Sukta 6

6.1

7 maitravarunirvasishthah, vaishvanarognih, trishtup

प्र स॒म्राजो॒ असु॑रस्य॒ प्रश॑स्तिं पुं॒सः कृ॑ष्टी॒नाम॑नु॒माद्य॑स्य ।
इन्द्र॑स्येव॒ प्र त॒वस॑स्कृ॒तानि॒ वन्दे॑ दा॒रुं वन्द॑मानो विवक्मि ॥१॥

Pra samrajo asurasya prashastim punsah krishtinamanumadyasya
Indrasyeva pra tavasaskritani vande darum vandamano vivakmi

6.2

क॒विं के॒तुं धा॒सिं भा॒नुमद्रे॑र्हि॒न्वन्ति॒ शं रा॒ज्यं रोद॑स्योः ।
पु॒रं॒द॒रस्य॑ गी॒र्भिरा वि॑वासे॒ऽग्नेर्व्र॒तानि॑ पू॒र्व्या म॒हानि॑ ॥२॥

Kavim ketum dhasim bhanumadrerhinvanti sham rajyam rodasyoh
Purandarasya girbhira vivasegnervratani purvya mahani

6.3

न्य॑क्र॒तून्ग्र॒थिनो॑ मृ॒ध्रवा॑चः प॒णीँर॑श्र॒द्धाँ अ॑वृ॒धाँ अ॑य॒ज्ञान् ।
प्रप्र॒ तान्दस्यूँ॑र॒ग्निर्वि॑वाय॒ पूर्व॑श्चका॒राप॑राँ॒ अय॑ज्यून् ॥३॥

Nyakratungrathino mridhravachah paninrashraddham avridham ayagyan
Prapra tandasyunragnirvivaya purvashchakaraparam ayajyun

6.4

यो अ॑पा॒चीने॒ तम॑सि॒ मद॑न्ती॒ः प्राची॑श्च॒कार॒ नृत॑म॒ः शची॑भिः ।
तमीशा॑नं॒ वस्वो॑ अ॒ग्निं गृ॑णी॒षेऽना॑नतं द॒मय॑न्तं पृत॒न्यून् ॥४॥

Yo apachine tamasi madantih prachishchakara nritamah shachibhih
Tamishanam vasvo agnim grinishenanatam damayantam pritanyun

6.5

यो दे॒ह्यो॒३ अन॑मयद्वध॒स्नैर्यो अ॒र्यप॑त्नीरु॒षस॑श्च॒कार॑ ।
स नि॒रुध्या॒ नहु॑षो य॒ह्वो अ॒ग्निर्विश॑श्चक्रे बलि॒हृत॒ः सहो॑भिः ॥५॥

Yo dehyo3 anamayadvadhasnairyo aryapatnirushasashchakara
Sa nirudhya nahusho yahvo agnirvishashchakre balihritah sahobhih

6.6

यस्य॒ शर्म॒न्नुप॒ विश्वे॒ जना॑स॒ एवै॑स्त॒स्थुः सु॑म॒तिं भिक्ष॑माणाः ।
वै॒श्वा॒न॒रो वर॒मा रोद॑स्यो॒राग्निः स॑साद पि॒त्रोरु॒पस्थ॑म् ॥६॥

Yasya sharmannupa vishve janasa evaistasthuh sumatim bhikshamanah
Vaishvanaro varama rodasyoragnih sasada pitrorupastham

6.7

आ दे॒वो द॑दे बु॒ध्न्या॒३ वसू॑नि वैश्वान॒र उदि॑ता॒ सूर्य॑स्य ।
आ स॑मु॒द्रादव॑रा॒दा पर॑स्मा॒दाग्निर्द॑दे दि॒व आ पृ॑थि॒व्याः ॥७॥

A devo dade budhnya3 vasuni vaishvanara udita suryasya
A samudradavarada parasmadagnirdade diva a prithivyah