Sukta 82

82.1

5 vasurbharadvajah, pavamanah somah, jagati, 5 trishtup

असा॑वि॒ सोमो॑ अरु॒षो वृषा॒ हरी॒ राजे॑व द॒स्मो अ॒भि गा अ॑चिक्रदत् ।
पु॒ना॒नो वारं॒ पर्ये॑त्य॒व्ययं॑ श्ये॒नो न योनिं॑ घृ॒तव॑न्तमा॒सद॑म् ॥१॥

Asavi somo arusho vrisha hari rajeva dasmo abhi ga achikradat
Punano varam paryetyavyayam shyeno na yonim ghritavantamasadam

82.2

क॒विर्वे॑ध॒स्या पर्ये॑षि॒ माहि॑न॒मत्यो॒ न मृ॒ष्टो अ॒भि वाज॑मर्षसि ।
अ॒प॒सेध॑न्दुरि॒ता सो॑म मृळय घृ॒तं वसा॑न॒ः परि॑ यासि नि॒र्णिज॑म् ॥२॥

Kavirvedhasya paryeshi mahinamatyo na mrishto abhi vajamarshasi
Apasedhandurita soma mrilaya ghritam vasanah pari yasi nirnijam

82.3

प॒र्जन्य॑ः पि॒ता म॑हि॒षस्य॑ प॒र्णिनो॒ नाभा॑ पृथि॒व्या गि॒रिषु॒ क्षयं॑ दधे ।
स्वसा॑र॒ आपो॑ अ॒भि गा उ॒तास॑र॒न्त्सं ग्राव॑भिर्नसते वी॒ते अ॑ध्व॒रे ॥३॥

Parjanyah pita mahishasya parnino nabha prithivya girishu kshayam dadhe
Svasara apo abhi ga utasarantsam gravabhirnasate vite adhvare

82.4

जा॒येव॒ पत्या॒वधि॒ शेव॑ मंहसे॒ पज्रा॑या गर्भ शृणु॒हि ब्रवी॑मि ते ।
अ॒न्तर्वाणी॑षु॒ प्र च॑रा॒ सु जी॒वसे॑ऽनि॒न्द्यो वृ॒जने॑ सोम जागृहि ॥४॥

Jayeva patyavadhi sheva manhase pajraya garbha shrinuhi bravimi te
Antarvanishu pra chara su jivasenindyo vrijane soma jagrihi

82.5

यथा॒ पूर्वे॑भ्यः शत॒सा अमृ॑ध्रः सहस्र॒साः प॒र्यया॒ वाज॑मिन्दो ।
ए॒वा प॑वस्व सुवि॒ताय॒ नव्य॑से॒ तव॑ व्र॒तमन्वाप॑ः सचन्ते ॥५॥

Yatha purvebhyah shatasa amridhrah sahasrasah paryaya vajamindo
Eva pavasva suvitaya navyase tava vratamanvapah sachante