Sukta 10

10.1

9 kashyaposito devalo va, pavamanah somah, gayatri

प्र स्वा॒नासो॒ रथा॑ इ॒वाऽर्व॑न्तो॒ न श्र॑व॒स्यव॑ः । सोमा॑सो रा॒ये अ॑क्रमुः ॥१॥

Pra svanaso ratha ivarvanto na shravasyavah, somaso raye akramuh

हि॒न्वा॒नासो॒ रथा॑ इव दधन्वि॒रे गभ॑स्त्योः । भरा॑सः का॒रिणा॑मिव ॥२॥

Hinvanaso ratha iva dadhanvire gabhastyoh, bharasah karinamiva

राजा॑नो॒ न प्रश॑स्तिभि॒ः सोमा॑सो॒ गोभि॑रञ्जते । य॒ज्ञो न स॒प्त धा॒तृभि॑ः ॥३॥

Rajano na prashastibhih somaso gobhiranjate, yagyo na sapta dhatribhih

परि॑ सुवा॒नास॒ इन्द॑वो॒ मदा॑य ब॒र्हणा॑ गि॒रा । सु॒ता अ॑र्षन्ति॒ धार॑या ॥४॥

Pari suvanasa indavo madaya barhana gira, suta arshanti dharaya

आ॒पा॒नासो॑ वि॒वस्व॑तो॒ जन॑न्त उ॒षसो॒ भग॑म् । सूरा॒ अण्वं॒ वि त॑न्वते ॥५॥

Apanaso vivasvato jananta ushaso bhagam, sura anvam vi tanvate

अप॒ द्वारा॑ मती॒नां प्र॒त्ना ऋ॑ण्वन्ति का॒रव॑ः । वृष्णो॒ हर॑स आ॒यव॑ः ॥६॥

Apa dvara matinam pratna rinvanti karavah, vrishno harasa ayavah

स॒मी॒ची॒नास॑ आसते॒ होता॑रः स॒प्तजा॑मयः । प॒दमेक॑स्य॒ पिप्र॑तः ॥७॥

Samichinasa asate hotarah saptajamayah, padamekasya pipratah

नाभा॒ नाभिं॑ न॒ आ द॑दे॒ चक्षु॑श्चि॒त्सूर्ये॒ सचा॑ । क॒वेरप॑त्य॒मा दु॑हे ॥८॥

Nabha nabhim na a dade chakshushchitsurye sacha, kaverapatyama duhe

अ॒भि प्रि॒या दि॒वस्प॒दम॑ध्व॒र्युभि॒र्गुहा॑ हि॒तम् । सूर॑ः पश्यति॒ चक्ष॑सा ॥९॥

Abhi priya divaspadamadhvaryubhirguha hitam, surah pashyati chakshasa