সূক্ত 3

3.1

সপত্নত্ক্ষয়ণো বরণমণিঃ। ১-২৫ অথর্বা। বরণমণিঃ, বনস্পতিঃ চন্দ্রমাঃ। অনুষ্টুপ্, ২-৩, ৬ ভুরিক্ ত্রিষ্টুপ্, ৮, ১৩-১৪ পথ্যাপঙ্ক্তিঃ, ১১, ১৬ ভুরিক্, ১৫, ১৭-২৫ ষট্-পদা জগতী।

অয়ং মে বরণো মণিঃ সপত্নক্ষয়ণো বৃষা ।
তেনা রভস্ব ত্বং শত্রূন্ প্র মৃণীহি দুরস্যতঃ ॥১॥

3.2

প্রৈণান্ছৃণীহি প্র মৃণা রভস্ব মণিস্তে অস্তু পুরএতা পুরস্তাৎ।
অবারয়ন্ত বরণেন দেবা অভ্যাচারমসুরাণাং শ্বঃশ্বঃ ॥২॥

3.3

অয়ং মণির্বরণো বিশ্বভেষজঃ সহস্রাক্ষো হরিতো হিরণ্যয়ঃ ।
স তে শত্রূনধরান্ পাদয়াতি পূর্বস্তান্ দভ্নুহি যে ত্বা দ্বিষন্তি ॥৩॥

3.4

অয়ং তে কৃত্যাং বিততাং পৌরুষেয়াদয়ং ভয়াৎ।
অয়ং ত্বা সর্বস্মাৎ পাপাদ্ বরণো বারয়িষ্যতে ॥৪॥

3.5

বরণো বারয়াতা অয়ং দেবো বনস্পতিঃ ।
যক্ষ্মো যো অস্মিন্নাবিষ্টস্তমু দেবা অবীবরন্ ॥৫॥

3.6

স্বপ্নং সুপ্ত্বা যদি পশ্যাসি পাপং মৃগঃ সৃতিং যতি ধাবাদজুষ্টাম্।
পরিক্ষবাচ্ছকুনেঃ পাপবাদাদয়ং মণির্বরণো বারয়িষ্যতে ॥৬॥

3.7

অরাত্যাস্ত্বা নিরৃত্যা অভিচারাদথো ভয়াৎ।
মৃত্যোরোজীয়সো বধাদ্ বরণো বারয়িষ্যতে ॥৭॥

3.8

যন্মে মাতা যন্মে পিতা ভ্রাতরো যচ্চ মে স্বা যদেনশ্চকৃমা বয়ম্।
ততো নো বারয়িষ্যতেঽয়ং দেবো বনস্পতিঃ ॥৮॥

3.9

বরণেন প্রব্যথিতা ভ্রাতৃব্যা মে সবন্ধবঃ ।
অসূর্তং রজো অপ্যগুস্তে যন্ত্বধমং তমঃ ॥৯॥

3.10

অরিষ্টোঽহমরিষ্টগুরায়ুষ্মান্ত্সর্বপূরুষঃ ।
তং মায়ং বরণো মণিঃ পরি পাতু দিশোদিশঃ ॥১০॥

3.11

অয়ং মে বরণ উরসি রাজা দেবো বনস্পতিঃ ।
স মে শত্রূন্ বি বাধতামিন্দ্রো দস্যূনিবাসুরান্ ॥১১॥

3.12

ইমং বিভর্মি বরণমায়ুষ্মান্ছতশারদঃ ।
স মে রাষ্ট্রং চ ক্ষত্রং চ পশূনোজশ্চ মে দধৎ ॥১২॥

3.13

যথা বাতো বনস্পতীন্ বৃক্ষান্ ভনক্ত্যোজসা ।
এবা সপত্নান্ মে ভঙ্গ্ধি পূর্বান্ জাতাং উতাপরান্ বরণস্ত্বাভি রক্ষতু ॥১৩॥

3.14

যথা বাতশ্চাগ্নিশ্চ বৃক্ষান্ প্সাতো বনস্পতীন্।
এবা সপত্নান্ মে প্সাহি পূর্বান্ জাতাং উতাপরান্ বরণস্ত্বাভি রক্ষতু ॥১৪॥

3.15

যথা বাতেন প্রক্ষীণা বৃক্ষাঃ শেরে ন্যঽর্পিতাঃ ।
এবা সপত্নাংস্ত্বং মম প্র ক্ষিণীহি ন্যঽর্পয় পূর্বান্জাতাং
উতাপরান্ বরণস্ত্বাভি রক্ষতু ॥১৫॥

3.16

তাংস্ত্বং প্র চ্ছিন্দ্ধি বরণ পুরা দিষ্টাৎ পুরায়ুষঃ ।
য এনং পশুষু দিপ্সন্তি যে চাস্য রাষ্ট্রদিপ্সবঃ ॥১৬॥

3.17

যথা সূর্যো অতিভাতি যথাস্মিন্ তেজ আহিতম্।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥১৭॥

3.18

যথা যশশ্চন্দ্রমস্যাদিত্যে চ নৃচক্ষসি ।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥১৮॥

3.19

যথা যশঃ পৃথিব্যাং যথাস্মিন্ জাতবেদসি ।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥১৯॥

3.20

যথা যশঃ কন্যাঽয়াং যথাস্মিন্ত্সংভৃতে রথে ।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥২০॥

3.21

যথা যশঃ সোমপীথে মধুপর্কে যথা যশঃ ।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥২১॥

3.22

যথা যশোঽগ্নিহোত্রে বষট্কারে যথা যশঃ ।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥২২॥

3.23

যথা যশো যজমানে যথাস্মিন্ যজ্ঞ আহিতম্।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥২৩॥

3.24

যথা যশঃ প্রজাপতৌ যথাস্মিন্ পরমেষ্ঠিনি ।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥২৪॥

3.25

যথা দেবেষ্বমৃতং যথৈষু সত্যমাহিতম্।
এবা মে বরণো মণিঃ কীর্তিং ভূতিং নি যচ্ছতু
তেজসা মা সমুক্ষতু যশসা সমনক্তু মা ॥২৫॥