Sukta 80

80.1

5 vasurbharadvajah, pavamanah somah, jagati

सोम॑स्य॒ धारा॑ पवते नृ॒चक्ष॑स ऋ॒तेन॑ दे॒वान्ह॑वते दि॒वस्परि॑ ।
बृह॒स्पते॑ र॒वथे॑ना॒ वि दि॑द्युते समु॒द्रासो॒ न सव॑नानि विव्यचुः ॥१॥

Somasya dhara pavate nrichakshasa ritena devanhavate divaspari
Brihaspate ravathena vi didyute samudraso na savanani vivyachuh

यं त्वा॑ वाजिन्न॒घ्न्या अ॒भ्यनू॑ष॒ताऽयो॑हतं॒ योनि॒मा रो॑हसि द्यु॒मान् ।
म॒घोना॒मायु॑ः प्रति॒रन्महि॒ श्रव॒ इन्द्रा॑य सोम पवसे॒ वृषा॒ मद॑ः ॥२॥

Yam tva vajinnaghnya abhyanushatayohatam yonima rohasi dyuman
Maghonamayuh pratiranmahi shrava indraya soma pavase vrisha madah

एन्द्र॑स्य कु॒क्षा प॑वते म॒दिन्त॑म॒ ऊर्जं॒ वसा॑न॒ः श्रव॑से सुम॒ङ्गल॑ः ।
प्र॒त्यङ्स विश्वा॒ भुव॑ना॒भि प॑प्रथे॒ क्रीळ॒न्हरि॒रत्य॑ः स्यन्दते॒ वृषा॑ ॥३॥

Endrasya kuksha pavate madintama urjam vasanah shravase sumangalah
Pratyansa vishva bhuvanabhi paprathe krilanhariratyah syandate vrisha

तं त्वा॑ दे॒वेभ्यो॒ मधु॑मत्तमं॒ नर॑ः स॒हस्र॑धारं दुहते॒ दश॒ क्षिप॑ः ।
नृभि॑ः सोम॒ प्रच्यु॑तो॒ ग्राव॑भिः सु॒तो विश्वा॑न्दे॒वाँ आ प॑वस्वा सहस्रजित् ॥४॥

Tam tva devebhyo madhumattamam narah sahasradharam duhate dasha kshipah
Nribhih soma prachyuto gravabhih suto vishvandevam a pavasva sahasrajit

तं त्वा॑ ह॒स्तिनो॒ मधु॑मन्त॒मद्रि॑भिर्दु॒हन्त्य॒प्सु वृ॑ष॒भं दश॒ क्षिप॑ः ।
इन्द्रं॑ सोम मा॒दय॒न्दैव्यं॒ जनं॒ सिन्धो॑रिवो॒र्मिः पव॑मानो अर्षसि ॥५॥

Tam tva hastino madhumantamadribhirduhantyapsu vrishabham dasha kshipah
Indram soma madayandaivyam janam sindhorivormih pavamano arshasi