Sarga 8

8.1

स तस्य मध्ये भवनस्य सम्स्थितम् ।
महद्विमानम् मणिवज्रचित्रितम् ।प्रतप्तजाम्बूनदजालकृत्रिमम् ।ददर्श वीरः पवनात्मजः कपिः ॥५-८-१॥

Sa tasya madhye bhavanasya samsthitam
Mahadvimanam manivajrachitritam, prataptajambunadajalakritrimam, dadarsha virah pavanatmajah kapih

तदप्रमेयाप्रतिकारकृत्रिमम् ।
कृतम् स्वयम् साध्विति विश्वकर्मणाः ।दिवम् गतम् वायुपथप्रतिष्ठितम् ।व्यराजतादित्यपथस्य लक्ष्मिवत् ॥५-८-२॥

Tadaprameyapratikarakritrimam
Kritam svayam sadhviti vishvakarmanah, divam gatam vayupathapratishthitam, vyarajatadityapathasya lakshmivat

न तत्र किम्चिन्न कृतम् प्रयत्नतो ।
न तत्र किम्चिन्न महर्हरत्नवत् ।न ते विशेषा नियताः सुरेष्वपि ।न तत्र किम्चिन्न महाविशेषवत् ॥५-८-३॥

Na tatra kimchinna kritam prayatnato
Na tatra kimchinna maharharatnavat, na te vishesha niyatah sureshvapi, na tatra kimchinna mahavisheshavat

तपह्समाधानपराक्रमार्जितम् ।
मनःसमाधानविचारचारिणम् ।अनेकसम्स्थानविषेषनिर्मितम् ।ततस्ततस्तुल्यविशेषदर्शनम् ॥५-८-४॥

Tapahsamadhanaparakramarjitam
Manahsamadhanavicharacharinam, anekasamsthanavisheshanirmitam, tatastatastulyavisheshadarshanam

विशेषमालम्ब्य विशेषसम्स्थितम् ।
विचित्रकूटम् बहुकूटमण्डितम् ।मनोऽभिरामम् शरद्न्दुनिर्मलम् ।विचित्रकूटम् शिखरम् गिरेर्यथा ॥५-८-५॥

Visheshamalambya visheshasamsthitam
Vichitrakutam bahukutamanditam, manobhiramam sharadndunirmalam, vichitrakutam shikharam gireryatha

वहन्ति यम् कुण्डशोभितानना ।
महाशना व्योमचरा निशाचराः ।विवृत्तविध्वस्तविशाललोचना ।महाजवा भूतगणाः सहस्रशः ॥५-८-६॥

Vahanti yam kundashobhitanana
Mahashana vyomachara nishacharah, vivrittavidhvastavishalalochana, mahajava bhutaganah sahasrashah

वसन्तपुष्पोत्करचारुदर्शनम् ।
वसन्तमासदपि कान्तदर्शनम् ।स पुष्पकम् तत्र विमानमुत्तमम् ।ददर्श तद्वानरवीरसत्तमः ॥५-८-७॥

Vasantapushpotkaracharudarshanam
Vasantamasadapi kantadarshanam, sa pushpakam tatra vimanamuttamam, dadarsha tadvanaravirasattamah