UtshovAdhyaya 11
11.1
अथ द्वितीयो दशकः ॥२॥
Atha dvitiyo dashakah
11.2
अथ प्रथमोऽध्यायः (अथैकादशोऽध्यायः)
ए॒ष ते॑ निरृते भा॒गस्तं जु॑षस्व॒ स्वाहा॒ऽग्निने॑त्रेभ्यो दे॒वेभ्यः॑ पुरः॒सद्भ्यः॒ स्वाहा॑
य॒मने॑त्रेभ्यो दे॒वेभ्यो॑ दक्षिण॒सद्भ्यः॒ स्वाहा॑ ।
वि॒श्वदे॑वनेत्रेभ्यो दे॒वेभ्यः॑ पश्चा॒त्सद्भ्यः॒ स्वाहा॑ मि॒त्रावरु॑णनेत्रेभ्यो
वा म॒रुन्ने॑त्रेभ्यो वा दे॒वेभ्य॑ उत्तर॒सद्भ्यः॒ स्वाहा॑ ।
सोम॑नेत्रेभ्यो दे॒वेभ्य॑ उपरि॒सद्भ्यो॒ दुव॑स्वद्भ्यः॒ स्वाहा॑ ॥११॥
Atha prathamodhyayah (athaikadashodhyayah)
Esha te nirrite bhagastam jushasva svahagninetrebhyo devebhyah purahsadbhyah svaha
Yamanetrebhyo devebhyo dakshinasadbhyah svaha
Vishvadevanetrebhyo devebhyah pashchatsadbhyah svaha mitravarunanetrebhyo
Va marunnetrebhyo va devebhya uttarasadbhyah svaha
Somanetrebhyo devebhya uparisadbhyo duvasvadbhyah svaha
11.3
ये दे॒वा अ॒ग्निने॑त्राः पुरः॒सद॒स्तेभ्यः॒ स्वाहा॒ ये दे॒वा य॒मने॑त्रा दक्षिण॒सद॒स्तेभ्यः॒ स्वाहा॑ ।
ये दे॒वा वि॒श्वदे॑वनेत्राः पश्चा॒त्सद॒स्तेभ्यः॒ स्वाहा॑ ये दे॒वा मि॒त्रावरु॑णनेत्रा वा म॒रुन्ने॑त्रा वोत्तर॒सद॒स्तेभ्यः॒ स्वाहा॑ ।
ये दे॒वाः सोम॑नेत्रा उपरि॒सदो॒ दुव॑स्वन्त॒स्तेभ्यः॒ स्वाहा॑ ॥२॥
Ye deva agninetrah purahsadastebhyah svaha ye deva yamanetra dakshinasadastebhyah svaha
Ye deva vishvadevanetrah pashchatsadastebhyah svaha ye deva mitravarunanetra va marunnetra vottarasadastebhyah svaha
Ye devah somanetra uparisado duvasvantastebhyah svaha
11.4
अग्ने॒ सह॑स्व॒ पृत॑ना अ॒भिमा॑ती॒रपा॑स्य । दु॒ष्टर॒स्तर॒न्नरा॑ती॒र्वर्चो॑ धा य॒ज्ञवा॑हसि ।
दे॒वस्य॑ त्वा सवि॒तुः प्र॑स॒वे॒ऽश्विनो॑र्बा॒हुभ्यां॑ पू॒ष्णो हस्ता॑भ्याम् ॥३॥
Agne sahasva pritana abhimatirapasya, dushtarastarannaratirvarcho dha yagyavahasi
Devasya tva savituh prasaveshvinorbahubhyam pushno hastabhyam
11.5
उ॒पा॒ᳪशोर्वी॒र्ये॑ण जुहोमि ह॒तᳪ रक्षः॒ स्वाहा॑ । रक्ष॑सां त्वा व॒धायाव॑धिष्म॒ रक्षो॒ऽमुष्य॑ त्वा व॒धाया॒मुम॑वधिष्म ।
जुषाणोऽध्वाज्यस्य वेतु स्वाहा ॥४॥
Upanshorviryena juhomi hatam rakshah svaha, rakshasam tva vadhayavadhishma rakshomushya tva vadhayamumavadhishma
Jushanodhvajyasya vetu svaha
11.6
(१) ४
