Sukta 79

79.1

5 kavirbhargavah, pavamanah somah, jagati

अ॒चो॒दसो॑ नो धन्व॒न्त्विन्द॑व॒ः प्र सु॑वा॒नासो॑ बृ॒हद्दि॑वेषु॒ हर॑यः ।
वि च॒ नश॑न्न इ॒षो अरा॑तयो॒ऽर्यो न॑शन्त॒ सनि॑षन्त नो॒ धिय॑ः ॥१॥

Achodaso no dhanvantvindavah pra suvanaso brihaddiveshu harayah
Vi cha nashanna isho aratayoryo nashanta sanishanta no dhiyah

79.2

प्र णो॑ धन्व॒न्त्विन्द॑वो मद॒च्युतो॒ धना॑ वा॒ येभि॒रर्व॑तो जुनी॒मसि॑ ।
ति॒रो मर्त॑स्य॒ कस्य॑ चि॒त्परि॑ह्वृतिं व॒यं धना॑नि वि॒श्वधा॑ भरेमहि ॥२॥

Pra no dhanvantvindavo madachyuto dhana va yebhirarvato junimasi
Tiro martasya kasya chitparihvritim vayam dhanani vishvadha bharemahi

79.3

उ॒त स्वस्या॒ अरा॑त्या अ॒रिर्हि ष उ॒तान्यस्या॒ अरा॑त्या॒ वृको॒ हि षः ।
धन्व॒न्न तृष्णा॒ सम॑रीत॒ ताँ अ॒भि सोम॑ ज॒हि प॑वमान दुरा॒ध्य॑ः ॥३॥

Uta svasya aratya arirhi sha utanyasya aratya vriko hi shah
Dhanvanna trishna samarita tam abhi soma jahi pavamana duradhyah

79.4

दि॒वि ते॒ नाभा॑ पर॒मो य आ॑द॒दे पृ॑थि॒व्यास्ते॑ रुरुहु॒ः सान॑वि॒ क्षिप॑ः ।
अद्र॑यस्त्वा बप्सति॒ गोरधि॑ त्व॒च्य१प्सु त्वा॒ हस्तै॑र्दुदुहुर्मनी॒षिण॑ः ॥४॥

Divi te nabha paramo ya adade prithivyaste ruruhuh sanavi kshipah
Adrayastva bapsati goradhi tvachya1psu tva hastairduduhurmanishinah

79.5

ए॒वा त॑ इन्दो सु॒भ्वं॑ सु॒पेश॑सं॒ रसं॑ तुञ्जन्ति प्रथ॒मा अ॑भि॒श्रिय॑ः ।
निदं॑निदं पवमान॒ नि ता॑रिष आ॒विस्ते॒ शुष्मो॑ भवतु प्रि॒यो मद॑ः ॥५॥

Eva ta indo subhvam supeshasam rasam tunjanti prathama abhishriyah
Nidannidam pavamana ni tarisha aviste shushmo bhavatu priyo madah