Sukta 47

47.1

4 maitravarunirvasishthah, apah, trishtup

आपो॒ यं व॑ः प्रथ॒मं दे॑व॒यन्त॑ इन्द्र॒पान॑मू॒र्मिमकृ॑ण्वते॒ळः ।
तं वो॑ व॒यं शुचि॑मरि॒प्रम॒द्य घृ॑त॒प्रुषं॒ मधु॑मन्तं वनेम ॥१॥

Apo yam vah prathamam devayanta indrapanamurmimakrinvatelah
Tam vo vayam shuchimaripramadya ghritaprusham madhumantam vanema

तमू॒र्मिमा॑पो॒ मधु॑मत्तमं वो॒ऽपां नपा॑दवत्वाशु॒हेमा॑ ।
यस्मि॒न्निन्द्रो॒ वसु॑भिर्मा॒दया॑ते॒ तम॑श्याम देव॒यन्तो॑ वो अ॒द्य ॥२॥

Tamurmimapo madhumattamam vopam napadavatvashuhema
Yasminnindro vasubhirmadayate tamashyama devayanto vo adya

श॒तप॑वित्राः स्व॒धया॒ मद॑न्तीर्दे॒वीर्दे॒वाना॒मपि॑ यन्ति॒ पाथ॑ः ।
ता इन्द्र॑स्य॒ न मि॑नन्ति व्र॒तानि॒ सिन्धु॑भ्यो ह॒व्यं घृ॒तव॑ज्जुहोत ॥३॥

Shatapavitrah svadhaya madantirdevirdevanamapi yanti pathah
Ta indrasya na minanti vratani sindhubhyo havyam ghritavajjuhota

याः सूर्यो॑ र॒श्मिभि॑रात॒तान॒ याभ्य॒ इन्द्रो॒ अर॑दद्गा॒तुमू॒र्मिम् ।
ते सि॑न्धवो॒ वरि॑वो धातना नो यू॒यं पा॑त स्व॒स्तिभि॒ः सदा॑ नः ॥४॥

Yah suryo rashmibhiratatana yabhya indro aradadgatumurmim
Te sindhavo varivo dhatana no yuyam pata svastibhih sada nah