अ॒पो दे॒वा मधु॑मतीरगृभ्ण॒न्नूर्ज॑स्वती राज॒स्व॒श्चिता॑नाः ।
याभि॑र्मि॒त्रावरु॑णा अ॒भ्यषि॑ञ्च॒न्याभि॒रिन्द्र॒मन॑य॒न्नत्यरा॑तीः ॥१॥
(1) 4
Apo deva madhumatiragribhnannurjasvati rajasvashchitanah
Yabhirmitravaruna abhyashinchanyabhirindramanayannatyaratih
11.7
वृष्ण॑ ऊ॒र्मिर॑सि राष्ट्र॒दा रा॒ष्ट्रं मे॑ देहि॒ स्वाहा॒ वृष्ण॑ ऊ॒र्मिर॑सि राष्ट्र॒दा रा॒ष्ट्रम॒मुष्मै॑ देहि ।
वृ॒ष॒से॒नो॑ऽसि राष्ट्र॒दा रा॒ष्ट्रं मे॑ देहि॒ स्वाहा॑ वृषसे॒नो॑ऽसि राष्ट्र॒दा रा॒ष्ट्रम॒मुष्मै॑ देहि ॥२॥
Vrishna urmirasi rashtrada rashtram me dehi svaha vrishna urmirasi rashtrada rashtramamushmai dehi
Vrishasenosi rashtrada rashtram me dehi svaha vrishasenosi rashtrada rashtramamushmai dehi
11.8
६ (५०७)
अ॒र्थेत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒र्थेत॑ स्थ राष्ट्र॒दा रा॒ष्ट्रम॒मुष्मै॑ दत्त ।
ओज॑स्वती स्थ राष्ट्र॒दा रा॒ष्ट्रं मे॑ दत्त॒ स्वाहौज॑स्वती स्थ राष्ट्र॒दा रा॒ष्ट्रम॒मुष्मै॑ दत्त ।
आपः॑ परिवा॒हिणी॑ स्थ राष्ट्र॒दा रा॒ष्ट्रं मे॑ दत्त॒ स्वाहापः॑ परिवा॒हिणी॑ स्थ राष्ट्र॒दा रा॒ष्ट्रम॒मुष्मै॑ दत्त ।
अ॒पां पति॑रसि राष्ट्र॒दा रा॒ष्ट्रं मे॑ देहि॒ स्वाहा॒पां पति॑रसि राष्ट्र॒दा रा॒ष्ट्रम॒मुष्मै॑ देहि ।
अ॒पां गर्भो॑ऽसि राष्ट्र॒दा रा॒ष्ट्रं मे॑ देहि॒ स्वाहा॒पां गर्भो॑ऽसि राष्ट्र॒दा रा॒ष्ट्रम॒मुष्मै॑ देहि ।
सूर्य॑वर्चस स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑वर्चस स्थ राष्ट्र॒दा रा॒ष्ट्रम॒मुष्मै॑ दत्त ।
सूर्य॑त्वच स्थ राष्ट्र॒दा रा॒ष्ट्रं मे॑ दत्त॒ स्वाहा॒ सूर्य॑त्वच स्थ राष्ट्र॒दा रा॒ष्ट्रम॒मुष्मै॑ दत्त ।
व्र॒ज॒क्षित॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ व्रज॒क्षित॑ स्थ राष्ट्र॒दा रा॒ष्ट्रम॒मुष्मै॑ दत्त ।
वाशा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ वाशा॑ स्थ राष्ट्र॒दा रा॒ष्ट्रम॒मुष्मै॑ दत्त ।
मांदा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ मांदा॑ स्थ राष्ट्र॒दा रा॒ष्ट्रम॒मुष्मै॑ दत्त ।
शक्व॑री स्थ राष्ट्र॒दा रा॒ष्ट्रं मे॑ दत्त॒ स्वाहा॒ शक्व॑री स्थ राष्ट्र॒दा रा॒ष्ट्रम॒मुष्मै॑ दत्त ।
ज॒न॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ जन॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त ।
वि॒श्व॒भृत॑ स्थ राष्ट्र॒दा रा॒ष्ट्रं मे॑ दत्त॒ स्वाहा॑ विश्व॒भृत॑ स्थ राष्ट्र॒दा रा॒ष्ट्रम॒मुष्मै॑ दत्त ।
