সূক্ত 8

8.1

অধ্যাত্মম্। ১-৩৪ কৌরুপথিঃ। অধ্যাত্মং, মন্যুঃ। অনুষ্টুপ্, ৩৩ পথ্যাপঙ্ক্তিঃ।

যন্মন্যুর্জায়ামাবহৎ সংকল্পস্য গৃহাদধি ।
ক আসং জন্যাঃ কে বরাঃ ক উ জ্যেষ্ঠবরোঽভবৎ ॥১॥

8.2

তপশ্চৈবাস্তাং কর্ম চান্তর্মহত্যঽর্ণবে।
ত আসং জন্যাস্তে বরা ব্রহ্ম জ্যেষ্ঠবরোঽভবৎ ॥২॥

8.3

দশ সাকমজায়ন্ত দেবা দেবেভ্যঃ পুরা।
যো বৈ তান্ বিদ্যাৎ প্রত্যক্ষং স বা অদ্য মহদ্ বদেৎ ॥৩॥

8.4

প্রাণাপানৌ চক্ষুঃ শ্রোত্রমক্ষিতিশ্চ ক্ষিতিশ্চ যা।
ব্যানোদানৌ বাঙ্ মনস্তে বা আকূতিমাবহন্ ॥৪॥

8.5

অজাতা আসন্নৃতবোঽথো ধাতা বৃহস্পতিঃ ।
ইন্দ্রাগ্নী অশ্বিনা তর্হি কং তে জ্যেষ্ঠমুপাসত ॥৫॥

8.6

তপশ্চৈবাস্তাং কর্ম চান্তর্মহত্যর্ণবে।
তপো হ জজ্ঞে কর্মণস্তৎ তে জ্যেষ্ঠমুপাসত ॥৬॥

8.7

যেত আসীদ্ ভূমিঃ পূর্বা যামদ্ধাতয় ইদ্ বিদুঃ ।
যো বৈ তাং বিদ্যান্নামথা স মন্যেত পুরাণবিৎ ॥৭॥

8.8

কুত ইন্দ্রঃ কুতঃ সোমঃ কুতো অগ্নিরজায়ত ।
কুতস্ত্বষ্টা সমভবৎ কুতো ধাতাজায়ত ॥৮॥

8.9

ইন্দ্রাদিন্দ্রঃ সোমাৎ সোমো অগ্নেরগ্নিরজায়ত ।
ত্বষ্টা হ জজ্ঞে ত্বষ্টুর্ধাতুর্ধাতাজায়ত ॥৯॥

8.10

যে ত আসন্ দশ জাতা দেবা দেবেভ্যঃ পুরা।
পুত্রেভ্যো লোকং দত্ত্বা কস্মিংস্তে লোক আসতে ॥১০॥

8.11

যদা কেশানস্থি স্নাব মাংসং মজ্জানমাভরৎ।
শরীরং কৃত্বা পাদবৎ কং লোকমনু প্রাবিশৎ ॥১১॥

8.12

কুতঃ কেশান্ কুতঃ স্নাব কুতো অস্থীন্যাভরৎ।
অঙ্গা পর্বাণি মজ্জানং কো মাংসং কুত আভরৎ ॥১২॥

8.13

সংসিচো নাম তে দেবা যে সংভারান্ত্সমভরন্।
সর্বং সংসিচ্য মর্ত্যং দেবাঃ পুরুষমাবিশন্ ॥১৩॥

8.14

ঊরূ পাদাবষ্ঠীবন্তৌ শিরৌ হস্তাবথো মুখম্।
পৃষ্টীর্বর্জহ্যে পার্শ্বে কস্তৎ সমদধাদৃষিঃ ॥১৪॥

8.15

শিরো হস্তাবথো মুখং জিহ্বাং গ্রীবাশ্চ কীকসাঃ ।
ত্বচা প্রাবৃত্য সর্বং তৎ সংধা সমদধান্মহী ॥১৫॥

8.16

যৎ তচ্ছরীরমশয়ৎ সংধয়া সংহিতং মহৎ।
যেনেদমদ্য রোচতে কো অস্মিন্ বর্ণমাভরৎ ॥১৬॥

8.17

সর্বে দেবা উপাশিক্ষন্ তদজানাদ্ বধূঃ সতী।
ঈশা বশস্য যা জায়া সাস্মিন্ বর্ণমাভরৎ ॥১৭॥

