Sukta 1

1.1

Adhyatma-prakaranam, 1-60 brahma, adhyatmam, rohitadityadaivatyam, (3 marutah, 28-31 agnih, 31 bahudevatah), trishtup; 3-5, 9, 12, 15 jagati (15 atijagatagarbha para); 8 bhurik, 17 panchapada kakummati jagati; 13 atishakvaragarbhatijagati; 14 tripada purah parashakvara viparitapadalakshma panktih; 18-19 panchapada kakummatyatijagati (18 parashakvara bhurik, 19 paratijagata) ; 21 arshi nichridgayatri; 22-23, 27 prakrita; 26 virat paroshnik; 28-30 (28 bhurik), 32, 39-40, 45-56, 58 anushtup; (52, 55 pathyapanktih, 55 kakummati brihatigara

उ॒देहि॑ वाजि॒न् यो अ॒प्स्व॑१न्तरि॒दं रा॒ष्ट्रं प्र वि॑श सू॒नृता॑वत्।
यो रोहि॑तो॒ विश्व॑मि॒दं ज॒जान॒ स त्वा॑ रा॒ष्ट्राय॒ सुभृ॑तं बिभर्तु ॥१॥

Udehi vajin yo apsva1ntaridam rashtram pra visha sunritavat
Yo rohito vishvamidam jajana sa tva rashtraya subhritam bibhartu

1.2

उद् वाज॒ आ ग॒न् यो अ॒प्स्व॑१न्तर्विश॒ आ रो॑ह॒ त्वद्यो॑नयो॒ याः ।
सोमं॒ दधा॑नो॒ऽप ओष॑धी॒र्गाश्च॑तुष्पदो द्वि॒पद॒ आ वे॑शये॒ह ॥२॥

Ud vaja a gan yo apsva1ntarvisha a roha tvadyonayo yah
Somam dadhanopa oshadhirgashchatushpado dvipada a veshayeha

1.3

यू॒यमु॒ग्रा म॑रुतः पृश्निमातर॒ इन्द्रे॑ण यु॒जा प्र मृ॑णीत॒ शत्रू॑न्।
आ वो॒ रोहि॑तः शृणवत् सुदानवस्त्रिष॒प्तासो॑ मरुतः स्वादुसंमुदः ॥३॥

Yuyamugra marutah prishnimatara indrena yuja pra mrinita shatrun
A vo rohitah shrinavat sudanavastrishaptaso marutah svadusammudah

1.4

रुहो॑ रुरोह॒ रोहि॑त॒ आ रु॑रोह॒ गर्भो॒ जनी॑नां ज॒नुषा॑मु॒पस्थ॑म्।
ताभिः॒ संर॑ब्ध॒मन्व॑विन्द॒न् षडु॒र्वीर्गा॒तुं प्र॒पश्य॑न्नि॒ह रा॒ष्ट्रमाहाः॑ ॥४॥

Ruho ruroha rohita a ruroha garbho janinam janushamupastham
Tabhih sanrabdhamanvavindan shadurvirgatum prapashyanniha rashtramahah

1.5

आ ते॑ रा॒ष्ट्रमि॒ह रोहि॑तोऽहार्षी॒द् व्याऽस्थ॒न्मृधो॒ अभ॑यं ते अभूत्।
तस्मै॑ ते॒ द्यावा॑पृथि॒वी रे॒वती॑भिः॒ कामं॑ दुहातामि॒ह शक्व॑रीभिः ॥५॥

A te rashtramiha rohitoharshid vyasthanmridho abhayam te abhut
Tasmai te dyavaprithivi revatibhih kamam duhatamiha shakvaribhih

1.6

रोहि॑तो॒ द्यावा॑पृथि॒वी ज॑जान॒ तत्र॒ तन्तुं॑ परमे॒ष्ठी त॑तान ।
तत्र॑ शिश्रिये॒ऽज एक॑पा॒दोऽदृं॑ह॒द् द्यावा॑पृथि॒वी बले॑न ॥६॥

Rohito dyavaprithivi jajana tatra tantum parameshthi tatana
Tatra shishriyeja ekapadodrinhad dyavaprithivi balena