शैष्ठा॑ स्थ राष्ट्र॒दा रा॒ष्ट्रं मे॑ दत्त॒ स्वाहा॒ शैष्ठा॑ स्थ राष्ट्र॒दा रा॒ष्ट्रम॒मुष्मै॑ दत्त ।
आपः॒ स्वारा॑ज्ञी स्थ राष्ट्र॒दा रा॒ष्ट्रम॒मुष्मै॑ दत्त ॥३॥
6 (507)
Artheta stha rashtrada rashtram me datta svahartheta stha rashtrada rashtramamushmai datta
Ojasvati stha rashtrada rashtram me datta svahaujasvati stha rashtrada rashtramamushmai datta
Apah parivahini stha rashtrada rashtram me datta svahapah parivahini stha rashtrada rashtramamushmai datta
Apam patirasi rashtrada rashtram me dehi svahapam patirasi rashtrada rashtramamushmai dehi
Apam garbhosi rashtrada rashtram me dehi svahapam garbhosi rashtrada rashtramamushmai dehi
Suryavarchasa stha rashtrada rashtram me datta svaha suryavarchasa stha rashtrada rashtramamushmai datta
Suryatvacha stha rashtrada rashtram me datta svaha suryatvacha stha rashtrada rashtramamushmai datta
Vrajakshita stha rashtrada rashtram me datta svaha vrajakshita stha rashtrada rashtramamushmai datta
Vasha stha rashtrada rashtram me datta svaha vasha stha rashtrada rashtramamushmai datta
Manda stha rashtrada rashtram me datta svaha manda stha rashtrada rashtramamushmai datta
Shakvari stha rashtrada rashtram me datta svaha shakvari stha rashtrada rashtramamushmai datta
Janabhrita stha rashtrada rashtram me datta svaha janabhrita stha rashtrada rashtramamushmai datta
Vishvabhrita stha rashtrada rashtram me datta svaha vishvabhrita stha rashtrada rashtramamushmai datta
Shaishtha stha rashtrada rashtram me datta svaha shaishtha stha rashtrada rashtramamushmai datta
Apah svaragyi stha rashtrada rashtramamushmai datta
11.9
सं मधु॑मती॒र्मधु॑मतीभिः पृच्यंतां॒ महि॑ क्ष॒त्रं क्ष॒त्रिया॑य वन्वा॒नाः ।
अना॑धृष्टाः सीदत स॒हौज॑सा॒ महि॑ क्ष॒त्रं क्ष॒त्रिया॑य॒ दध॑तीः ॥४॥
Sam madhumatirmadhumatibhih prichyantam mahi kshatram kshatriyaya vanvanah
Anadhrishtah sidata sahaujasa mahi kshatram kshatriyaya dadhatih
11.10
(२) ८
स॒वि॒ता त्वा॑ प्रस॒वाना॑ᳪ सुवताम॒ग्निर्गृ॒हप॑तीना॒ᳪ सोमो॒ वन॒स्पती॑नाम् ।
