহতি ।
তস্য বৃশ্চামি তে মূলং ন চ্ছায়াং করবোঽপরম্ ॥৫৬॥

1.57

যো মাভিচ্ছায়মত্যেষি মাং চাগ্নিং চান্তরা।
তস্য বৃশ্চামি তে মূলং ন চ্ছায়াং করবোঽপরম্ ॥৫৭॥

1.58

যো অদ্য দেব সূর্য ত্বাং চ মাং চান্তরায়তি ।
দুষ্বপ্ন্যং তস্মিংছমলং দুরিতানি চ মৃজ্মহে ॥৫৮॥

1.59

মা প্র গাম পথো বয়ং মা যজ্ঞাদিন্দ্র সোমিনঃ ।
মান্ত স্থুর্নো অরাতয়ঃ ॥৫৯॥

1.60

যো যজ্ঞস্য প্রসাধনস্তন্তুর্দেবেষ্বাততঃ ।
তমাহুতমশীমহি ॥৬০॥