1.7

रोहि॑तो॒ द्यावा॑पृथि॒वी अ॑दृंह॒त् तेन॒ स्वऽ स्तभि॒तं तेन॒ नाकः॑ ।
तेना॒न्तरि॑क्षं॒ विमि॑ता॒ रजां॑सि॒ तेन॑ दे॒वा अ॒मृत॒मन्व॑विन्दन् ॥७॥

Rohito dyavaprithivi adrinhat tena sva stabhitam tena nakah
Tenantariksham vimita rajansi tena deva amritamanvavindan

1.8

वि रोहि॑तो अमृशद् वि॒श्वरू॑पं समाकुर्वा॒णः प्र॒रुहो॒ रुह॑श्च ।
दिवं॑ रू॒ढ्वा म॑ह॒ता म॑हि॒म्ना सं ते॑ रा॒ष्ट्रम॑नक्तु॒ पय॑सा घृ॒तेन॑ ॥८॥

Vi rohito amrishad vishvarupam samakurvanah praruho ruhashcha
Divam rudhva mahata mahimna sam te rashtramanaktu payasa ghritena

1.9

यास्ते॒ रुहः॑ प्र॒रुहो॒ यास्त॑ आ॒रुहो॒ याभि॑रापृ॒णासि॒ दिव॑म॒न्तरि॑क्षम्।
तासां॒ ब्रह्म॑णा॒ पय॑सा ववृधा॒नो वि॒शि रा॒ष्ट्रे जा॑गृहि॒ रोहि॑तस्य ॥९॥

Yaste ruhah praruho yasta aruho yabhiraprinasi divamantariksham
Tasam brahmana payasa vavridhano vishi rashtre jagrihi rohitasya

1.10

यस्ते॒ विश॒स्तप॑सः संबभू॒वुर्व॒त्सं गा॑य॒त्रीमनु॒ ता इ॒हागुः॑ ।
तास्त्वा वि॑शन्तु॒ मन॑सा शि॒वेन॒ संमा॑ता व॒त्सो अ॒भ्येऽतु॒ रोहि॑तः ॥१०॥

Yaste vishastapasah sambabhuvurvatsam gayatrimanu ta ihaguh
Tastva vishantu manasa shivena sammata vatso abhyetu rohitah

1.11

ऊ॒र्ध्वो रोहि॑तो॒ अधि॒ नाके॑ अस्था॒द् विश्वा॑ रू॒पाणि॑ ज॒नय॒न् युवा॑ क॒विः ।
ति॒ग्मेना॒ग्निर्ज्योति॑षा॒ वि भा॑ति तृ॒तीये॑ चक्रे॒ रज॑सि प्रि॒याणि॑ ॥११॥

Urdhvo rohito adhi nake asthad vishva rupani janayan yuva kavih
Tigmenagnirjyotisha vi bhati tritiye chakre rajasi priyani

1.12

स॒हस्र॑शृङ्गो वृष॒भो जा॒तवे॑दा घृ॒ताहु॑तः॒ सोम॑पृष्ठः सु॒वीरः॑ ।
मा मा॑ हासीन्नाथि॒तो नेत् त्वा॒ जहा॑नि गोपो॒षं च॑ मे वीरपो॒षं च॑ धेहि ॥१२॥

Sahasrashringo vrishabho jataveda ghritahutah somaprishthah suvirah
Ma ma hasinnathito net tva jahani goposham cha me viraposham cha dhehi

1.13

रोहि॑तो य॒ज्ञस्य॑ जनि॒ता मुखं॑ च॒ रोहि॑ताय वा॒चा श्रोत्रे॑ण॒ मन॑सा जुहोमि ।
रोहि॑तं दे॒वा य॑न्ति सुमन॒स्यमा॑नाः॒ स मा॒ रोहैः॑ सामि॒त्यै रो॑हयतु ॥१३॥

Rohito yagyasya janita mukham cha rohitaya vacha shrotrena manasa juhomi
Rohitam deva yanti sumanasyamanah sa ma rohaih samityai rohayatu

1.14

रोहि॑तो य॒ज्ञं व्यदधाद् वि॒श्वक॑र्मणे॒ तस्मा॒त् तेजां॒स्युप॑ मे॒मान्यागुः॑ ।
वो॒चेयं॑ ते॒ नाभिं॒ भुव॑न॒स्याधि॑ म॒ज्मनि॑ ॥१४॥

Rohito yagyam vyadadhad vishvakarmane tasmat tejansyupa memanyaguh
Vocheyam te nabhim bhuvanasyadhi majmani

