Sukta 83

83.1

10 maitravarunirvasishthah, indravarunau, jagati

यु॒वां न॑रा॒ पश्य॑मानास॒ आप्यं॑ प्रा॒चा ग॒व्यन्त॑ः पृथु॒पर्श॑वो ययुः ।
दासा॑ च वृ॒त्रा ह॒तमार्या॑णि च सु॒दास॑मिन्द्रावरु॒णाव॑सावतम् ॥१॥

Yuvam nara pashyamanasa apyam pracha gavyantah prithuparshavo yayuh
Dasa cha vritra hatamaryani cha sudasamindravarunavasavatam

83.2

यत्रा॒ नर॑ः स॒मय॑न्ते कृ॒तध्व॑जो॒ यस्मि॑न्ना॒जा भव॑ति॒ किं च॒न प्रि॒यम् ।
यत्रा॒ भय॑न्ते॒ भुव॑ना स्व॒र्दृश॒स्तत्रा॑ न इन्द्रावरु॒णाधि॑ वोचतम् ॥२॥

Yatra narah samayante kritadhvajo yasminnaja bhavati kim chana priyam
Yatra bhayante bhuvana svardrishastatra na indravarunadhi vochatam

83.3

सं भूम्या॒ अन्ता॑ ध्वसि॒रा अ॑दृक्ष॒तेन्द्रा॑वरुणा दि॒वि घोष॒
आरु॑हत् । अस्थु॒र्जना॑ना॒मुप॒ मामरा॑तयो॒ऽर्वागव॑सा हवनश्रु॒ता ग॑तम् ॥३॥

Sam bhumya anta dhvasira adrikshatendravaruna divi ghosha
Aruhat, asthurjananamupa mamaratayorvagavasa havanashruta gatam

83.4

इन्द्रा॑वरुणा व॒धना॑भिरप्र॒ति भे॒दं व॒न्वन्ता॒ प्र सु॒दास॑मावतम् ।
ब्रह्मा॑ण्येषां शृणुतं॒ हवी॑मनि स॒त्या तृत्सू॑नामभवत्पु॒रोहि॑तिः ॥४॥

Indravaruna vadhanabhiraprati bhedam vanvanta pra sudasamavatam
Brahmanyesham shrinutam havimani satya tritsunamabhavatpurohitih

83.5

इन्द्रा॑वरुणाव॒भ्या त॑पन्ति मा॒घान्य॒र्यो व॒नुषा॒मरा॑तयः ।
यु॒वं हि वस्व॑ उ॒भय॑स्य॒ राज॒थोऽध॑ स्मा नोऽवतं॒ पार्ये॑ दि॒वि ॥५॥

Indravarunavabhya tapanti maghanyaryo vanushamaratayah
Yuvam hi vasva ubhayasya rajathodha sma novatam parye divi

83.6

यु॒वां ह॑वन्त उ॒भया॑स आ॒जिष्विन्द्रं॑ च॒ वस्वो॒ वरु॑णं च सा॒तये॑ ।
यत्र॒ राज॑भिर्द॒शभि॒र्निबा॑धितं॒ प्र सु॒दास॒माव॑तं॒ तृत्सु॑भिः स॒ह ॥६॥

Yuvam havanta ubhayasa ajishvindram cha vasvo varunam cha sataye
Yatra rajabhirdashabhirnibadhitam pra sudasamavatam tritsubhih saha

83.7

दश॒ राजा॑न॒ः समि॑ता॒ अय॑ज्यवः सु॒दास॑मिन्द्रावरुणा॒ न यु॑युधुः ।
स॒त्या नृ॒णाम॑द्म॒सदा॒मुप॑स्तुतिर्दे॒वा ए॑षामभवन्दे॒वहू॑तिषु ॥७॥

Dasha rajanah samita ayajyavah sudasamindravaruna na yuyudhuh
Satya nrinamadmasadamupastutirdeva eshamabhavandevahutishu

83.8

दा॒श॒रा॒ज्ञे परि॑यत्ताय वि॒श्वत॑ः सु॒दास॑ इन्द्रावरुणावशिक्षतम् ।
श्वि॒त्यञ्चो॒ यत्र॒ नम॑सा कप॒र्दिनो॑ धि॒या धीव॑न्तो॒ अस॑पन्त॒ तृत्स॑वः ॥८॥

Dasharagye pariyattaya vishvatah sudasa indravarunavashikshatam
Shvityancho yatra namasa kapardino dhiya dhivanto asapanta tritsavah

83.9

वृ॒त्राण्य॒न्यः स॑मि॒थेषु॒ जिघ्न॑ते व्र॒तान्य॒न्यो अ॒भि र॑क्षते॒ सदा॑ ।
हवा॑महे वां वृषणा सुवृ॒क्तिभि॑र॒स्मे इ॑न्द्रावरुणा॒ शर्म॑ यच्छतम् ॥९॥

Vritranyanyah samitheshu jighnate vratanyanyo abhi rakshate sada
Havamahe vam vrishana suvriktibhirasme indravaruna sharma yachchhatam

83.10

अ॒स्मे इन्द्रो॒ वरु॑णो मि॒त्रो अ॑र्य॒मा द्यु॒म्नं य॑च्छन्तु॒ महि॒ शर्म॑ स॒प्रथ॑ः ।
अ॒व॒ध्रं ज्योति॒रदि॑तेॠता॒वृधो॑ दे॒वस्य॒ श्लोकं॑ सवि॒तुर्म॑नामहे ॥१०॥

Asme indro varuno mitro aryama dyumnam yachchhantu mahi sharma saprathah
Avadhram jyotiraditeritavridho devasya shlokam saviturmanamahe