बृह॒स्पति॑र्वा॒च इन्द्रो॒ ज्यैष्ठ्या॑य रु॒द्रः प॑शू॒नां मि॒त्रः स॒त्याय॒ वरु॑णो॒ धर्म॑पतीनाम् ॥१॥
(2) 8
Savita tva prasavanam suvatamagnirgrihapatinam somo vanaspatinam
Brihaspatirvacha indro jyaishthyaya rudrah pashunam mitrah satyaya varuno dharmapatinam
11.11
इ॒मं दे॑वा असप॒त्नᳪ सु॑वध्वं मह॒ते क्ष॒त्राय॑ मह॒ते ज्यै॑ष्ठ्याय।
इ॒मम॒मुम॒मुष्य॑ पु॒त्रम॒मुष्याः॑ पु॒त्रम॒स्यै वि॒शे ॥२॥
Imam deva asapatnam suvadhvam mahate kshatraya mahate jyaishthyaya
Imamamumamushya putramamushyah putramasyai vishe
11.12
ए॒ष वः॑ कुरवो॒ राजै॒ष वः॑ पञ्चाला॒ राजा॑ । सोमो॒ऽस्माकं॑ ब्राह्म॒णाना॒ᳪ राजा॑ ॥३॥
Esha vah kuravo rajaisha vah panchala raja, somosmakam brahmananam raja
11.13
(३) ११
सोम॑स्य॒ त्विषि॑रस्य॒ग्नये॒ स्वाहा॒ सोमा॑य॒ स्वाहा॑ सवि॒त्रे स्वाहा॒ सर॑स्वत्यै॒ स्वाहा॑ ।
पू॒ष्णे स्वाहा॒ बृह॒स्पत॑ये॒ स्वाहा॑ ॥१॥
(3) 11
Somasya tvishirasyagnaye svaha somaya svaha savitre svaha sarasvatyai svaha
Pushne svaha brihaspataye svaha
11.14
इंद्रा॑य॒ स्वाहाᳪशा॑य॒ स्वाहा॒ श्लोका॑य॒ स्वाहा॒ घोषा॑य॒ स्वाहा॒ भगा॑य॒ स्वाहा॑र्य॒म्णे स्वाहा॑ ।
स॒वि॒तुर्वः॑ प्रस॒व उत्पु॑ना॒म्यच्छि॑द्रेण प॒वित्रे॑ण॒ सूर्य॑स्य र॒श्मिभिः॑ ।
अनि॑भृष्टमसि वा॒चो बन्धु॑स्तपो॒जाः सोम॑स्य दा॒त्रम॑सि॒ स्वाहा॑ राज॒स्वः॑ ॥२॥
Indraya svahanshaya svaha shlokaya svaha ghoshaya svaha bhagaya svaharyamne svaha
Saviturvah prasava utpunamyachchhidrena pavitrena suryasya rashmibhih
Anibhrishtamasi vacho bandhustapojah somasya datramasi svaha rajasvah
11.15
स॒ध॒मादो॑ द्यु॒म्निनी॒राप॑ ए॒ता अना॑धृष्टा अप॒स्यो॒ वसा॑नाः ।
प॒स्त्या॑सु चक्रे॒ वरु॑णः स॒धस्थ॑म॒पाᳪ शिशु॑र्मा॒तृत॑मास्वं॒तः ॥३॥
Sadhamado dyumninirapa eta anadhrishta apasyo vasanah
Pastyasu chakre varunah sadhasthamapam shishurmatritamasvantah
11.16
क्ष॒त्रस्योल्व॑मसि क्ष॒त्रस्य॑ ज॒राय्व॑सि क्ष॒त्रस्य॒ नाभि॑रसि क्ष॒त्रस्य॒ योनि॑रसि ।
इन्द्र॑स्य॒ वात्र॑घ्नमसि॒ त्वया॒यं वृ॒त्रं व॑ध्यान्मि॒त्रस्या॑सि॒ वरु॑णस्यासि ॥४॥
Kshatrasyolvamasi kshatrasya jarayvasi kshatrasya nabhirasi kshatrasya yonirasi
Indrasya vatraghnamasi tvayayam vritram vadhyanmitrasyasi varunasyasi
11.17
रु॒जासि॑ द्रु॒वासि॑ क्षु॒पासि॑ । पा॒तैनं॒ प्राञ्चं॑ पा॒तैनं॑ प्र॒त्यञ्चं॑ पा॒तैनं॑ ति॒र्यञ्चं॑ दि॒ग्भ्यः पा॑त ॥५॥