1.15

आ त्वा॑ रुरोह बृह॒त्यू३त प॒ङ्क्तिरा क॒कुब् वर्च॑सा जातवेदः ।
आ त्वा॑ रुरोहोष्णिहाक्ष॒रो व॑षट्का॒र आ त्वा॑ रुरोह॒ रोहि॑तो॒ रेत॑सा स॒ह ॥१५॥

A tva ruroha brihatyu3ta panktira kakub varchasa jatavedah
A tva rurohoshnihaksharo vashatkara a tva ruroha rohito retasa saha

1.16

अ॒यं व॑स्ते॒ गर्भं॑ पृथि॒व्या दिवं॑ वस्ते॒ऽयम॒न्तरि॑क्षम्।
अ॒यं ब्र॒ध्नस्य॑ वि॒ष्टपि॒ स्वर्लो॒कान् व्याऽनशे ॥१६॥

Ayam vaste garbham prithivya divam vasteyamantariksham
Ayam bradhnasya vishtapi svarlokan vyanashe

1.17

वाच॑स्पते पृथि॒वी नः॑ स्यो॒ना स्यो॒ना योनि॒स्तल्पा॑ नः सु॒शेवा॑ ।
इ॒हैव प्रा॒णः स॒ख्ये नो॑ अस्तु॒ तं त्वा॑ परमेष्ठि॒न् पर्य॒ग्निरायु॑षा॒ वर्च॑सा दधातु ॥१७॥

Vachaspate prithivi nah syona syona yonistalpa nah susheva
Ihaiva pranah sakhye no astu tam tva parameshthin paryagnirayusha varchasa dadhatu

1.18

वाच॑स्पत ऋ॒तवः॒ पञ्च॒ ये नौ॑ वैश्वकर्म॒णाः परि॒ ये सं॑बभू॒वुः ।
इ॒हैव प्रा॒णः स॒ख्ये नो॑ अस्तु॒ तं त्वा॑ परमेष्ठि॒न् परि॒ रोहि॑त॒ आयु॑षा॒ वर्च॑सा दधातु ॥१८॥

Vachaspata ritavah pancha ye nau vaishvakarmanah pari ye sambabhuvuh
Ihaiva pranah sakhye no astu tam tva parameshthin pari rohita ayusha varchasa dadhatu

1.19

वाच॑स्पते सौमन॒सं मन॑श्च गो॒ष्ठे नो॒ गा ज॒नय॒ योनि॑षु प्र॒जाः ।
इ॒हैव प्रा॒णः स॒ख्ये नो॑ अस्तु॒ तं त्वा॑ परमेष्ठि॒न् पर्य॒हमायु॑षा॒ वर्च॑सा दधातु ॥१९॥

Vachaspate saumanasam manashcha goshthe no ga janaya yonishu prajah
Ihaiva pranah sakhye no astu tam tva parameshthin paryahamayusha varchasa dadhatu

1.20

परि॑ त्वा धात् सवि॒ता दे॒वो अ॒ग्निर्वर्च॑सा मि॒त्रावरु॑णाव॒भि त्वा॑ ।
सर्वा॒ अरा॑तीरव॒क्राम॒न्नेही॒दं रा॒ष्ट्रम॑करः सु॒नृता॑वत् ॥२०॥

Pari tva dhat savita devo agnirvarchasa mitravarunavabhi tva
Sarva aratiravakramannehidam rashtramakarah sunritavat

1.21

यं त्वा॒ पृष॑ती॒ रथे॒ प्रष्टि॒र्वह॑ति रोहित । शु॒भा या॑सि रि॒णन्न॒पः ॥२१॥

Yam tva prishati rathe prashtirvahati rohita, shubha yasi rinannapah

1.22

अनु॑व्रता॒ रोहि॑णी॒ रोहि॑तस्य सू॒रिः सु॒वर्णा॑ बृह॒ती सु॒वर्चाः॑ ।
तया॒ वाजा॑न् वि॒श्वरू॑पां जयेम॒ तया॒ विश्वाः॒ पृत॑ना अ॒भि ष्या॑म ॥२२॥

Anuvrata rohini rohitasya surih suvarna brihati suvarchah
Taya vajan vishvarupam jayema taya vishvah pritana abhi shyama