8.18

যদা ত্বষ্টা ব্যতৃণৎ পিতা ত্বষ্টুর্য উত্তরঃ ।
গৃহং কৃত্বা মর্ত্যং দেবাঃ পুরুষমাবিশন্ ॥১৮॥

8.19

স্বপ্নো বৈ তন্দ্রীর্নিরৃতিঃ পাপ্মানো নাম দেবতাঃ ।
জরা খালত্যং পালিত্যং শরীরমনু প্রাবিশন্ ॥১৯॥

8.20

স্তেয়ং দুষ্কৃতং বৃজিনং সত্যং যজ্ঞো যশো বৃহৎ।
বলং চ ক্ষত্রমোজশ্চ শরীরমনু প্রাবিশন্ ॥২০॥

8.21

ভূতিশ্চ বা অভূতিশ্চ রাতয়োঽরাতয়শ্চ যাঃ ।
ক্ষুধশ্চ সর্বাস্তৃষ্ণাশ্চ শরীরমনু প্রাবিশন্ ॥২১॥

8.22

নিন্দাশ্চ বা অনিন্দাশ্চ যচ্চ হন্তেতি নেতি চ ।
শরীরং শ্রদ্ধা দক্ষিণাশ্রদ্ধা চানু প্রাবিশন্ ॥২২॥

8.23

বিদ্যাশ্চ বা অবিদ্যাশ্চ যচ্চান্যদুপদেশ্যঽম্।
শরীরং ব্রহ্ম প্রাবিশদৃচঃ সামাথো যজুঃ ॥২৩॥

8.24

আনন্দা মোদাঃ প্রমুদোঽভিমোদমুদশ্চ যে।
হসো নরিষ্টা নৃত্তানি শরীরমনু প্রাবিশন্ ॥২৪॥

8.25

আলাপাশ্চ প্রলাপাশ্চাভিলাপলপশ্চ যে।
শরীরং সর্বে প্রাবিশন্নায়ুজঃ প্রয়ুজো যুজঃ ॥২৫॥

8.26

প্রাণাপানৌ চক্ষুঃ শ্রোত্রমক্ষিতিশ্চ ক্ষিতিশ্চ যা।
ব্যানোদানৌ বাঙ্ মনঃ শরীরেণ ত ঈয়ন্তে ॥২৬॥

8.27

আশিষশ্চ প্রশিষশ্চ সংশিষো বিশিষশ্চ যাঃ ।
চিত্তানি সর্বে সংকল্পাঃ শরীরমনু প্রাবিশন্ ॥২৭॥

8.28

আস্তেয়ীশ্চ বাস্তেয়ীশ্চ ত্বরণাঃ কৃপণাশ্চ যাঃ ।
গুহ্যাঃ শুক্রা স্থূলা অপস্তা বীভত্সাবসাদয়ন্ ॥২৮॥

8.29

অস্থি কৃত্বা সমিধং তদষ্টাপো অসাদয়ন্।
রেতঃ কৃত্বাজ্যং দেবাঃ পুরুষমাবিশন্ ॥২৯॥

8.30

যা আপো যাশ্চ দেবতা যা বিরাড্ ব্রহ্মণা সহ।
শরীরং ব্রহ্ম প্রাবিশচ্ছরীরেঽধি প্রজাপতিঃ ॥৩০॥

8.31

সূর্যশ্চক্ষুর্বাতঃ প্রাণং পুরুষস্য বি ভেজিরে ।
অথাস্যেতরমাত্মানং দেবাঃ প্রায়চ্ছন্নগ্নয়ে ॥৩১॥

8.32

তস্মাদ্ বৈ বিদ্বান্ পুরুষমিদং ব্রহ্মেতি মন্যতে ।
সর্বা হ্যঽস্মিন্ দেবতা গাবো গোষ্ঠ ইবাসতে ॥৩২॥

8.33

প্রথমেন প্রমারেণ ত্রেধা বিষ্বঙ্ বি গচ্ছতি ।
অদ একেন গচ্ছত্যদ একেন গচ্ছতীহৈকেন নি ষেবতে ॥৩৩॥

8.34

অপ্সু স্তীমাসু বৃদ্ধাসু শরীরমন্তরা হিতম্।
তস্মিংছবোঽধ্যন্তরা তস্মাচ্ছবোঽধ্যুচ্যতে ॥৩৪॥