Sukta 81

81.1

9 kusidi kanvah, indrah, gayatri

आ तू न॑ इन्द्र क्षु॒मन्तं॑ चि॒त्रं ग्रा॒भं सं गृ॑भाय । म॒हा॒ह॒स्ती दक्षि॑णेन ॥१॥

A tu na indra kshumantam chitram grabham sam gribhaya, mahahasti dakshinena

वि॒द्मा हि त्वा॑ तुविकू॒र्मिं तु॒विदे॑ष्णं तु॒वीम॑घम् । तु॒वि॒मा॒त्रमवो॑भिः ॥२॥

Vidma hi tva tuvikurmim tuvideshnam tuvimagham, tuvimatramavobhih

न॒हि त्वा॑ शूर दे॒वा न मर्ता॑सो॒ दित्स॑न्तम् । भी॒मं न गां वा॒रय॑न्ते ॥३॥

Nahi tva shura deva na martaso ditsantam, bhimam na gam varayante

एतो॒ न्विन्द्रं॒ स्तवा॒मेशा॑नं॒ वस्व॑ः स्व॒राज॑म् । न राध॑सा मर्धिषन्नः ॥४॥

Eto nvindram stavameshanam vasvah svarajam, na radhasa mardhishannah

प्र स्तो॑ष॒दुप॑ गासिष॒च्छ्रव॒त्साम॑ गी॒यमा॑नम् । अ॒भि राध॑सा जुगुरत् ॥५॥

Pra stoshadupa gasishachchhravatsama giyamanam, abhi radhasa jugurat

आ नो॑ भर॒ दक्षि॑णेना॒ऽभि स॒व्येन॒ प्र मृ॑श । इन्द्र॒ मा नो॒ वसो॒र्निर्भा॑क् ॥६॥

A no bhara dakshinenabhi savyena pra mrisha, indra ma no vasornirbhak

उप॑ क्रम॒स्वा भ॑र धृष॒ता धृ॑ष्णो॒ जना॑नाम् । अदा॑शूष्टरस्य॒ वेद॑ः ॥७॥

Upa kramasva bhara dhrishata dhrishno jananam, adashushtarasya vedah

इन्द्र॒ य उ॒ नु ते॒ अस्ति॒ वाजो॒ विप्रे॑भि॒ः सनि॑त्वः । अ॒स्माभि॒ः सु तं स॑नुहि ॥८॥

Indra ya u nu te asti vajo viprebhih sanitvah, asmabhih su tam sanuhi

स॒द्यो॒जुव॑स्ते॒ वाजा॑ अ॒स्मभ्यं॑ वि॒श्वश्च॑न्द्राः । वशै॑श्च म॒क्षू ज॑रन्ते ॥१३॥

Sadyojuvaste vaja asmabhyam vishvashchandrah, vashaishcha makshu jarante