Sukta 72

72.1

5 maitravarunirvasishthah, ashvinau, trishtup

आ गोम॑ता नासत्या॒ रथे॒नाऽश्वा॑वता पुरुश्च॒न्द्रेण॑ यातम् ।
अ॒भि वां॒ विश्वा॑ नि॒युत॑ः सचन्ते स्पा॒र्हया॑ श्रि॒या त॒न्वा॑ शुभा॒ना ॥१॥

A gomata nasatya rathenashvavata purushchandrena yatam
Abhi vam vishva niyutah sachante sparhaya shriya tanva shubhana

आ नो॑ दे॒वेभि॒रुप॑ यातम॒र्वाक्स॒जोष॑सा नासत्या॒ रथे॑न ।
यु॒वोर्हि न॑ः स॒ख्या पित्र्या॑णि समा॒नो बन्धु॑रु॒त तस्य॑ वित्तम् ॥२॥

A no devebhirupa yatamarvaksajoshasa nasatya rathena
Yuvorhi nah sakhya pitryani samano bandhuruta tasya vittam

उदु॒ स्तोमा॑सो अ॒श्विनो॑रबुध्रञ्जा॒मि ब्रह्मा॑ण्यु॒षस॑श्च दे॒वीः ।
आ॒विवा॑स॒न्रोद॑सी॒ धिष्ण्ये॒मे अच्छा॒ विप्रो॒ नास॑त्या विवक्ति ॥३॥

Udu stomaso ashvinorabudhranjami brahmanyushasashcha devih
Avivasanrodasi dhishnyeme achchha vipro nasatya vivakti

वि चेदु॒च्छन्त्य॑श्विना उ॒षास॒ः प्र वां॒ ब्रह्मा॑णि का॒रवो॑ भरन्ते ।
ऊ॒र्ध्वं भा॒नुं स॑वि॒ता दे॒वो अ॑श्रेद्बृ॒हद॒ग्नय॑ः स॒मिधा॑ जरन्ते ॥४॥

Vi cheduchchhantyashvina ushasah pra vam brahmani karavo bharante
Urdhvam bhanum savita devo ashredbrihadagnayah samidha jarante

आ प॒श्चाता॑न्नास॒त्या पु॒रस्ता॒दाश्वि॑ना यातमध॒रादुद॑क्तात् ।
आ वि॒श्वत॒ः पाञ्च॑जन्येन रा॒या यू॒यं पा॑त स्व॒स्तिभि॒ः सदा॑ नः ॥५॥

A pashchatannasatya purastadashvina yatamadharadudaktat
A vishvatah panchajanyena raya yuyam pata svastibhih sada nah