1.23

इ॒दं सदो॒ रोहि॑णी॒ रोहि॑तस्या॒सौ पन्थाः॒ पृष॑ती॒ येन॒ याति॑ ।
तां ग॑न्ध॒र्वाः क॒श्यपा॒ उन्न॑यन्ति॒ तां र॑क्षन्ति क॒वयोऽप्र॑मादम् ॥२३॥

Idam sado rohini rohitasyasau panthah prishati yena yati
Tam gandharvah kashyapa unnayanti tam rakshanti kavayopramadam

1.24

सूर्य॒स्याश्वा॒ हर॑यः केतु॒मन्तः॒ सदा॑ वहन्त्य॒मृताः॑ सु॒खं रथ॑म्।
घृ॒त॒पावा॒ रोहि॑तो॒ भ्राज॑मानो॒ दिवं॑ दे॒वः पृष॑ती॒मा वि॑वेश ॥२४॥

Suryasyashva harayah ketumantah sada vahantyamritah sukham ratham
Ghritapava rohito bhrajamano divam devah prishatima vivesha

1.25

यो रोहि॑तो वृष॒भस्ति॒ग्मशृ॑ङ्गः॒ पर्य॒ग्निं परि॒ सूर्यं॑ ब॒भूव॑ ।
यो वि॑ष्ट॒भ्नाति॑ पृथि॒वीं दिवं॑ च॒ तस्मा॑द् दे॒वा अधि॒ सृष्टीः॑ सृजन्ते ॥२५॥

Yo rohito vrishabhastigmashringah paryagnim pari suryam babhuva
Yo vishtabhnati prithivim divam cha tasmad deva adhi srishtih srijante

1.26

रोहि॑तो॒ दिव॒मारु॑हन्मह॒तः पर्य॑र्ण॒वात्। सर्वा॑ रुरोह॒ रोहि॑तो॒ रुहः॑ ॥२६॥

Rohito divamaruhanmahatah paryarnavat, sarva ruroha rohito ruhah

1.27

वि मि॑मीष्व॒ पय॑स्वतीं घृ॒ताचीं॑ दे॒वानां॑ धे॒नुरन॑पस्पृगे॒षा।
इन्द्रः॒ सोमं॑ पिबतु॒ क्षेमो॑ अस्त्व॒ग्निः प्र स्तौ॑तु॒ वि मृधो॑ नुदस्व ॥२७॥

Vi mimishva payasvatim ghritachim devanam dhenuranapasprigesha
Indrah somam pibatu kshemo astvagnih pra stautu vi mridho nudasva

1.28

समि॑द्धो अ॒ग्निः स॑मिधा॒नो घृ॒तवृ॑द्धो घृ॒ताहु॑तः ।
अ॒भी॒षाड् वि॑श्वा॒षाड॒ग्निः स॒पत्ना॑न् हन्तु॒ ये मम॑ ॥२८॥

Samiddho agnih samidhano ghritavriddho ghritahutah
Abhishad vishvashadagnih sapatnan hantu ye mama

1.29

हन्त्वे॑ना॒न् प्र द॑ह॒त्वरि॒र्यो नः॑ पृत॒न्यति॑ ।
क्र॒व्यादा॒ग्निना॑ व॒यं स॒पत्ना॒न् प्र द॑हामसि ॥२९॥

Hantvenan pra dahatvariryo nah pritanyati
Kravyadagnina vayam sapatnan pra dahamasi

1.30

अ॒वा॒चीना॒नव॑ ज॒हीन्द्र॒ वज्रे॑ण बाहु॒मान्।
अधा॑ स॒पत्ना॒न् माम॒कान॒ग्नेस्तेजो॑भि॒रादि॑षि ॥३०॥

Avachinanava jahindra vajrena bahuman
Adha sapatnan mamakanagnestejobhiradishi

1.31

अग्ने॑ स॒पत्ना॒नध॑रान् पादया॒स्मद् व्य॒थया॑ सजा॒तमु॒त्पिपा॑नं बृहस्पते ।
इन्द्रा॑ग्नी॒ मित्रा॑वरुणा॒वध॑रे पद्यन्ता॒मप्र॑तिमन्यूयमानाः ॥३१॥

Agne sapatnanadharan padayasmad vyathaya sajatamutpipanam brihaspate
Indragni mitravarunavadhare padyantamapratimanyuyamanah