Rujasi druvasi kshupasi, patainam prancham patainam pratyancham patainam tiryancham digbhyah pata
11.18
आ॒विर्म॑र्या॒ आवि॑त्तो अ॒ग्निर्गृ॒हप॑ति॒रावि॑त्त॒ इन्द्रो॑ वृ॒द्धश्र॑वा॒ आवि॑त्तः पू॒षा वि॒श्ववे॑दा॒ आवि॑त्तौ मि॒त्रावरु॑णौ धृ॒तव्र॑तौ ।
आवि॑त्ते॒ द्यावा॑पृथि॒वी वि॒श्वशं॑भू॒ आवि॒त्तादि॑तिरु॒रुश॑र्मा ॥६॥
Avirmarya avitto agnirgrihapatiravitta indro vriddhashrava avittah pusha vishvaveda avittau mitravarunau dhritavratau
Avitte dyavaprithivi vishvashambhu avittaditirurusharma
11.19
(४) १७ (५१८)
अवे॑ष्टा दन्द॒शूकाः॒ प्राची॒मारो॑ह गाय॒त्री त्वा॑वतु । र॒थ॒न्त॒रᳪ साम॑ त्रि॒वृत्स्तोमो॑ वस॒न्तऋ॒तुर्ब्रह्म॒ द्रवि॑णम् ॥१॥
(4) 17 (518)
Aveshta dandashukah prachimaroha gayatri tvavatu, rathantaram sama trivritstomo vasantariturbrahma dravinam
11.20
दक्षि॑णा॒मारो॑ह त्रि॒ष्टुप् त्वा॑वतु । बृ॒हत्साम॑ पञ्चद॒श स्तोमो॑ ग्री॒ष्मऋ॒तुः क्ष॒त्रं द्रवि॑णम् ॥२॥
Dakshinamaroha trishtup tvavatu, brihatsama panchadasha stomo grishmarituh kshatram dravinam
11.21
प्र॒तीची॒मारो॑ह॒ जग॑ती त्वावतु । वै॒रू॒पᳪ साम॑ सप्तद॒श स्तोमो॑ व॒र्षा ऋ॒तुर्विड् द्रवि॑णम् ॥३२॥
Pratichimaroha jagati tvavatu, vairupam sama saptadasha stomo varsha riturvid dravinam
11.22
०॥
उदी॑ची॒मारो॑हानु॒ष्टुप् त्वा॑वतु । वै॒रा॒जᳪ सामै॑कवि॒ᳪश स्तोमः॑ श॒रदृ॒तुः फलं॒ द्रवि॑णम् ॥४॥
0
Udichimarohanushtup tvavatu, vairajam samaikavinsha stomah sharadrituh phalam dravinam
11.23
ऊ॒र्ध्वामारो॑ह प॒ङ्क्तिस्त्वा॑वतु । शा॒क्व॒र॒रै॒व॒ते साम॑नी त्रिणवत्रयस्त्रि॒ᳪशौ स्तोमौ॑ हेमन्तशिशि॒रा ऋ॒तू वर्चो॒ द्रवि॑णम् ।
प्रत्य॑स्तं॒ नमु॑चेः॒ शिरः॑ ॥५॥
Urdhvamaroha panktistvavatu, shakvararaivate samani trinavatrayastrinshau stomau hemantashishira ritu varcho dravinam
Pratyastam namucheh shirah
11.24
सोम॑स्य॒ त्विषि॑रसि॒ तवे॑व मे॒ त्विषि॑र्भूयात् । मृ॒त्योः पा॒ह्योजो॑ऽसि॒ सहो॑ऽस्य॒मृत॑मसि ॥६॥
Somasya tvishirasi taveva me tvishirbhuyat, mrityoh pahyojosi sahosyamritamasi
11.25
२३॥
हिर॑ण्यरूपा उ॒षसो॑ विरो॒क उ॒भा इन्द्रा॒ उदि॑तः॒ सूर्य॑श्च ।
आरो॑हतं वरुण मित्र॒ गर्तं॒ तत॑श्चक्षाथा॒मदि॑तिं॒ दितिं॑ च । मि॒त्रो॑ऽसि॒ वरु॑णोऽसि ॥७॥
23
