UtshovAdhyaya 38
38.1
दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आ द॒देऽदि॑त्यै॒ रास्ना॑ऽसि ॥१॥
Devasya tva savituh prasaveshvinorbahubhyam pushno hastabhyam
A dadedityai rasnasi
38.2
इड॒ एह्यदि॑त॒ एहि॒ सर॑स्व॒त्त्येहि॑ । असा॒वेह्यसा॒वेह्यसा॒वेहि॑ ॥२॥
Ida ehyadita ehi sarasvattyehi, asavehyasavehyasavehi
38.3
अदि॑त्यै॒ रास्ना॑ऽसीन्द्रा॒ण्या उ॒ष्णीष॑ः ।
पू॒षाऽसि॑ घ॒र्माय॑ दीष्व ॥३॥
Adityai rasnasindranya ushnishah
Pushasi gharmaya dishva
38.4
अ॒श्विभ्यां॑ पिन्वस्व॒ सर॑स्वत्यै पिन्व॒स्वेन्द्रा॑य पिन्वस्व ।
स्वाहेन्द्र॑व॒त् स्वाहेन्द्र॑व॒त् स्वाहेन्द्र॑व॒त् ॥४॥
Ashvibhyam pinvasva sarasvatyai pinvasvendraya pinvasva
Svahendravat svahendravat svahendravat
38.5
यस्ते॒ स्तन॑ः शश॒यो यो म॑यो॒भूर्यो र॑त्न॒धा व॑सु॒विद्यः सु॒दत्र॑ः ।
येन॒ विश्वा॒ पुष्य॑सि॒ वार्या॑णि॒ सर॑स्वति॒ तमि॒ह धात॑वेऽकः । उ॒र्वन्तरि॑क्ष॒मन्वे॑मि ॥५॥
Yaste stanah shashayo yo mayobhuryo ratnadha vasuvidyah sudatrah
Yena vishva pushyasi varyani sarasvati tamiha dhatavekah, urvantarikshamanvemi
38.6
गा॒य॒त्रं छन्दो॑ऽसि॒ त्रै॑ष्टुभं॒ छन्दो॑ऽसि॒ द्यावा॑पृथि॒वीभ्यां॑ त्वा॒ परि॑ गृह्णाम्य॒न्तरि॑क्षे॒णोप॑ यच्छामि ।
इन्द्रा॑श्विना॒ मधु॑नः सार॒घस्य॑ घ॒र्मं पा॑त॒ वस॑वो॒ यज॑त॒ वाट् ।
स्वाहा॒ सूर्य॑स्य र॒श्मये॑ वृष्टि॒वन॑ये ॥६॥
Gayatram chhandosi traishtubham chhandosi dyavaprithivibhyam tva pari grihnamyantarikshenopa yachchhami
Indrashvina madhunah saraghasya gharmam pata vasavo yajata vat
Svaha suryasya rashmaye vrishtivanaye
38.7
स॒मु॒द्राय॑ त्वा॒ वाता॑य॒ स्वाहा॑ सरि॒राय॑ त्वा॒ वाता॑य॒ स्वाहा॑ ।
अ॒ना॒धृ॒ष्याय॑ त्वा॒ वाता॑य॒ स्वाहा॑ ऽप्रतिधृ॒ष्याय॑ त्वा॒ वाता॑य॒ स्वाहा॑ ।
अ॒व॒स्यवे॑ त्वा॒ वाता॑य॒ स्वाहा॑ ऽशिमि॒दाय॑ त्वा॒ वाता॑य॒ स्वाहा॑ ॥७॥
Samudraya tva vataya svaha sariraya tva vataya svaha
Anadhrishyaya tva vataya svaha pratidhrishyaya tva vataya svaha
Avasyave tva vataya svaha shimidaya tva vataya svaha
38.8
इन्द्रा॑य त्वा॒ वसु॑मते रु॒द्रव॑ते॒ स्वाहेन्द्रा॑य त्वाऽऽदि॒त्यव॑ते॒ स्वाहेन्द्रा॑य त्वाऽभिमाति॒घ्ने स्वाहा ।
स॒वि॒त्रे त्व॑ ऋभु॒मते॑ विभु॒मते॒ वाज॑वते॒ स्वाहा॒ बृह॒स्पत॑ये त्वा वि॒श्वदे॑व्यावते॒ स्वाहा॑ ॥८॥
Indraya tva vasumate rudravate svahendraya tvadityavate svahendraya tvabhimatighne svaha
Savitre tva ribhumate vibhumate vajavate svaha brihaspataye tva vishvadevyavate svaha
38.9
य॒माय॒ त्वाऽङ्गि॑रस्वते पितृ॒मते॒ स्वाहा॑ । स्वाहा॑ घ॒र्माय॒ स्वाहा॑ घ॒र्मः पि॒त्रे ॥९॥
Yamaya tvangirasvate pitrimate svaha, svaha gharmaya svaha gharmah pitre
38.10
विश्वा॒ आशा॑ दक्षिण॒सद्विश्वा॑न् दे॒वानया॑डि॒ह ।
स्वाहा॑कृतस्य घ॒र्मस्य॒ मधो॑ः पिबतमश्विना ॥१०॥
Vishva asha dakshinasadvishvan devanayadiha
