सूक्त 107

107.1

विश्वजित्। १-४ शन्तातिः। विश्वजित्। अनुष्टुप्।

विश्व॑जित् त्रायमा॒णायै॑ मा॒ परि॑ देहि ।
त्राय॑माणे द्वि॒पाच्च॒ सर्वं॑ नो॒ रक्ष॒ चतु॑ष्पा॒द् यच्च॑ नः॒ स्वम् ॥१॥

107.2

त्राय॑माणे विश्व॒जिते॑ मा॒ परि॑ देहि ।
विश्व॑जिद् द्वि॒पाच्च॒ सर्वं॑ नो॒ रक्ष॒ चतु॑ष्पाद् यच्च॑ नः॒ स्वम् ॥२॥

107.3

विश्व॑जित् कल्या॒ण्यैऽ मा॒ परि॑ देहि ।
कल्या॑णि द्वि॒पाच्च॒ सर्वं॑ नो॒ रक्ष॒ चतु॑ष्पाद् यच्च॑ नः॒ स्वम् ॥३॥

107.4

कल्या॑णि सर्व॒विदे॑ मा॒ परि॑ देहि ।
सर्व॑विद् द्वि॒पाच्च॒ सर्वं॑ नो॒ रक्ष॒ चतु॑ष्पाद् यच्च॑ नः॒ स्वम् ॥४॥