Sukta 81

81.1

6 maitravarunirvasishthah, ushasah, pragathah=(vishama brihati, sama satobrihati )

प्रत्यु॑ अदर्श्याय॒त्यु१च्छन्ती॑ दुहि॒ता दि॒वः ।
अपो॒ महि॑ व्ययति॒ चक्ष॑से॒ तमो॒ ज्योति॑ष्कृणोति सू॒नरी॑ ॥१॥

Pratyu adarshyayatyu1chchhanti duhita divah
Apo mahi vyayati chakshase tamo jyotishkrinoti sunari

उदु॒स्रिया॑ः सृजते॒ सूर्य॒ः सचाँ॑ उ॒द्यन्नक्ष॑त्रमर्चि॒वत् ।
तवेदु॑षो॒ व्युषि॒ सूर्य॑स्य च॒ सं भ॒क्तेन॑ गमेमहि ॥२॥

Udusriyah srijate suryah sacham udyannakshatramarchivat
Tavedusho vyushi suryasya cha sam bhaktena gamemahi

प्रति॑ त्वा दुहितर्दिव॒ उषो॑ जी॒रा अ॑भुत्स्महि ।
या वह॑सि पु॒रु स्पा॒र्हं व॑नन्वति॒ रत्नं॒ न दा॒शुषे॒ मय॑ः ॥३॥

Prati tva duhitardiva usho jira abhutsmahi
Ya vahasi puru sparham vananvati ratnam na dashushe mayah

उ॒च्छन्ती॒ या कृ॒णोषि॑ मं॒हना॑ महि प्र॒ख्यै दे॑वि॒ स्व॑र्दृ॒शे ।
तस्या॑स्ते रत्न॒भाज॑ ईमहे व॒यं स्याम॑ मा॒तुर्न सू॒नव॑ः ॥४॥

Uchchhanti ya krinoshi manhana mahi prakhyai devi svardrishe
Tasyaste ratnabhaja imahe vayam syama maturna sunavah

तच्चि॒त्रं राध॒ आ भ॒रोषो॒ यद्दी॑र्घ॒श्रुत्त॑मम् ।
यत्ते॑ दिवो दुहितर्मर्त॒भोज॑नं॒ तद्रा॑स्व भु॒नजा॑महै ॥५॥

Tachchitram radha a bharosho yaddirghashruttamam
Yatte divo duhitarmartabhojanam tadrasva bhunajamahai

श्रव॑ः सू॒रिभ्यो॑ अ॒मृतं॑ वसुत्व॒नं वाजाँ॑ अ॒स्मभ्यं॒ गोम॑तः ।
चो॒द॒यि॒त्री म॒घोन॑ः सू॒नृता॑वत्यु॒षा उ॑च्छ॒दप॒ स्रिध॑ः ॥६॥

Shravah suribhyo amritam vasutvanam vajam asmabhyam gomatah
Chodayitri maghonah sunritavatyusha uchchhadapa sridhah