Sukta 74

74.1

9 kakshivan dairghatamasah, pavamanah somah, jagati, 8 trishtup

शिशु॒र्न जा॒तोऽव॑ चक्रद॒द्वने॒ स्व१र्यद्वा॒ज्य॑रु॒षः सिषा॑सति ।
दि॒वो रेत॑सा सचते पयो॒वृधा॒ तमी॑महे सुम॒ती शर्म॑ स॒प्रथ॑ः ॥१॥

Shishurna jatova chakradadvane sva1ryadvajyarushah sishasati
Divo retasa sachate payovridha tamimahe sumati sharma saprathah

दि॒वो यः स्क॒म्भो ध॒रुण॒ः स्वा॑तत॒ आपू॑र्णो अं॒शुः प॒र्येति॑ वि॒श्वत॑ः ।
सेमे म॒ही रोद॑सी यक्षदा॒वृता॑ समीची॒ने दा॑धार॒ समिष॑ः क॒विः ॥२॥

Divo yah skambho dharunah svatata apurno anshuh paryeti vishvatah
Seme mahi rodasi yakshadavrita samichine dadhara samishah kavih

महि॒ प्सर॒ः सुकृ॑तं सो॒म्यं मधू॒र्वी गव्यू॑ति॒रदि॑तेॠ॒तं य॒ते ।
ईशे॒ यो वृ॒ष्टेरि॒त उ॒स्रियो॒ वृषा॒ऽपां ने॒ता य इ॒तऊ॑तिॠ॒ग्मिय॑ः ॥३॥

Mahi psarah sukritam somyam madhurvi gavyutiraditeritam yate
Ishe yo vrishterita usriyo vrishapam neta ya itautirigmiyah

आ॒त्म॒न्वन्नभो॑ दुह्यते घृ॒तं पय॑ ऋ॒तस्य॒ नाभि॑र॒मृतं॒ वि जा॑यते ।
स॒मी॒ची॒नाः सु॒दान॑वः प्रीणन्ति॒ तं नरो॑ हि॒तमव॑ मेहन्ति॒ पेर॑वः ॥४॥

Atmanvannabho duhyate ghritam paya ritasya nabhiramritam vi jayate
Samichinah sudanavah prinanti tam naro hitamava mehanti peravah

अरा॑वीदं॒शुः सच॑मान ऊ॒र्मिणा॑ देवा॒व्यं१ मनु॑षे पिन्वति॒ त्वच॑म् ।
दधा॑ति॒ गर्भ॒मदि॑तेरु॒पस्थ॒ आ येन॑ तो॒कं च॒ तन॑यं च॒ धाम॑हे ॥५॥

Aravidanshuh sachamana urmina devavyan1 manushe pinvati tvacham
Dadhati garbhamaditerupastha a yena tokam cha tanayam cha dhamahe

स॒हस्र॑धा॒रेऽव॒ ता अ॑स॒श्चत॑स्तृ॒तीये॑ सन्तु॒ रज॑सि प्र॒जाव॑तीः ।
चत॑स्रो॒ नाभो॒ निहि॑ता अ॒वो दि॒वो ह॒विर्भ॑रन्त्य॒मृतं॑ घृत॒श्चुत॑ः ॥६॥

Sahasradhareva ta asashchatastritiye santu rajasi prajavatih
Chatasro nabho nihita avo divo havirbharantyamritam ghritashchutah

श्वे॒तं रू॒पं कृ॑णुते॒ यत्सिषा॑सति॒ सोमो॑ मी॒ढ्वाँ असु॑रो वेद॒ भूम॑नः ।
धि॒या शमी॑ सचते॒ सेम॒भि प्र॒वद्दि॒वस्कव॑न्ध॒मव॑ दर्षदु॒द्रिण॑म् ॥७॥

Shvetam rupam krinute yatsishasati somo midhvam asuro veda bhumanah
Dhiya shami sachate semabhi pravaddivaskavandhamava darshadudrinam

अध॑ श्वे॒तं क॒लशं॒ गोभि॑र॒क्तं कार्ष्म॒न्ना वा॒ज्य॑क्रमीत्सस॒वान् ।
आ हि॑न्विरे॒ मन॑सा देव॒यन्त॑ः क॒क्षीव॑ते श॒तहि॑माय॒ गोना॑म् ॥८॥

Adha shvetam kalasham gobhiraktam karshmanna vajyakramitsasavan
A hinvire manasa devayantah kakshivate shatahimaya gonam

अ॒द्भिः सो॑म पपृचा॒नस्य॑ ते॒ रसोऽव्यो॒ वारं॒ वि प॑वमान धावति ।
स मृ॒ज्यमा॑नः क॒विभि॑र्मदिन्तम॒ स्वद॒स्वेन्द्रा॑य पवमान पी॒तये॑ ॥९॥

Adbhih soma paprichanasya te rasovyo varam vi pavamana dhavati
Sa mrijyamanah kavibhirmadintama svadasvendraya pavamana pitaye