Hiranyarupa ushaso viroka ubha indra uditah suryashcha
Arohatam varuna mitra gartam tatashchakshathamaditim ditim cha, mitrosi varunosi
11.26
(५) २४
सोम॑स्य त्वा द्यु॒म्नेना॒भिषि॑ञ्चाम्य॒ग्नेर्भ्राज॑सा॒ सूर्य॑स्य॒ वर्च॑सा । इन्द्र॑स्येंद्रि॒येण॑ म॒रुता॒मोज॑सा क्ष॒त्राणां॑ क्ष॒त्रप॑तिरे॒ध्यति॑ दि॒द्यून्पा॑हि ॥१॥
(5) 24
Somasya tva dyumnenabhishinchamyagnerbhrajasa suryasya varchasa, indrasyendriyena marutamojasa kshatranam kshatrapatiredhyati didyunpahi
11.27
इ॒मं दे॑वा असप॒त्नᳪ सु॑वध्वं मह॒ते क्ष॒त्राय॑ मह॒ते ज्यैष्ठ्या॑य मह॒ते जान॑राज्याय ।
इ॒मम॒मुम॒मुष्य॑ पु॒त्रम॒मुष्याः॑ पु॒त्रमस्यै वि॒शे ॥२॥
Imam deva asapatnam suvadhvam mahate kshatraya mahate jyaishthyaya mahate janarajyaya
Imamamumamushya putramamushyah putramasyai vishe
11.28
ए॒ष वः॑ कुरवो॒ राजै॒ष वः॑ पञ्चाला॒ राजा॒ । सोमो॒ऽस्माकं॑ ब्राह्म॒णाना॒ᳪ राजा॑ ॥३॥
Esha vah kuravo rajaisha vah panchala raja, somosmakam brahmananam raja
11.29
प्र पर्व॑तस्य वृष॒भस्य॑ पृ॒ष्ठान्नाव॑श्चरन्ति स्व॒सिच॑ इया॒नाः। ता आव॑वृत्रन्नध॒रागुद॒क्ता अहिं॑ बु॒ध्न्य॒मनु॒ रीय॑माणाः ।
विष्णो॑र्वि॒क्रम॑णमसि॒ विष्णो॒र्विक्रा॑न्तमसि॒ विष्णोः॑ क्रा॒न्तम॑सि ॥४॥
Pra parvatasya vrishabhasya prishthannavashcharanti svasicha iyanah, ta avavritrannadharagudakta ahim budhnyamanu riyamanah
Vishnorvikramanamasi vishnorvikrantamasi vishnoh krantamasi
11.30
प्रजा॑पते॒ न त्वदे॒तान्य॒न्यो विश्वा॑ रू॒पाणि॒ परि॒ ता ब॑भूव ।
यत्का॑मास्ते जुहु॒मस्तन्नो॑ अस्तु व॒यᳪ स्या॑म॒ पत॑यो रयी॒णाम् ॥५॥
Prajapate na tvadetanyanyo vishva rupani pari ta babhuva
Yatkamaste juhumastanno astu vayam syama patayo rayinam
11.31
रुद्र॒ यत्ते॒ क्रवि॒ परं॒ नाम॒ । तस्मै॑ हु॒तम॑स्यमे॒ष्टम॑सि॒ स्वाहा॑ ॥६॥
Rudra yatte kravi param nama, tasmai hutamasyameshtamasi svaha
11.32
(६) ३०
इन्द्र॑स्य॒ वज्रो॑ऽसि मि॒त्रावरु॑णयोस्त्वा प्रशा॒स्त्रोः प्र॒शिषा॑ युनज्मि ।
अव्य॑थायै त्वा स्व॒धायै॒ त्वारि॑ष्टः॒ फल्गु॑नः । म॒रुतां॑ प्रस॒वेन॑ ज॒यापा॑म॒ मन॑सा॒ समि॑न्द्रि॒येण॑ ॥१॥
(6) 30
Indrasya vajrosi mitravarunayostva prashastroh prashisha yunajmi
Avyathayai tva svadhayai tvarishtah phalgunah, marutam prasavena jayapama manasa samindriyena