Svahakritasya gharmasya madhoh pibatamashvina
38.11
दि॒वि धा॑ इ॒मं य॒ज्ञमि॒मं य॒ज्ञं दि॒वि धा॑ः । स्वाहा॒ऽग्नये॑ य॒ज्ञिया॑य॒ शं यजु॑र्भ्यः ॥११॥
Divi dha imam yagyamimam yagyam divi dhah, svahagnaye yagyiyaya sham yajurbhyah
38.12
अश्वि॑ना घ॒र्मं पा॑त॒ᳪ हार्द्वा॑न॒मह॑र्दि॒वाभि॑रू॒तिभि॑ः । तन्त्रा॒यिणे॒ नमो॒ द्यावा॑पृथि॒वीभ्या॑म् ॥१२॥
Ashvina gharmam patam hardvanamahardivabhirutibhih, tantrayine namo dyavaprithivibhyam
38.13
अपा॑ताम॒श्विना॑ घ॒र्ममनु॒ द्यावा॑पृथि॒वी अ॑मᳪसाताम् । इहै॒व रा॒तय॑ः सन्तु ॥१३॥
Apatamashvina gharmamanu dyavaprithivi amansatam, ihaiva ratayah santu
38.14
इ॒षे पि॑न्वस्वो॒र्जे पि॑न्वस्व॒ ब्रह्म॑णे पिन्वस्व क्ष॒त्राय॑ पिन्वस्व॒ द्यावा॑पृथि॒वीभ्यां॑ पिन्वस्व ।
धर्मा॑सि सु॒धर्मामे॑न्य॒स्मे नृ॒म्णानि॑ धारय॒ ब्रह्म॑ धारय क्ष॒त्रं धा॑रय॒ विशं॑ धारय ॥१४॥
Ishe pinvasvorje pinvasva brahmane pinvasva kshatraya pinvasva dyavaprithivibhyam pinvasva
Dharmasi sudharmamenyasme nrimnani dharaya brahma dharaya kshatram dharaya visham dharaya
38.15
स्वाहा॑ पू॒ष्णे शर॑से॒ स्वाहा॒ ग्राव॑भ्यः स्वाहा॑ प्रतिर॒वेभ्य॑ः ।
स्वाहा॑ पि॒तृभ्य॑ ऊ॒र्ध्वब॑र्हिर्भ्यो घर्म॒पाव॑भ्य॒ः स्वाहा॒ द्यावा॑पृथि॒वीभ्या॒ᳪ स्वाहा॒ विश्वे॑भ्यो दे॒वेभ्य॑ः ॥१५॥
Svaha pushne sharase svaha gravabhyah svaha pratiravebhyah
Svaha pitribhya urdhvabarhirbhyo gharmapavabhyah svaha dyavaprithivibhyam svaha vishvebhyo devebhyah
38.16
स्वाहा॑ रु॒द्राय॑ रु॒द्रहू॑तये॒ स्वाहा॒ सं ज्योति॑षा॒ ज्योति॑ः ।
अह॑ः के॒तुना॑ जुषताᳪ सु॒ज्योति॒र्ज्योति॑षा॒ स्वाहा॑ ।
रात्रि॑ः के॒तुना॑ जुषताᳪ सु॒ज्योति॒र्ज्योति॑षा॒ स्वाहा॑ ।
मधु॑ हु॒तमिन्द्र॑तमे अ॒ग्नाव॒श्याम॑ ते देव॒ घर्म॒ नम॑स्ते अस्तु॒ मा मा॑ हिᳪसीः ॥१६॥
Svaha rudraya rudrahutaye svaha sam jyotisha jyotih
Ahah ketuna jushatam sujyotirjyotisha svaha
Ratrih ketuna jushatam sujyotirjyotisha svaha
Madhu hutamindratame agnavashyama te deva gharma namaste astu ma ma hinsih
38.17
अ॒भीमं म॑हि॒मा दिवं॒ विप्रो॑ बभूव स॒प्रथा॑ः ।
उ॒त श्रव॑सा पृथि॒वीᳪ सᳪ सी॑दस्व म॒हाँ२ अ॑सि॒ रोच॑स्व देव॒वीत॑मः ॥१७॥
Abhimam mahima divam vipro babhuva saprathah
Uta shravasa prithivim sam sidasva mahan2 asi rochasva devavitamah
38.18
या ते॑ घर्म दि॒व्या शुग्या गा॑य॒त्र्याᳪ ह॑वि॒र्धाने॑ ।
सा त॒ आ प्या॑यतां॒ निष्टया॑यतां॒ तस्यै॑ ते॒ स्वाहा॑ ।
या ते॑ घर्मा॒न्तरि॑क्षे॒ शुग्या त्रि॒ष्टुभ्याग्नी॑ध्रे ।
सा त॒ आ प्या॑यतां॒ निष्टया॑यतां॒ तस्यै॑ ते॒ स्वाहा॑ ।
या ते॑ घर्म पृथि॒व्याᳪ शुग्या जग॑त्याᳪ सद॒स्या॒ ।
सा त॒ आ प्या॑यतां॒ निष्टया॑यतां॒ तस्यै॑ ते॒ स्वाहा॑ ॥१८॥
Ya te gharma divya shugya gayatryam havirdhane
Sa ta a pyayatam nishtayayatam tasyai te svaha
