Sukta 114

114.1

4 kashyapo marichah, pavamanah somah, panktih

य इन्दो॒ः पव॑मान॒स्याऽनु॒ धामा॒न्यक्र॑मीत् ।
तमा॑हुः सुप्र॒जा इति॒ यस्ते॑ सो॒मावि॑ध॒न्मन॒ इन्द्रा॑येन्दो॒ परि॑ स्रव ॥१॥

Ya indoh pavamanasyanu dhamanyakramit
Tamahuh supraja iti yaste somavidhanmana indrayendo pari srava

ऋषे॑ मन्त्र॒कृतां॒ स्तोमै॒ः कश्य॑पोद्व॒र्धय॒न्गिर॑ः ।
सोमं॑ नमस्य॒ राजा॑नं॒ यो ज॒ज्ञे वी॒रुधां॒ पति॒रिन्द्रा॑येन्दो॒ परि॑ स्रव ॥२॥

Rishe mantrakritam stomaih kashyapodvardhayangirah
Somam namasya rajanam yo jagye virudham patirindrayendo pari srava

स॒प्त दिशो॒ नाना॑सूर्याः स॒प्त होता॑र ऋ॒त्विज॑ः ।
दे॒वा आ॑दि॒त्या ये स॒प्त तेभि॑ः सोमा॒भि र॑क्ष न॒ इन्द्रा॑येन्दो॒ परि॑ स्रव ॥३॥

Sapta disho nanasuryah sapta hotara ritvijah
Deva aditya ye sapta tebhih somabhi raksha na indrayendo pari srava

यत्ते॑ राजञ्छृ॒तं ह॒विस्तेन॑ सोमा॒भि र॑क्ष नः ।
अ॒रा॒ती॒वा मा न॑स्तारी॒न्मो च॑ न॒ः किं च॒नाम॑म॒दिन्द्रा॑येन्दो॒ परि॑ स्रव ॥४॥

Yatte rajanchhritam havistena somabhi raksha nah
Arativa ma nastarinmo cha nah kim chanamamadindrayendo pari srava