Sukta 75

75.1

19 payurbharadvajah, { sangramashishah } 1 varma, 2 dhanuh, 3 jya, 4 artni, ishudhih, 6 [ purvardhah] sarathi :, 6 {uttarardhah} rashmayah, 7 ashvah, 8 rathah, 9 rathagopah, 10 brahmana–pitri-soma-dyava-prithivi-pushanah ; 11-12, 15-16 ishavah, 13 pratodah, 14 hastaghnah, 17 yuddhabhumi-kavacha–brahmanaspatyadayah, 18 varma–soma–varunah, 19 devabrahmani, trishtup ; 6, 10 jagati; 12, 13, 15, 16, 19 anushtup, 17 panktih

जी॒मूत॑स्येव भवति॒ प्रती॑कं॒ यद्व॒र्मी याति॑ स॒मदा॑मु॒पस्थे॑ ।
अना॑विद्धया त॒न्वा॑ जय॒ त्वं स त्वा॒ वर्म॑णो महि॒मा पि॑पर्तु ॥१॥

Jimutasyeva bhavati pratikam yadvarmi yati samadamupasthe
Anaviddhaya tanva jaya tvam sa tva varmano mahima pipartu

75.2

धन्व॑ना॒ गा धन्व॑ना॒जिं ज॑येम॒ धन्व॑ना ती॒व्राः स॒मदो॑ जयेम ।
धनु॒ः शत्रो॑रपका॒मं कृ॑णोति॒ धन्व॑ना॒ सर्वा॑ः प्र॒दिशो॑ जयेम ॥२॥

Dhanvana ga dhanvanajim jayema dhanvana tivrah samado jayema
Dhanuh shatrorapakamam krinoti dhanvana sarvah pradisho jayema

75.3

व॒क्ष्यन्ती॒वेदा ग॑नीगन्ति॒ कर्णं॑ प्रि॒यं सखा॑यं परिषस्वजा॒ना ।
योषे॑व शिङ्क्ते॒ वित॒ताधि॒ धन्व॒ञ्ज्या इ॒यं सम॑ने पा॒रय॑न्ती ॥३॥

Vakshyantiveda ganiganti karnam priyam sakhayam parishasvajana
Yosheva shinkte vitatadhi dhanvanjya iyam samane parayanti

75.4

ते आ॒चर॑न्ती॒ सम॑नेव॒ योषा॑ मा॒तेव॑ पु॒त्रं बि॑भृतामु॒पस्थे॑ ।
अप॒ शत्रू॑न्विध्यतां संविदा॒ने आर्त्नी॑ इ॒मे वि॑ष्फु॒रन्ती॑ अ॒मित्रा॑न् ॥४॥

Te acharanti samaneva yosha mateva putram bibhritamupasthe
Apa shatrunvidhyatam sanvidane artni ime vishphuranti amitran

75.5

ब॒ह्वी॒नां पि॒ता ब॒हुर॑स्य पु॒त्रश्चि॒श्चा कृ॑णोति॒ सम॑नाव॒गत्य॑ ।
इ॒षु॒धिः सङ्का॒ः पृत॑नाश्च॒ सर्वा॑ः पृ॒ष्ठे निन॑द्धो जयति॒ प्रसू॑तः ॥५॥

Bahvinam pita bahurasya putrashchishcha krinoti samanavagatya
Ishudhih sankah pritanashcha sarvah prishthe ninaddho jayati prasutah

75.6

रथे॒ तिष्ठ॑न्नयति वा॒जिन॑ः पु॒रो यत्र॑यत्र का॒मय॑ते सुषार॒थिः ।
अ॒भीशू॑नां महि॒मानं॑ पनायत॒ मन॑ः प॒श्चादनु॑ यच्छन्ति र॒श्मय॑ः ॥६॥

Rathe tishthannayati vajinah puro yatrayatra kamayate susharathih
Abhishunam mahimanam panayata manah pashchadanu yachchhanti rashmayah

75.7

ती॒व्रान्घोषा॑न्कृण्वते॒ वृष॑पाण॒योऽश्वा॒ रथे॑भिः स॒ह वा॒जय॑न्तः ।
अ॒व॒क्राम॑न्त॒ः प्रप॑दैर॒मित्रा॑न्क्षि॒णन्ति॒ शत्रूँ॒रन॑पव्ययन्तः ॥७॥

Tivranghoshankrinvate vrishapanayoshva rathebhih saha vajayantah
Avakramantah prapadairamitrankshinanti shatrunranapavyayantah

