Sukta 44

44.1

5 maitravarunirvasishthah, dadhikah, 1 dadhikashvyusho gnibhagendravishnupushabrahmanaspatyadityadyavaprithivyapah, trishtup, 1 jagati

द॒धि॒क्रां व॑ः प्रथ॒मम॒श्विनो॒षस॑म॒ग्निं समि॑द्धं॒ भग॑मू॒तये॑ हुवे ।
इन्द्रं॒ विष्णुं॑ पू॒षणं॒ ब्रह्म॑ण॒स्पति॑मादि॒त्यान्द्यावा॑पृथि॒वी अ॒पः स्व॑ः ॥१॥

Dadhikram vah prathamamashvinoshasamagnim samiddham bhagamutaye huve
Indram vishnum pushanam brahmanaspatimadityandyavaprithivi apah svah

44.2

द॒धि॒क्रामु॒ नम॑सा बो॒धय॑न्त उ॒दीरा॑णा य॒ज्ञमु॑पप्र॒यन्त॑ः ।
इळां॑ दे॒वीं ब॒र्हिषि॑ सा॒दय॑न्तो॒ऽश्विना॒ विप्रा॑ सु॒हवा॑ हुवेम ॥२॥

Dadhikramu namasa bodhayanta udirana yagyamupaprayantah
Ilam devim barhishi sadayantoshvina vipra suhava huvema

44.3

द॒धि॒क्रावा॑णं बुबुधा॒नो अ॒ग्निमुप॑ ब्रुव उ॒षसं॒ सूर्यं॒ गाम् ।
ब्र॒ध्नं मं॑श्च॒तोर्वरु॑णस्य ब॒भ्रुं ते विश्वा॒स्मद्दु॑रि॒ता या॑वयन्तु ॥३॥

Dadhikravanam bubudhano agnimupa bruva ushasam suryam gam
Bradhnam manshchatorvarunasya babhrum te vishvasmaddurita yavayantu

44.4

द॒धि॒क्रावा॑ प्रथ॒मो वा॒ज्यर्वाऽग्रे॒ रथा॑नां भवति प्रजा॒नन् ।
सं॒वि॒दा॒न उ॒षसा॒ सूर्ये॑णाऽऽदि॒त्येभि॒र्वसु॑भि॒रङ्गि॑रोभिः ॥४॥

Dadhikrava prathamo vajyarvagre rathanam bhavati prajanan
Sanvidana ushasa suryenadityebhirvasubhirangirobhih

44.5

आ नो॑ दधि॒क्राः प॒थ्या॑मनक्त्वृ॒तस्य॒ पन्था॒मन्वे॑त॒वा उ॑ ।
शृ॒णोतु॑ नो॒ दैव्यं॒ शर्धो॑ अ॒ग्निः शृ॒ण्वन्तु॒ विश्वे॑ महि॒षा अमू॑राः ॥५॥

A no dadhikrah pathyamanaktvritasya panthamanvetava u
Shrinotu no daivyam shardho agnih shrinvantu vishve mahisha amurah