1.32

उ॒द्यंस्त्वं दे॑व सूर्य स॒पत्ना॒नव॑ मे जहि ।
अवै॑ना॒नश्म॑ना जहि॒ ते य॑न्त्वध॒मं तमः॑ ॥३२॥

Udyanstvam deva surya sapatnanava me jahi
Avainanashmana jahi te yantvadhamam tamah

1.33

व॒त्सो वि॒राजो॑ वृष॒भो म॑ती॒नामा रु॑रोह शु॒क्रपृ॑ष्ठो॒ऽन्तरि॑क्षम्।
घृ॒तेना॒र्कम॒भ्यऽर्चन्ति व॒त्सं ब्रह्म॒ सन्तं॒ ब्रह्म॑णा वर्धयन्ति ॥३३॥

Vatso virajo vrishabho matinama ruroha shukraprishthontariksham
Ghritenarkamabhyarchanti vatsam brahma santam brahmana vardhayanti

1.34

दिवं॑ च॒ रो॑ह पृथि॒वीं च॑ रोह रा॒ष्ट्रं च॒ रोह॒ द्रवि॑णं च रोह ।
प्र॒जां च॒ रोहा॒मृतं॑ च रोह॒ रोहि॑तेन त॒न्वं॑१ सं स्पृ॑शस्व ॥३४॥

Divam cha roha prithivim cha roha rashtram cha roha dravinam cha roha
Prajam cha rohamritam cha roha rohitena tanvan1 sam sprishasva

1.35

ये दे॒वा रा॑ष्ट्रभृतो॒ऽभितो॒ यन्ति॒ सूर्य॑म्।
तैष्टे॒ रोहि॑तः संविदा॒नो रा॒ष्ट्रं द॑धातु सुमन॒स्यमा॑नः ॥३५॥

Ye deva rashtrabhritobhito yanti suryam
Taishte rohitah sanvidano rashtram dadhatu sumanasyamanah

1.36

उत् त्वा॑ य॒ज्ञा ब्रह्म॑पूता वहन्त्यध्व॒गतो॒ हर॑यस्त्वा वहन्ति ।
ति॒रः स॑मु॒द्रमति॑ रोचसेऽर्ण॒वम् ॥३६॥

Ut tva yagya brahmaputa vahantyadhvagato harayastva vahanti
Tirah samudramati rochasernavam

1.37

रोहि॑ते॒ द्यावा॑पृथि॒वी अधि॑ श्रि॒ते व॑सु॒जिति॑ गो॒जिति॑ संधना॒जिति॑ ।
स॒हस्रं॒ यस्य॒ जनि॑मानि स॒प्त च॑ वो॒चेयं॑ ते॒ नाभिं॒ भुव॑न॒स्याधि॑ म॒ज्मनि॑ ॥३७॥

Rohite dyavaprithivi adhi shrite vasujiti gojiti sandhanajiti
Sahasram yasya janimani sapta cha vocheyam te nabhim bhuvanasyadhi majmani

1.38

य॒शा या॑सि प्र॒दिशो॑ दिश॑श्च य॒शाः प॑शू॒नामु॒त च॑र्षणी॒नाम्।
य॒शाः पृ॑थि॒व्या अदि॑त्या उ॒पस्थे॒ऽहं भू॑यासं सवि॒तेव॒ चारुः॑ ॥३८॥

Yasha yasi pradisho dishashcha yashah pashunamuta charshaninam
Yashah prithivya aditya upastheham bhuyasam saviteva charuh

1.39

अ॒मुत्र॒ सन्नि॒ह वे॑त्थे॒तः संस्तानि॑ पश्यसि ।
इ॒तः प॑श्यन्ति रोच॒नं दि॒वि सूर्यं॑ विप॒श्चित॑म् ॥३९॥

Amutra sanniha vetthetah sanstani pashyasi
Itah pashyanti rochanam divi suryam vipashchitam

1.40

दे॒वो दे॒वान् म॑र्चयस्य॒न्तश्च॑रस्यर्ण॒वे।
स॒मा॒नम॒ग्निमि॑न्धते॒ तं वि॑दुः क॒वयः॒ परे॑ ॥४०॥

Devo devan marchayasyantashcharasyarnave
Samanamagnimindhate tam viduh kavayah pare

