Sukta 73

73.1

9 pavitra angirasah, pavamanah somah, jagati

स्रक्वे॑ द्र॒प्सस्य॒ धम॑त॒ः सम॑स्वरन्नृ॒तस्य॒ योना॒ सम॑रन्त॒ नाभ॑यः ।
त्रीन्त्स मू॒र्ध्नो असु॑रश्चक्र आ॒रभे॑ स॒त्यस्य॒ नाव॑ः सु॒कृत॑मपीपरन् ॥१॥

Srakve drapsasya dhamatah samasvarannritasya yona samaranta nabhayah
Trintsa murdhno asurashchakra arabhe satyasya navah sukritamapiparan

73.2

स॒म्यक्स॒म्यञ्चो॑ महि॒षा अ॑हेषत॒ सिन्धो॑रू॒र्मावधि॑ वे॒ना अ॑वीविपन् ।
मधो॒र्धारा॑भिर्ज॒नय॑न्तो अ॒र्कमित्प्रि॒यामिन्द्र॑स्य त॒न्व॑मवीवृधन् ॥२॥

Samyaksamyancho mahisha aheshata sindhorurmavadhi vena avivipan
Madhordharabhirjanayanto arkamitpriyamindrasya tanvamavivridhan

73.3

प॒वित्र॑वन्त॒ः परि॒ वाच॑मासते पि॒तैषां॑ प्र॒त्नो अ॒भि र॑क्षति व्र॒तम् ।
म॒हः स॑मु॒द्रं वरु॑णस्ति॒रो द॑धे॒ धीरा॒ इच्छे॑कुर्ध॒रुणे॑ष्वा॒रभ॑म् ॥३॥

Pavitravantah pari vachamasate pitaisham pratno abhi rakshati vratam
Mahah samudram varunastiro dadhe dhira ichchhekurdharuneshvarabham

73.4

स॒हस्र॑धा॒रेऽव॒ ते सम॑स्वरन्दि॒वो नाके॒ मधु॑जिह्वा अस॒श्चत॑ः ।
अस्य॒ स्पशो॒ न नि मि॑षन्ति॒ भूर्ण॑यः प॒देप॑दे पा॒शिन॑ः सन्ति॒ सेत॑वः ॥४॥

Sahasradhareva te samasvarandivo nake madhujihva asashchatah
Asya spasho na ni mishanti bhurnayah padepade pashinah santi setavah

73.5

पि॒तुर्मा॒तुरध्या ये स॒मस्व॑रन्नृ॒चा शोच॑न्तः सं॒दह॑न्तो अव्र॒तान् ।
इन्द्र॑द्विष्टा॒मप॑ धमन्ति मा॒यया॒ त्वच॒मसि॑क्नीं॒ भूम॑नो दि॒वस्परि॑ ॥५॥

Piturmaturadhya ye samasvarannricha shochantah sandahanto avratan
Indradvishtamapa dhamanti mayaya tvachamasiknim bhumano divaspari

73.6

प्र॒त्नान्माना॒दध्या ये स॒मस्व॑र॒ञ्छ्लोक॑यन्त्रासो रभ॒सस्य॒ मन्त॑वः ।
अपा॑न॒क्षासो॑ बधि॒रा अ॑हासत ऋ॒तस्य॒ पन्थां॒ न त॑रन्ति दु॒ष्कृत॑ः ॥६॥

Pratnanmanadadhya ye samasvaranchhlokayantraso rabhasasya mantavah
Apanakshaso badhira ahasata ritasya pantham na taranti dushkritah

73.7

स॒हस्र॑धारे॒ वित॑ते प॒वित्र॒ आ वाचं॑ पुनन्ति क॒वयो॑ मनी॒षिण॑ः ।
रु॒द्रास॑ एषामिषि॒रासो॑ अ॒द्रुह॒ः स्पश॒ः स्वञ्च॑ः सु॒दृशो॑ नृ॒चक्ष॑सः ॥७॥

Sahasradhare vitate pavitra a vacham punanti kavayo manishinah
Rudrasa eshamishiraso adruhah spashah svanchah sudrisho nrichakshasah

73.8

ऋ॒तस्य॑ गो॒पा न दभा॑य सु॒क्रतु॒स्त्री ष प॒वित्रा॑ हृ॒द्य१न्तरा द॑धे ।
वि॒द्वान्त्स विश्वा॒ भुव॑ना॒भि प॑श्य॒त्यवाजु॑ष्टान्विध्यति क॒र्ते अ॑व्र॒तान् ॥८॥

Ritasya gopa na dabhaya sukratustri sha pavitra hridya1ntara dadhe
Vidvantsa vishva bhuvanabhi pashyatyavajushtanvidhyati karte avratan

73.9

ऋ॒तस्य॒ तन्तु॒र्वित॑तः प॒वित्र॒ आ जि॒ह्वाया॒ अग्रे॒ वरु॑णस्य मा॒यया॑ ।
धीरा॑श्चि॒त्तत्स॒मिन॑क्षन्त आश॒ताऽत्रा॑ क॒र्तमव॑ पदा॒त्यप्र॑भुः ॥९॥

Ritasya tanturvitatah pavitra a jihvaya agre varunasya mayaya
Dhirashchittatsaminakshanta ashatatra kartamava padatyaprabhuh