11.33
मा त॑ इंद्र ते व॒यं तु॑राषा॒ळयु॑क्तासो अब्र॒ह्मता॒ विद॑साम ।
तिष्ठा॒ रथ॒मधि॒ यद्व॑ज्रह॒स्ता र॒श्मीन्दे॑व युवसे॒ स्वश्वा॑न् ॥२॥
Ma ta indra te vayam turashalayuktaso abrahmata vidasama
Tishtha rathamadhi yadvajrahasta rashmindeva yuvase svashvan
11.34
३२ (५३३)
अ॒ग्नये॑ गृ॒हप॑तये॒ स्वाहा॒ सोमा॑य॒ वन॒स्पत॑ये॒ स्वाहा॑ । इन्द्र॑स्येन्द्रि॒याय॒ स्वाहा॑ म॒रुता॒मोज॑से॒ स्वाहा॑ ।
पृथि॑वि मात॒र्मा मा॑ हिᳪसी॒र्मो अ॒हं त्वाम् ॥३॥
32 (533)
Agnaye grihapataye svaha somaya vanaspataye svaha, indrasyendriyaya svaha marutamojase svaha
Prithivi matarma ma hinsirmo aham tvam
11.35
ह॒ᳪसः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।
नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत् ॥४॥
Hansah shuchishadvasurantarikshasaddhota vedishadatithirduronasat
Nrishadvarasadritasadvyomasadabja goja ritaja adrija ritam brihat
11.36
इय॑द॒स्यायु॑र॒स्यायु॑र्मे देहि॒ युङ्ङ॑सि॒ वर्चो॑ऽसि॒ वर्चो॑ मे देहि ।
ऊर्ग॒स्यूर्जं॒ मयि॑ धे॒हीन्द्र॑स्य वां बा॒हू वी॑र्य॒कृता॑ उ॒पाव॑हरामि ॥५॥
Iyadasyayurasyayurme dehi yunngasi varchosi varcho me dehi
Urgasyurjam mayi dhehindrasya vam bahu viryakrita upavaharami
11.37
(७) ३५
स्यो॒नासि॑ सु॒षदा॑सि क्ष॒त्रस्य॒ योनि॑रसि ।
स्यो॒नामासी॑द सु॒षदा॒मासी॑द क्ष॒त्रस्य॒ योनि॒मासी॑द ॥१॥
(7) 35
Syonasi sushadasi kshatrasya yonirasi
Syonamasida sushadamasida kshatrasya yonimasida
11.38
निष॑साद धृ॒तव्र॑तो॒ वरु॑णः प॒स्त्या॒स्वा । साम्रा॑ज्याय सु॒क्रतुः॑ ॥२॥
Nishasada dhritavrato varunah pastyasva, samrajyaya sukratuh
11.39
अ॒भि॒भूर॒स्यया॑नामे॒तास्ते॒ पञ्च॒ दिशः॑ कल्पन्ताम् । ब्रह्म॒ᳪस्त्वं ब्रह्मा॑सि ॥३॥
Abhibhurasyayanametaste pancha dishah kalpantam, brahmanstvam brahmasi
11.40
स॒वि॒तासि॑ स॒त्यप्र॑सवो॒ वरु॑णोऽसि स॒त्यौजाः॑ । इन्द्रो॑ऽसि॒ विशौ॑जा रु॒द्रो॑ऽसि सु॒शेवः॑ ॥४॥
Savitasi satyaprasavo varunosi satyaujah, indrosi vishauja rudrosi sushevah
11.41
प्रियं॑कर॒ श्रेय॑स्कर॒ भूय॑स्कर । इन्द्र॑स्य॒ वज्रो॑ऽसि॒ तेन॑ मे रध्य ॥५॥
Priyankara shreyaskara bhuyaskara, indrasya vajrosi tena me radhya
11.42
अ॒ग्निः पृ॒थुर्धर्म॑ण॒स्पति॑र्जुषा॒णो अ॒ग्निः पृ॒थुर्धर्म॑ण॒स्पतिः॑ । आज्य॑स्य ह॒विषो॑ वेतु॒ स्वाहा॑ ।