1.41

अ॒वः परे॑ण प॒र ए॒नाव॑रेण प॒दा व॒त्सं बिब्र॑ती॒ गौरुद॑स्थात्।
सा क॒द्रीची॒ कं स्वि॒दर्धं॒ परा॑गा॒त् क्वऽस्वित् सूते न॒हि यू॒थे अ॒स्मिन् ॥४१॥

Avah parena para enavarena pada vatsam bibrati gaurudasthat
Sa kadrichi kam svidardham paragat kvasvit sute nahi yuthe asmin

1.42

एक॑पदी द्वि॒पदी॒ सा चतु॑ष्पद्य॒ष्टाप॑दी॒ नव॑पदी बभू॒वुषी॑ ।
स॒हस्रा॑क्षरा॒ भुव॑नस्य प॒ङ्क्तिस्तस्याः॑ समु॒द्रा अधि॒ वि क्ष॑रन्ति ॥४२॥

Ekapadi dvipadi sa chatushpadyashtapadi navapadi babhuvushi
Sahasrakshara bhuvanasya panktistasyah samudra adhi vi ksharanti

1.43

आ॒रोह॒न् द्याम॒मृतः॒ प्राव॑ मे॒ वचः॑ ।
उत् त्वा॑ य॒ज्ञा ब्रह्म॑पूता वहन्त्यध्व॒गतो॒ हर॑यस्त्वा वहन्ति ॥४३॥

Arohan dyamamritah prava me vachah
Ut tva yagya brahmaputa vahantyadhvagato harayastva vahanti

1.44

वेद॒ तत् ते अमर्त्य॒ यत् त॑ आ॒क्रम॑णं दि॒वि।
यत् ते॑ स॒धस्थं॑ पर॒मे व्योऽमन् ॥४४॥

Veda tat te amartya yat ta akramanam divi
Yat te sadhastham parame vyoman

1.45

सूर्यो॒ द्यां सूर्यः॑ पृथि॒वीं सूर्य॒ आपोऽति॑ पश्यति ।
सूर्यो॑ भू॒तस्यैकं॒ चक्षु॒रा रु॑रोह॒ दिवं॑ म॒हीम् ॥४५॥

Suryo dyam suryah prithivim surya apoti pashyati
Suryo bhutasyaikam chakshura ruroha divam mahim

1.46

उ॒र्वीरा॑सन् परि॒धयो॒ वेदि॒र्भूमि॑रकल्पत ।
तत्रै॒ताव॒ग्नी आध॑त्त हि॒मं घ्रं॒सं च॒ रोहि॑तः ॥४६॥

Urvirasan paridhayo vedirbhumirakalpata
Tatraitavagni adhatta himam ghransam cha rohitah

1.47

हि॒मं घ्रं॒सं चा॒धाय॒ यूपा॑न् कृ॒त्वा पर्व॑तान्।
व॒र्षाज्या॑व॒ग्नी ई॑जाते॒ रोहि॑तस्य स्व॒र्विदः॑ ॥४७॥

Himam ghransam chadhaya yupan kritva parvatan
Varshajyavagni ijate rohitasya svarvidah

1.48

स्व॒र्विदो॒ रोहि॑तस्य॒ ब्रह्म॑णा॒ग्निः समि॑ध्यते ।
तस्मा॑द् घ्रं॒सस्तस्मा॑द्धि॒मस्तस्मा॑द् य॒ज्ञोऽजायत ॥४८॥

Svarvido rohitasya brahmanagnih samidhyate
Tasmad ghransastasmaddhimastasmad yagyojayata

1.49

ब्रह्म॑णा॒ग्नी वा॑वृधा॒नौ ब्रह्म॑वृद्धौ॒ ब्रह्मा॑हुतौ ।
ब्रह्मे॑द्धाव॒ग्नी ई॑जाते॒ रोहि॑तस्य स्व॒र्विदः॑ ॥४९॥

Brahmanagni vavridhanau brahmavriddhau brahmahutau
Brahmeddhavagni ijate rohitasya svarvidah

1.50

स॒त्ये अ॒न्यः स॒माहि॑तो॒ऽप्स्व॑१न्यः समि॑ध्यते ।
ब्रह्मे॑द्धाव॒ग्नी ई॑जाते॒ रोहि॑तस्य स्व॒र्विदः॑ ॥५०॥

Satye anyah samahitopsva1nyah samidhyate
Brahmeddhavagni ijate rohitasya svarvidah

