Sukta 46

46.1

4 maitravarunirvasishthah, rudrah, jagati, 4 trishtup

इ॒मा रु॒द्राय॑ स्थि॒रध॑न्वने॒ गिर॑ः क्षि॒प्रेष॑वे दे॒वाय॑ स्व॒धाव्ने॑ ।
अषा॑ळ्हाय॒ सह॑मानाय वे॒धसे॑ ति॒ग्मायु॑धाय भरता शृ॒णोतु॑ नः ॥१॥

Ima rudraya sthiradhanvane girah kshipreshave devaya svadhavne
Ashalhaya sahamanaya vedhase tigmayudhaya bharata shrinotu nah

स हि क्षये॑ण॒ क्षम्य॑स्य॒ जन्म॑न॒ः साम्रा॑ज्येन दि॒व्यस्य॒ चेत॑ति ।
अव॒न्नव॑न्ती॒रुप॑ नो॒ दुर॑श्चरानमी॒वो रु॑द्र॒ जासु॑ नो भव ॥२॥

Sa hi kshayena kshamyasya janmanah samrajyena divyasya chetati
Avannavantirupa no durashcharanamivo rudra jasu no bhava

या ते॑ दि॒द्युदव॑सृष्टा दि॒वस्परि॑ क्ष्म॒या चर॑ति॒ परि॒ सा वृ॑णक्तु नः ।
स॒हस्रं॑ ते स्वपिवात भेष॒जा मा न॑स्तो॒केषु॒ तन॑येषु रीरिषः ॥३॥

Ya te didyudavasrishta divaspari kshmaya charati pari sa vrinaktu nah
Sahasram te svapivata bheshaja ma nastokeshu tanayeshu ririshah

मा नो॑ वधी रुद्र॒ मा परा॑ दा॒ मा ते॑ भूम॒ प्रसि॑तौ हीळि॒तस्य॑ ।
आ नो॑ भज ब॒र्हिषि॑ जीवशं॒से यू॒यं पा॑त स्व॒स्तिभि॒ः सदा॑ नः ॥४॥

Ma no vadhi rudra ma para da ma te bhuma prasitau hilitasya
A no bhaja barhishi jivashanse yuyam pata svastibhih sada nah