Ya te gharmantarikshe shugya trishtubhyagnidhre
Sa ta a pyayatam nishtayayatam tasyai te svaha
Ya te gharma prithivyam shugya jagatyam sadasya
Sa ta a pyayatam nishtayayatam tasyai te svaha
38.19
क्ष॒त्रस्य॑ त्वा प॒रस्पा॑य॒ ब्रह्म॑णस्त॒न्वं॒ पाहि ।
विश॑स्त्वा॒ धर्म॑णा व॒यमनु॑ क्रामाम सुवि॒ताय॒ नव्य॑से ॥१९॥
Kshatrasya tva paraspaya brahmanastanvam pahi
Vishastva dharmana vayamanu kramama suvitaya navyase
38.20
चतु॑ः स्रक्ति॒र्नाभि॑रृ॒तस्य॑ स॒प्रथा॒ः स नो॑ वि॒श्वायु॑ः स॒प्रथा॒ः स नः स॒र्वायु॑ः स॒प्रथा॑ः ।
अप॒ द्वेषो॒ अप॒ ह्वरो॒ऽन्यव्र॑तस्य सश्चिम ॥२०॥
Chatuh sraktirnabhirritasya saprathah sa no vishvayuh saprathah sa nah sarvayuh saprathah
Apa dvesho apa hvaronyavratasya sashchima
38.21
घर्मै॒तत्ते॒ पुरी॑षं॒ तेन॒ वर्ध॑स्व॒ चा च॑ प्यायस्व । व॒र्धि॒षी॒महि॑ च व॒यमा च॑ प्यासिषीमहि ॥२१॥
Gharmaitatte purisham tena vardhasva cha cha pyayasva, vardhishimahi cha vayama cha pyasishimahi
38.22
अचि॑क्रद॒द्वृषा॒ हरि॑र्म॒हान्मि॒त्रो न॑ दर्श॒तः । सᳪ सूर्ये॑ण दिद्युतदुद॒धिर्नि॒धिः ॥२२॥
Achikradadvrisha harirmahanmitro na darshatah, sam suryena didyutadudadhirnidhih
38.23
सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान् द्वेष्टि॒ यं च॑ व॒यं द्वि॒ष्मः ॥२३॥
Sumitriya na apa oshadhayah santu durmitriyastasmai santu yosman dveshti yam cha vayam dvishmah
38.24
उद्व॒यं तम॑स॒स्परि॒ स्वः पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ॥२४॥
Udvayam tamasaspari svah pashyanta uttaram, devam devatra suryamaganma jyotiruttamam
38.25
एधो॑ऽस्येधिषी॒महि॑ स॒मिद॑सि॒ तेजो॑ऽसि॒ तेजो॒ मयि॑ धेहि ॥२५॥
Edhosyedhishimahi samidasi tejosi tejo mayi dhehi
38.26
याव॑ती॒ द्यावा॑पृथि॒वी याव॑च्च स॒प्त सिन्ध॑वो वितस्थि॒रे ।
तव॑न्तमिन्द्र ते॒ ग्रह॑मू॒र्जा गृ॑ह्णा॒म्यक्षि॑तं॒ मयि॑ गृह्णा॒म्यक्षि॑तम् ॥२६॥
Yavati dyavaprithivi yavachcha sapta sindhavo vitasthire
Tavantamindra te grahamurja grihnamyakshitam mayi grihnamyakshitam
38.27
मयि॒ त्यदि॑न्द्रि॒यं बृ॒हन्मयि॒ दक्षो॒ मयि॒ क्रतु॑ः ।
घ॒र्मस्त्रि॒शुग्वि रा॑जति वि॒राजा॒ ज्योति॑षा स॒ह ब्रह्म॑णा॒ तेज॑सा स॒ह ॥२७॥
Mayi tyadindriyam brihanmayi daksho mayi kratuh
Gharmastrishugvi rajati viraja jyotisha saha brahmana tejasa saha
38.28
पय॑सो॒ रेत॒ आभृ॑तं॒ तस्य॒ दोह॑मशीम॒ह्युत्त॑रामुत्तरा॒ᳪ समा॑म् ।
त्विष॑ः सं॒वृक् क्रत्वे॒ दक्ष॑स्य ते सुषु॒म्णस्य॑ ते सुषुम्णाग्निहु॒तः ।
इन्द्र॑पीतस्य प्र॒जाप॑तिभक्षितस्य॒ मधु॑मत॒ उप॑हूत॒ उप॑हूतस्य भक्षयामि ॥२८॥
Payaso reta abhritam tasya dohamashimahyuttaramuttaram samam
Tvishah sanvrik kratve dakshasya te sushumnasya te sushumnagnihutah
Indrapitasya prajapatibhakshitasya madhumata upahuta upahutasya bhakshayami