1.51

यं वातः॑ परि॒ शुम्भ॑ति॒ यं वेन्द्रो॒ ब्रह्म॑ण॒स्पतिः॑ ।
ब्रह्मे॑द्धाव॒ग्नी ई॑जाते॒ रोहि॑तस्य स्व॒र्विदः॑ ॥५१॥

Yam vatah pari shumbhati yam vendro brahmanaspatih
Brahmeddhavagni ijate rohitasya svarvidah

1.52

वेदिं॒ भूमिं॑ कल्पयि॒त्वा दिवं॑ कृ॒त्वा दक्षि॑णाम्।
घ्रं॒सं तद॒ग्निं कृ॒त्वा च॒कार॒ विश्व॑मात्म॒न्वद् व॒र्षेणाज्ये॑न॒ रोहि॑तः ॥५२॥

Vedim bhumim kalpayitva divam kritva dakshinam
Ghransam tadagnim kritva chakara vishvamatmanvad varshenajyena rohitah

1.53

व॒र्षमाज्यं॑ घ्रं॒सो अ॒ग्निर्वेदि॒र्भूमि॑रकल्पत ।
तत्रै॒वान् पर्व॑तान॒ग्निर्गी॒र्भिरू॒र्ध्वाँ अ॑कल्पयत् ॥५३॥

Varshamajyam ghranso agnirvedirbhumirakalpata
Tatraivan parvatanagnirgirbhirurdhvam akalpayat

1.54

गी॒र्भिरू॒र्ध्वान् क॑ल्पयि॒त्वा रोहि॑तो॒ भूमि॑मब्रवीत्।
त्वयी॒दं सर्वं॑ जायतां॒ यद् भू॒तं यच्च॑ भा॒व्यऽम् ॥५४॥

Girbhirurdhvan kalpayitva rohito bhumimabravit
Tvayidam sarvam jayatam yad bhutam yachcha bhavyam

1.55

स य॒ज्ञः प्र॑थ॒मो भू॒तो भव्यो॑ अजायत ।
तस्मा॑द्ध जज्ञ इ॒दं सर्वं॒ यत् किं चे॒दं वि॒रोच॑ते॒ रोहि॑तेन॒ ऋषि॒णाभृ॑तम् ॥५५॥

Sa yagyah prathamo bhuto bhavyo ajayata
Tasmaddha jagya idam sarvam yat kim chedam virochate rohitena rishinabhritam

1.56

यश्च॒ गां प॒दा स्फु॒रति॑ प्र॒त्यङ् सूर्यं॑ च॒ मेह॑ति ।
तस्य॑ वृश्चामि ते॒ मूलं॒ न च्छा॒यां क॑र॒वोऽप॑रम् ॥५६॥

Yashcha gam pada sphurati pratyang suryam cha mehati
Tasya vrishchami te mulam na chchhayam karavoparam

1.57

यो मा॑भिच्छा॒यम॒त्येषि॒ मां चा॒ग्निं चा॑न्त॒रा।
तस्य॑ वृश्चामि ते॒ मूलं॒ न च्छा॒यां क॑र॒वोऽप॑रम् ॥५७॥

Yo mabhichchhayamatyeshi mam chagnim chantara
Tasya vrishchami te mulam na chchhayam karavoparam

1.58

यो अ॒द्य दे॑व सूर्य॒ त्वां च॒ मां चा॑न्त॒राय॑ति ।
दु॒ष्वप्न्यं॒ तस्मिं॒छम॑लं दुरि॒तानि॑ च मृज्महे ॥५८॥

Yo adya deva surya tvam cha mam chantarayati
Dushvapnyam tasminchhamalam duritani cha mrijmahe

1.59

मा प्र गा॑म प॒थो व॒यं मा य॒ज्ञादि॑न्द्र सो॒मिनः॑ ।
मान्त स्थु॑र्नो॒ अरा॑तयः ॥५९॥

Ma pra gama patho vayam ma yagyadindra sominah
Manta sthurno aratayah

1.60

यो य॒ज्ञस्य॑ प्र॒साध॑न॒स्तन्तु॑र्दे॒वेष्वात॑तः ।
तमाहु॑तमशीमहि ॥६०॥

Yo yagyasya prasadhanastanturdeveshvatatah
Tamahutamashimahi