स्वाहा॑कृताः॒ सूर्य॑स्य र॒श्मिभि॑र्यतध्वᳪ सजा॒तानां॑ मध्य॒मेष्ठ्या॑य ॥६॥
Agnih prithurdharmanaspatirjushano agnih prithurdharmanaspatih, ajyasya havisho vetu svaha
Svahakritah suryasya rashmibhiryatadhvam sajatanam madhyameshthyaya
11.43
(८) ४१
स॒वि॒त्राप्र॑सवि॒त्रा सर॑स्वत्यावा॒चा ॥ त्वष्ट्रा॑ रू॒पैः पू॒ष्णा प॒शुभि॒रिन्द्रे॑णा॒स्मै ॥१॥
(8) 41
Savitraprasavitra sarasvatyavacha, tvashtra rupaih pushna pashubhirindrenasmai
11.44
बृह॒स्पति॑ना॒ ब्रह्म॑णा॒ वरु॑णे॒नौज॑सा॒ग्निना॒ तेज॑सा॒ सोमे॑न॒ राज्ञा॑ । विष्णु॑ना दे॒वत॑या दश॒म्येमं॑ य॒ज्ञं विष्णु॑माप्नवानि ॥२॥
Brihaspatina brahmana varunenaujasagnina tejasa somena ragya, vishnuna devataya dashamyemam yagyam vishnumapnavani
11.45
(९) ४३
अ॒श्विभ्यां॑ पच्यस्व॒ सर॑स्वत्यै पच्य॒स्वेन्द्रा॑य सु॒त्राम्णे॑ पच्यस्व ।
वा॒योः पू॒तः प॒वित्रे॑ण प्र॒त्यङ् सोमो॒ अति॑स्रुतः । इन्द्र॑स्य॒ युज्यः॒ सखा॑ ॥१॥
(9) 43
Ashvibhyam pachyasva sarasvatyai pachyasvendraya sutramne pachyasva
Vayoh putah pavitrena pratyang somo atisrutah, indrasya yujyah sakha
11.46
कु॒विद॒ङ्ग यव॑मन्तो॒ यवं॑ चि॒द्यथा॒ दान्त्य॑नुपू॒र्वं वि॒यूय॑ ।
इ॒हेहै॑षां कृणुहि॒ भोज॑नानि॒ ये ब॒र्हिषो॒ नम॑उक्तिं॒ न ज॒ग्मुः ।
उ॒प॒या॒मगृ॑हीतोऽस्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑ ॥२॥
Kuvidanga yavamanto yavam chidyatha dantyanupurvam viyuya
Ihehaisham krinuhi bhojanani ye barhisho namauktim na jagmuh
Upayamagrihitosyashvibhyam tva sarasvatyai tvendraya tva sutramne
11.47
यु॒वᳪ सु॒राम॑मश्विना॒ नमु॑चा आसु॒रे सचा॑ । वि॒पि॒पा॒ना शु॑भस्पती॒ इन्द्रं॒ कर्म॑स्वावतम् ॥३॥
Yuvam suramamashvina namucha asure sacha, vipipana shubhaspati indram karmasvavatam
11.48
४६ (५४७)
पु॒त्रमि॑व पि॒तरा॑ अ॒श्विनो॒भेन्द्रा॒वथुः॒ काव्यै॑र्द॒ᳪसना॑भिः ।
यत्सु॒रामं॒ व्यपि॑बः॒ शची॑भिः॒ सर॑स्वती त्वा मघवन्नभिष्णक् ॥४॥
46 (547)
Putramiva pitara ashvinobhendravathuh kavyairdansanabhih
Yatsuramam vyapibah shachibhih sarasvati tva maghavannabhishnak
11.49
(१०) ४७ (५४८)
॥इति शुक्लयजुः काण्वसंहितायां एकादशोऽध्यायः॥ (११)
(10) 47 (548)
, Iti shuklayajuh kanvasanhitayam ekadashodhyayah, (11)