Sukta 64

64.1

12 pragathah kanvah, indrah, gayatri

उत्त्वा॑ मन्दन्तु॒ स्तोमा॑ः कृणु॒ष्व राधो॑ अद्रिवः । अव॑ ब्रह्म॒द्विषो॑ जहि ॥१॥

Uttva mandantu stomah krinushva radho adrivah, ava brahmadvisho jahi

प॒दा प॒णीँर॑रा॒धसो॒ नि बा॑धस्व म॒हाँ अ॑सि । न॒हि त्वा॒ कश्च॒न प्रति॑ ॥२॥

Pada paninraradhaso ni badhasva maham asi, nahi tva kashchana prati

त्वमी॑शिषे सु॒ताना॒मिन्द्र॒ त्वमसु॑तानाम् । त्वं राजा॒ जना॑नाम् ॥३॥

Tvamishishe sutanamindra tvamasutanam, tvam raja jananam

एहि॒ प्रेहि॒ क्षयो॑ दि॒व्या॒३घोष॑ञ्चर्षणी॒नाम् । ओभे पृ॑णासि॒ रोद॑सी ॥४॥

Ehi prehi kshayo divya3ghoshancharshaninam, obhe prinasi rodasi

त्यं चि॒त्पर्व॑तं गि॒रिं श॒तव॑न्तं सह॒स्रिण॑म् । वि स्तो॒तृभ्यो॑ रुरोजिथ ॥५॥

Tyam chitparvatam girim shatavantam sahasrinam, vi stotribhyo rurojitha

व॒यमु॑ त्वा॒ दिवा॑ सु॒ते व॒यं नक्तं॑ हवामहे । अ॒स्माकं॒ काम॒मा पृ॑ण ॥६॥

Vayamu tva diva sute vayam naktam havamahe, asmakam kamama prina

क्व१ स्य वृ॑ष॒भो युवा॑ तुवि॒ग्रीवो॒ अना॑नतः । ब्र॒ह्मा कस्तं स॑पर्यति ॥७॥

Kva1 sya vrishabho yuva tuvigrivo ananatah, brahma kastam saparyati

कस्य॑ स्वि॒त्सव॑नं॒ वृषा॑ जुजु॒ष्वाँ अव॑ गच्छति । इन्द्रं॒ क उ॑ स्वि॒दा च॑के ॥८॥

Kasya svitsavanam vrisha jujushvam ava gachchhati, indram ka u svida chake

कं ते॑ दा॒ना अ॑सक्षत॒ वृत्र॑ह॒न्कं सु॒वीर्या॑ । उ॒क्थे क उ॑ स्वि॒दन्त॑मः ॥९॥

Kam te dana asakshata vritrahankam suvirya, ukthe ka u svidantamah

अ॒यं ते॒ मानु॑षे॒ जने॒ सोम॑ः पू॒रुषु॑ सूयते । तस्येहि॒ प्र द्र॑वा॒ पिब॑ ॥१०॥

Ayam te manushe jane somah purushu suyate, tasyehi pra drava piba

अ॒यं ते॑ शर्य॒णाव॑ति सु॒षोमा॑या॒मधि॑ प्रि॒यः । आ॒र्जी॒कीये॑ म॒दिन्त॑मः ॥११॥

Ayam te sharyanavati sushomayamadhi priyah, arjikiye madintamah

तम॒द्य राध॑से म॒हे चारुं॒ मदा॑य॒ घृष्व॑ये । एही॑मिन्द्र॒ द्रवा॒ पिब॑ ॥१२॥

Tamadya radhase mahe charum madaya ghrishvaye, ehimindra drava piba