Sukta 87

87.1

6 krishna angiraso, vasishtho va dyumnikah, priyamedha angiraso va, ashvinau, pragathah = ( vishama brihati, sama satobrihati )

द्यु॒म्नी वां॒ स्तोमो॑ अश्विना॒ क्रिवि॒र्न सेक॒ आ ग॑तम् । मध्व॑ः सु॒तस्य॒ स दि॒वि प्रि॒यो न॑रा पा॒तं गौ॒रावि॒वेरि॑णे ॥१॥

Dyumni vam stomo ashvina krivirna seka a gatam, madhvah sutasya sa divi priyo nara patam gauraviverine

87.2

पिब॑तं घ॒र्मं मधु॑मन्तमश्वि॒ना ऽऽब॒र्हिः सी॑दतं नरा । ता म॑न्दसा॒ना मनु॑षो दुरो॒ण आ नि पा॑तं॒ वेद॑सा॒ वय॑ः ॥२॥

Pibatam gharmam madhumantamashvina barhih sidatam nara, ta mandasana manusho durona a ni patam vedasa vayah

87.3

आ वां॒ विश्वा॑भिरू॒तिभि॑ः प्रि॒यमे॑धा अहूषत । ता व॒र्तिर्या॑त॒मुप॑ वृ॒क्तब॑र्हिषो॒ जुष्टं॑ य॒ज्ञं दिवि॑ष्टिषु ॥३॥

A vam vishvabhirutibhih priyamedha ahushata, ta vartiryatamupa vriktabarhisho jushtam yagyam divishtishu

87.4

पिब॑तं॒ सोमं॒ मधु॑मन्तमश्वि॒ना ऽऽब॒र्हिः सी॑दतं सु॒मत् ।
ता वा॑वृधा॒ना उप॑ सुष्टु॒तिं दि॒वो ग॒न्तं गौ॒रावि॒वेरि॑णम् ॥४॥

Pibatam somam madhumantamashvina barhih sidatam sumat
Ta vavridhana upa sushtutim divo gantam gauraviverinam

87.5

आ नू॒नं या॑तमश्वि॒नाऽश्वे॑भिः प्रुषि॒तप्सु॑भिः । दस्रा॒ हिर॑ण्यवर्तनी शुभस्पती पा॒तं सोम॑मृतावृधा ॥५॥

A nunam yatamashvinashvebhih prushitapsubhih, dasra hiranyavartani shubhaspati patam somamritavridha

87.6

व॒यं हि वां॒ हवा॑महे विप॒न्यवो॒ विप्रा॑सो॒ वाज॑सातये । ता व॒ल्गू द॒स्रा पु॑रु॒दंस॑सा धि॒याऽश्वि॑ना श्रु॒ष्ट्या ग॑तम् ॥६॥

Vayam hi vam havamahe vipanyavo vipraso vajasataye, ta valgu dasra purudansasa dhiyashvina shrushtya gatam