Sukta 83

83.1

5 pavitra angirasah, pavamanah somah, jagati

प॒वित्रं॑ ते॒ वित॑तं ब्रह्मणस्पते प्र॒भुर्गात्रा॑णि॒ पर्ये॑षि वि॒श्वत॑ः ।
अत॑प्ततनू॒र्न तदा॒मो अ॑श्नुते शृ॒तास॒ इद्वह॑न्त॒स्तत्समा॑शत ॥१॥

Pavitram te vitatam brahmanaspate prabhurgatrani paryeshi vishvatah
Ataptatanurna tadamo ashnute shritasa idvahantastatsamashata

83.2

तपो॑ष्प॒वित्रं॒ वित॑तं दि॒वस्प॒दे शोच॑न्तो अस्य॒ तन्त॑वो॒ व्य॑स्थिरन् ।
अव॑न्त्यस्य पवी॒तार॑मा॒शवो॑ दि॒वस्पृ॒ष्ठमधि॑ तिष्ठन्ति॒ चेत॑सा ॥२॥

Taposhpavitram vitatam divaspade shochanto asya tantavo vyasthiran
Avantyasya pavitaramashavo divasprishthamadhi tishthanti chetasa

83.3

अरू॑रुचदु॒षस॒ः पृश्नि॑रग्रि॒य उ॒क्षा बि॑भर्ति॒ भुव॑नानि वाज॒युः ।
मा॒या॒विनो॑ ममिरे अस्य मा॒यया॑ नृ॒चक्ष॑सः पि॒तरो॒ गर्भ॒मा द॑धुः ॥३॥

Aruruchadushasah prishniragriya uksha bibharti bhuvanani vajayuh
Mayavino mamire asya mayaya nrichakshasah pitaro garbhama dadhuh

83.4

ग॒न्ध॒र्व इ॒त्था प॒दम॑स्य रक्षति॒ पाति॑ दे॒वानां॒ जनि॑मा॒न्यद्भु॑तः ।
गृ॒भ्णाति॑ रि॒पुं नि॒धया॑ नि॒धाप॑तिः सु॒कृत्त॑मा॒ मधु॑नो भ॒क्षमा॑शत ॥४॥

Gandharva ittha padamasya rakshati pati devanam janimanyadbhutah
Gribhnati ripum nidhaya nidhapatih sukrittama madhuno bhakshamashata

83.5

ह॒विर्ह॑विष्मो॒ महि॒ सद्म॒ दैव्यं॒ नभो॒ वसा॑न॒ः परि॑ यास्यध्व॒रम् ।
राजा॑ प॒वित्र॑रथो॒ वाज॒मारु॑हः स॒हस्र॑भृष्टिर्जयसि॒ श्रवो॑ बृ॒हत् ॥५॥

Havirhavishmo mahi sadma daivyam nabho vasanah pari yasyadhvaram
Raja pavitraratho vajamaruhah sahasrabhrishtirjayasi shravo brihat