সূক্ত 2

2.1

ব্রহ্মপ্রকাশনম্। ১-৩৩ নারায়ণঃ। পার্ষ্ণিসূক্তম্, পুরুষঃ, ব্রহ্মপ্রকাশনম্। অনুষ্টুপ্, ১-৪,৭-৮ ত্রিষ্টুপ্, ৬, ১১ জগতী, ২৮ ভুরিগ্বৃহতী।

কেন পার্ষ্ণী আভৃতে পূরুষস্য কেন মাংসং সংভৃতং কেন গুল্ফৌ।
কেনাঙ্গুলীঃ পেশনীঃ কেন খানি কেনোচ্ছ্লঙ্খৌ মধ্যতঃ কঃ প্রতিষ্ঠাম্ ॥১॥

2.2

কস্মান্নু গুল্ফাবধরাবকৃণ্বন্নষ্ঠীবন্তাবুত্তরৌ পুরুষস্য ।
জঙ্ঘে নিরঋত্য ন্যঽদধুঃ ক্বঽস্বিজ্জানুনোঃ সংধী ক উ তচ্চিকেত ॥২॥

2.3

চতুষ্টয়ং যুজ্যতে সংহিতান্তং জানুভ্যামূর্ধ্বং শিথিরং কবন্ধম্।
শ্রোণী যদূরূ ক উ তজ্জজান যাভ্যাং কুসিন্ধং সুদৃঢং বভূব ॥৩॥

2.4

কতি দেবাঃ কতমে ত আসন্ য উরো গ্রীবাশ্চিক্যুঃ পুরুষস্য ।
কতি স্তনৌ ব্যঽদধুঃ কঃ কফোডৌ কতি স্কন্ধান্ কতি পৃষ্টীরচিন্বন্ ॥৪॥

2.5

কো অস্য বাহূ সমভরদ্ বীর্যং করবাদিতি ।
অংসৌ কো অস্য তদ্ দেবঃ কুসিন্ধে অধ্যা দধৌ ॥৫॥

2.6

কঃ সপ্ত খানি বি ততর্দ শীর্ষাণি কর্ণাবিমৌ নাসিকে চক্ষণী মুখম্।
যেষাং পুরুত্রা বিজয়স্য মহ্ননি চতুষ্পাদো দ্বিপদো যন্তি যামম্ ॥৬॥

2.7

হন্বোর্হি জিহ্বামদধাৎ পুরূচীমধা মহীমধি শিশ্রায় বাচম্।
স আ বরীবর্তি ভুবনেষ্বন্তরপো বসানঃ ক উ তচ্চিকেত ॥৭॥

2.8

মস্তিষ্কমস্য যতমো ললাটং ককাটিকাং প্রথমো যঃ কপালম্।
চিত্বা চিত্যং হন্বোঃ পূরুষস্য দিবং রুরোহ কতমঃ স দেবঃ ॥৮॥

2.9

প্রিয়াপ্রিয়াণি বহুলা স্বপ্নং সংবাধতন্দ্যঃ ।
আনন্দানুগ্রো নন্দাংশ্চ কস্মাদ্ বহতি পূরুষঃ ॥৯॥

2.10

আর্তিরবর্তির্নিরৃতিঃ কুতো নু পুরুষেঽমতিঃ ।
রাদ্ধিঃ সমৃদ্ধিরব্যৃদ্ধির্মতিরুদিতয়ঃ কুতঃ ॥১০॥

2.11

কো অস্মিন্নাপো ব্যঽদধাদ্ বিষূবৃতঃ পুরূবৃতঃ সিন্ধুসৃত্যায় জাতাঃ ।
তীব্রা অরুণা লোহিনীস্তাম্রধূম্রা ঊর্ধ্বা অবাচীঃ পুরুষে তিরশ্চীঃ ॥১১॥

2.12

কো অস্মিন্ রূপমদধাৎ কো মহ্মানং চ নাম চ ।
গাতুং কো অস্মিন্ কঃ কেতুং কশ্চরিত্রাণি পূরুষে ॥১২॥

2.13

কো অস্মিন্ প্রাণমবয়ৎ কো অপানং ব্যানমু ।
সমানমস্মিন্ কো দেবোঽধি শিশ্রায় পুরুষে ॥১৩॥

2.14

কো অস্মিন্ যজ্ঞমদধাদেকো দেবোঽধি পুরুষে ।
কো অস্মিন্ত্সত্যং কোঽনৃতং কুতো মৃত্যৃঃ কুতোঽমৃতম্ ॥১৪॥

2.15

কো অস্মৈ বাসঃ পর্যদধাৎ কো অস্যায়ুরকল্পয়ৎ।
বলং কো অস্মৈ প্রায়চ্ছৎ কো অস্যাকল্পয়জ্জবম্ ॥১৫॥

