Sukta 82

82.1

10 maitravarunirvasishthah, indravarunau, jagati

इन्द्रा॑वरुणा यु॒वम॑ध्व॒राय॑ नो वि॒शे जना॑य॒ महि॒ शर्म॑ यच्छतम् ।
दी॒र्घप्र॑यज्यु॒मति॒ यो व॑नु॒ष्यति॑ व॒यं ज॑येम॒ पृत॑नासु दू॒ढ्य॑ः ॥१॥

Indravaruna yuvamadhvaraya no vishe janaya mahi sharma yachchhatam
Dirghaprayajyumati yo vanushyati vayam jayema pritanasu dudhyah

82.2

स॒म्राळ॒न्यः स्व॒राळ॒न्य उ॑च्यते वां म॒हान्ता॒विन्द्रा॒वरु॑णा म॒हाव॑सू ।
विश्वे॑ दे॒वास॑ः पर॒मे व्यो॑मनि॒ सं वा॒मोजो॑ वृषणा॒ सं बलं॑ दधुः ॥२॥

Samralanyah svaralanya uchyate vam mahantavindravaruna mahavasu
Vishve devasah parame vyomani sam vamojo vrishana sam balam dadhuh

82.3

अन्व॒पां खान्य॑तृन्त॒मोज॒सा सूर्य॑मैरयतं दि॒वि प्र॒भुम् ।
इन्द्रा॑वरुणा॒ मदे॑ अस्य मा॒यिनोऽपि॑न्वतम॒पित॒ः पिन्व॑तं॒ धिय॑ः ॥३॥

Anvapam khanyatrintamojasa suryamairayatam divi prabhum
Indravaruna made asya mayinopinvatamapitah pinvatam dhiyah

82.4

यु॒वामिद्यु॒त्सु पृत॑नासु॒ वह्न॑यो यु॒वां क्षेम॑स्य प्रस॒वे मि॒तज्ञ॑वः ।
ई॒शा॒ना वस्व॑ उ॒भय॑स्य का॒रव॒ इन्द्रा॑वरुणा सु॒हवा॑ हवामहे ॥४॥

Yuvamidyutsu pritanasu vahnayo yuvam kshemasya prasave mitagyavah
Ishana vasva ubhayasya karava indravaruna suhava havamahe

82.5

इन्द्रा॑वरुणा॒ यदि॒मानि॑ च॒क्रथु॒र्विश्वा॑ जा॒तानि॒ भुव॑नस्य म॒ज्मना॑ ।
क्षेमे॑ण मि॒त्रो वरु॑णं दुव॒स्यति॑ म॒रुद्भि॑रु॒ग्रः शुभ॑म॒न्य ई॑यते ॥५॥

Indravaruna yadimani chakrathurvishva jatani bhuvanasya majmana
Kshemena mitro varunam duvasyati marudbhirugrah shubhamanya iyate

82.6

म॒हे शु॒ल्काय॒ वरु॑णस्य॒ नु त्वि॒ष ओजो॑ मिमाते ध्रु॒वम॑स्य॒ यत्स्वम् ।
अजा॑मिम॒न्यः श्न॒थय॑न्त॒माति॑रद्द॒भ्रेभि॑र॒न्यः प्र वृ॑णोति॒ भूय॑सः ॥६॥

Mahe shulkaya varunasya nu tvisha ojo mimate dhruvamasya yatsvam
Ajamimanyah shnathayantamatiraddabhrebhiranyah pra vrinoti bhuyasah

82.7

न तमंहो॒ न दु॑रि॒तानि॒ मर्त्य॒मिन्द्रा॑वरुणा॒ न तप॒ः कुत॑श्च॒न ।
यस्य॑ देवा॒ गच्छ॑थो वी॒थो अ॑ध्व॒रं न तं मर्त॑स्य नशते॒ परि॑ह्वृतिः ॥७॥

Na tamanho na duritani martyamindravaruna na tapah kutashchana
Yasya deva gachchhatho vitho adhvaram na tam martasya nashate parihvritih

82.8

अ॒र्वाङ्न॑रा॒ दैव्ये॒नाव॒सा ग॑तं शृणु॒तं हवं॒ यदि॑ मे॒ जुजो॑षथः ।
यु॒वोर्हि स॒ख्यमु॒त वा॒ यदाप्यं॑ मार्डी॒कमि॑न्द्रावरुणा॒ नि य॑च्छतम् ॥८॥

Arvannara daivyenavasa gatam shrinutam havam yadi me jujoshathah
Yuvorhi sakhyamuta va yadapyam mardikamindravaruna ni yachchhatam

82.9

अ॒स्माक॑मिन्द्रावरुणा॒ भरे॑भरे पुरोयो॒धा भ॑वतं कृष्ट्योजसा ।
यद्वां॒ हव॑न्त उ॒भये॒ अध॑ स्पृ॒धि नर॑स्तो॒कस्य॒ तन॑यस्य सा॒तिषु॑ ॥९॥

Asmakamindravaruna bharebhare puroyodha bhavatam krishtyojasa
Yadvam havanta ubhaye adha spridhi narastokasya tanayasya satishu

82.10

अ॒स्मे इन्द्रो॒ वरु॑णो मि॒त्रो अ॑र्य॒मा द्यु॒म्नं य॑च्छन्तु॒ महि॒ शर्म॑ स॒प्रथ॑ः ।
अ॒व॒ध्रं ज्योति॒रदि॑तेॠता॒वृधो॑ दे॒वस्य॒ श्लोकं॑ सवि॒तुर्म॑नामहे ॥१०॥

Asme indro varuno mitro aryama dyumnam yachchhantu mahi sharma saprathah
Avadhram jyotiraditeritavridho devasya shlokam saviturmanamahe