Sukta 86

86.1

5 krishna angirasah, vishvako va karshinah, ashvinau, jagati

उ॒भा हि द॒स्रा भि॒षजा॑ मयो॒भुवो॒भा दक्ष॑स्य॒ वच॑सो बभू॒वथु॑ः ।
ता वां॒ विश्व॑को हवते तनूकृ॒थे मा नो॒ वि यौ॑ष्टं स॒ख्या मु॒मोच॑तम् ॥१॥

Ubha hi dasra bhishaja mayobhuvobha dakshasya vachaso babhuvathuh
Ta vam vishvako havate tanukrithe ma no vi yaushtam sakhya mumochatam

क॒था नू॒नं वां॒ विम॑ना॒ उप॑ स्तवद्यु॒वं धियं॑ ददथु॒र्वस्य॑इष्टये ।
ता वां॒ विश्व॑को हवते तनूकृ॒थे मा नो॒ वि यौ॑ष्टं स॒ख्या मु॒मोच॑तम् ॥२॥

Katha nunam vam vimana upa stavadyuvam dhiyam dadathurvasyaishtaye
Ta vam vishvako havate tanukrithe ma no vi yaushtam sakhya mumochatam

यु॒वं हि ष्मा॑ पुरुभुजे॒ममे॑ध॒तुं वि॑ष्णा॒प्वे॑ द॒दथु॒र्वस्य॑इष्टये ।
ता वां॒ विश्व॑को हवते तनूकृ॒थे मा नो॒ वि यौ॑ष्टं स॒ख्या मु॒मोच॑तम् ॥३॥

Yuvam hi shma purubhujemamedhatum vishnapve dadathurvasyaishtaye
Ta vam vishvako havate tanukrithe ma no vi yaushtam sakhya mumochatam

उ॒त त्यं वी॒रं ध॑न॒सामृ॑जी॒षिणं॑ दू॒रे चि॒त्सन्त॒मव॑से हवामहे ।
यस्य॒ स्वादि॑ष्ठा सुम॒तिः पि॒तुर्य॑था॒ मा नो॒ वि यौ॑ष्टं स॒ख्या मु॒मोच॑तम् ॥४॥

Uta tyam viram dhanasamrijishinam dure chitsantamavase havamahe
Yasya svadishtha sumatih pituryatha ma no vi yaushtam sakhya mumochatam

ऋ॒तेन॑ दे॒वः स॑वि॒ता श॑मायत ऋ॒तस्य॒ शृङ्ग॑मुर्वि॒या वि प॑प्रथे ।
ऋ॒तं सा॑साह॒ महि॑ चित्पृतन्य॒तो मा नो॒ वि यौ॑ष्टं स॒ख्या मु॒मोच॑तम् ॥५॥

Ritena devah savita shamayata ritasya shringamurviya vi paprathe
Ritam sasaha mahi chitpritanyato ma no vi yaushtam sakhya mumochatam