2.16

কেনাপো অন্বতনুত কেনাহরকরোদ্ রুচে।
উষসং কেনান্বৈন্দ্ধ কেন সায়ংভবং দদে ॥১৬॥

2.17

কো অস্মিন্ রেতো ন্যঽদধাৎ তন্তুরা তায়তামিতি ।
মেধাং কো অস্মিন্নধ্যৌহৎ কো বাণং কো নৃতো দধৌ ॥১৭॥

2.18

কেনেমাং ভূমিমৌর্ণোৎ কেন পর্যভবদ্ দিবম্।
কেনাভি মহ্না পর্বতান্ কেন কর্মাণি পুরুষঃ ॥১৮॥

2.19

কেন পর্জন্যমন্বেতি কেন সোমং বিচক্ষণম্।
কেন যজ্ঞং চ শ্রদ্ধাং চ কেনাস্মিন্ নিহিতং মনঃ ॥১৯॥

2.20

কেন শ্রোত্রিয়মাপ্নোতি কেনেমং পরমেষ্ঠিনম্।
কেনেমমগ্নিং পূরুষঃ কেন সংবত্সরং মমে ॥২০॥

2.21

ব্রহ্ম শ্রোত্রিয়মাপ্নোতি ব্রহ্মেমং পরমেষ্ঠিনম্।
ব্রহ্মেমমগ্নিং পূরুষো ব্রহ্ম সংবত্সরং মমে ॥২১॥

2.22

কেন দেবাঁ অনু ক্ষিয়তি কেন দৈবজনীর্বিশঃ ।
কেনেদমন্যন্নক্ষত্রং কেন সত্ক্ ক্ষত্রমুচ্যতে ॥২২॥

2.23

ব্রহ্ম দেবাঁ অনু ক্ষিয়তি ব্রহ্ম দৈবজনীর্বিশঃ ।
ব্রহ্মেদমন্যন্নক্ষত্রং ব্রহ্ম সৎ ক্ষত্রমুচ্যতে ॥২৩॥

2.24

কেনেয়ং ভূমির্বিহিতা কেন দ্যৌরুত্তরা হিতা।
কেনেদমূর্ধ্বং তির্যক্ চান্তরিক্ষং ব্যচো হিতম্ ॥২৪॥

2.25

ব্রহ্মণা ভূমির্বিহিতা ব্রহ্ম দ্যৌরুত্তরা হিতা।
ব্রহ্মেদমূর্ধ্বং তির্যক্ চান্তরিক্ষং ব্যচো হিতম্ ॥২৫॥

2.26

মূর্ধানমস্য সংসীব্যাথর্বা হৃদয়ং চ যৎ।
মস্তিষ্কাদূর্ধ্বঃ প্রৈরয়ৎ পবমানোঽধি শীর্ষতঃ ॥২৬॥

2.27

তদ্ বা অথর্বণঃ শিরো দেবকোশঃ সমুব্জিতঃ ।
তৎ প্রাণো অভি রক্ষতি শিরো অন্নমথো মনঃ ॥২৭॥

2.28

ঊর্ধ্বো নু সৃষ্টা৩স্তির্যঙ্ নু সৃষ্টাঃ৩ সর্বা দিশঃ পুরুষ আ বভূবাঁ৩ ।
পুরং যো ব্রহ্মণো বেদ যস্যাঃ পুরুষ উচ্যতে ॥২৮॥

2.29

যো বৈ তাং ব্রহ্মণো বেদামৃতেনাবৃতাং পুরম্।
তস্মৈ ব্রহ্ম চ ব্রাহ্মাশ্চ চক্ষুঃ প্রাণং প্রজাং দদুঃ ॥২৯॥

2.30

ন বৈ তং চক্ষুর্জহাতি ন প্রাণো জরসঃ পুরা।
পুরং যো ব্রহ্মণো বেদ যস্যাঃ পুরুষ উচ্যতে ॥৩০॥

2.31

অষ্টাচক্রা নবদ্বারা দেবানাং পূরয়োধ্যা।
তস্যাং হিরণ্যয়ঃ কোশঃ স্বর্গো জ্যোতিষাবৃতঃ ॥৩১॥

2.32

তস্মিন্ হিরণ্যয়ে কোশে ত্র্যঽরে ত্রিপ্রতিষ্ঠিতে ।
তস্মিন্ যদ্ যক্ষমাত্মন্বৎ তদ্ বৈ ব্রহ্মবিদো বিদুঃ ॥৩২॥

2.33

প্রভ্রাজমানাং হরিণীং যশসা সংপরীবৃতাম্।
পুরং হিরণ্যয়ীং ব্রহ্মা বিবেশাপরাজিতাম্ ॥৩৩॥