Sukta 65

65.1

1-12 12 pragathah kanvah, indrah, gayatri

यदि॑न्द्र॒ प्रागपा॒गुद॒ङ्न्य॑ग्वा हू॒यसे॒ नृभि॑ः । आ या॑हि॒ तूय॑मा॒शुभि॑ः ॥१॥

Yadindra pragapagudannyagva huyase nribhih, a yahi tuyamashubhih

यद्वा॑ प्र॒स्रव॑णे दि॒वो मा॒दया॑से॒ स्व॑र्णरे । यद्वा॑ समु॒द्रे अन्ध॑सः ॥२॥

Yadva prasravane divo madayase svarnare, yadva samudre andhasah

आ त्वा॑ गी॒र्भिर्म॒हामु॒रुं हु॒वे गामि॑व॒ भोज॑से । इन्द्र॒ सोम॑स्य पी॒तये॑ ॥३॥

A tva girbhirmahamurum huve gamiva bhojase, indra somasya pitaye

आ त॑ इन्द्र महि॒मानं॒ हर॑यो देव ते॒ मह॑ः । रथे॑ वहन्तु॒ बिभ्र॑तः ॥४॥

A ta indra mahimanam harayo deva te mahah, rathe vahantu bibhratah

इन्द्र॑ गृणी॒ष उ॑ स्तु॒षे म॒हाँ उ॒ग्र ई॑शान॒कृत् । एहि॑ नः सु॒तं पिब॑ ॥५॥

Indra grinisha u stushe maham ugra ishanakrit, ehi nah sutam piba

सु॒ताव॑न्तस्त्वा व॒यं प्रय॑स्वन्तो हवामहे । इ॒दं नो॑ ब॒र्हिरा॒सदे॑ ॥६॥

Sutavantastva vayam prayasvanto havamahe, idam no barhirasade

यच्चि॒द्धि शश्व॑ता॒मसीन्द्र॒ साधा॑रण॒स्त्वम् । तं त्वा॑ व॒यं ह॑वामहे ॥७॥

Yachchiddhi shashvatamasindra sadharanastvam, tam tva vayam havamahe

इ॒दं ते॑ सो॒म्यं मध्वधु॑क्ष॒न्नद्रि॑भि॒र्नर॑ः । जु॒षा॒ण इ॑न्द्र॒ तत्पि॑ब ॥८॥

Idam te somyam madhvadhukshannadribhirnarah, jushana indra tatpiba

विश्वाँ॑ अ॒र्यो वि॑प॒श्चितोऽति॑ ख्य॒स्तूय॒मा ग॑हि । अ॒स्मे धे॑हि॒ श्रवो॑ बृ॒हत् ॥९॥

Vishvam aryo vipashchitoti khyastuyama gahi, asme dhehi shravo brihat

दा॒ता मे॒ पृष॑तीनां॒ राजा॑ हिरण्य॒वीना॑म् । मा दे॑वा म॒घवा॑ रिषत् ॥१०॥

Data me prishatinam raja hiranyavinam, ma deva maghava rishat

स॒हस्रे॒ पृष॑तीना॒मधि॑ श्च॒न्द्रं बृ॒हत्पृ॒थु । शु॒क्रं हिर॑ण्य॒मा द॑दे ॥११॥

Sahasre prishatinamadhi shchandram brihatprithu, shukram hiranyama dade

नपा॑तो दु॒र्गह॑स्य मे स॒हस्रे॑ण सु॒राध॑सः । श्रवो॑ दे॒वेष्व॑क्रत ॥१२॥

Napato durgahasya me sahasrena suradhasah, shravo deveshvakrata