75.8

र॒थ॒वाह॑नं ह॒विर॑स्य॒ नाम॒ यत्रायु॑धं॒ निहि॑तमस्य॒ वर्म॑ ।
तत्रा॒ रथ॒मुप॑ श॒ग्मं स॑देम वि॒श्वाहा॑ व॒यं सु॑मन॒स्यमा॑नाः ॥८॥

Rathavahanam havirasya nama yatrayudham nihitamasya varma
Tatra rathamupa shagmam sadema vishvaha vayam sumanasyamanah

75.9

स्वा॒दु॒षं॒सद॑ः पि॒तरो॑ वयो॒धाः कृ॑च्छ्रे॒श्रित॒ः शक्ती॑वन्तो गभी॒राः ।
चि॒त्रसे॑ना॒ इषु॑बला॒ अमृ॑ध्राः स॒तोवी॑रा उ॒रवो॑ व्रातसा॒हाः ॥९॥

Svadushansadah pitaro vayodhah krichchhreshritah shaktivanto gabhirah
Chitrasena ishubala amridhrah satovira uravo vratasahah

75.10

ब्राह्म॑णास॒ः पित॑र॒ः सोम्या॑सः शि॒वे नो॒ द्यावा॑पृथि॒वी अ॑ने॒हसा॑ ।
पू॒षा न॑ः पातु दुरि॒तादृ॑तावृधो॒ रक्षा॒ माकि॑र्नो अ॒घशं॑स ईशत ॥१०॥

Brahmanasah pitarah somyasah shive no dyavaprithivi anehasa
Pusha nah patu duritadritavridho raksha makirno aghashansa ishata

75.11

सु॒प॒र्णं व॑स्ते मृ॒गो अ॑स्या॒ दन्तो॒ गोभि॒ः संन॑द्धा पतति॒ प्रसू॑ता ।
यत्रा॒ नर॒ः सं च॒ वि च॒ द्रव॑न्ति॒ तत्रा॒स्मभ्य॒मिष॑व॒ः शर्म॑ यंसन् ॥११॥

Suparnam vaste mrigo asya danto gobhih sannaddha patati prasuta
Yatra narah sam cha vi cha dravanti tatrasmabhyamishavah sharma yansan

75.12

ऋजी॑ते॒ परि॑ वृङ्धि॒ नोऽश्मा॑ भवतु नस्त॒नूः । सोमो॒ अधि॑ ब्रवीतु॒ नोऽदि॑ति॒ः शर्म॑ यच्छतु ॥१२॥

Rijite pari vrindhi noshma bhavatu nastanuh, somo adhi bravitu noditih sharma yachchhatu

75.13

आ ज॑ङ्घन्ति॒ सान्वे॑षां ज॒घनाँ॒ उप॑ जिघ्नते । अश्वा॑जनि॒ प्रचे॑त॒सोऽश्वा॑न्त्स॒मत्सु॑ चोदय ॥१३॥

A janghanti sanvesham jaghanam upa jighnate, ashvajani prachetasoshvantsamatsu chodaya

75.14

अहि॑रिव भो॒गैः पर्ये॑ति बा॒हुं ज्याया॑ हे॒तिं प॑रि॒बाध॑मानः ।
ह॒स्त॒घ्नो विश्वा॑ व॒युना॑नि वि॒द्वान्पुमा॒न्पुमां॑सं॒ परि॑ पातु वि॒श्वत॑ः ॥१४॥

Ahiriva bhogaih paryeti bahum jyaya hetim paribadhamanah
Hastaghno vishva vayunani vidvanpumanpumansam pari patu vishvatah

75.15

आला॑क्ता॒ या रुरु॑शी॒र्ष्ण्यथो॒ यस्या॒ अयो॒ मुख॑म् । इ॒दं प॒र्जन्य॑रेतस॒ इष्वै॑ दे॒व्यै बृ॒हन्नम॑ः ॥१५॥

Alakta ya rurushirshnyatho yasya ayo mukham, idam parjanyaretasa ishvai devyai brihannamah

75.16

अव॑सृष्टा॒ परा॑ पत॒ शर॑व्ये॒ ब्रह्म॑संशिते । गच्छा॒मित्रा॒न्प्र प॑द्यस्व॒ मामीषां॒ कं च॒नोच्छि॑षः ॥१६॥

Avasrishta para pata sharavye brahmasanshite, gachchhamitranpra padyasva mamisham kam chanochchhishah

75.17

यत्र॑ बा॒णाः स॒म्पत॑न्ति कुमा॒रा वि॑शि॒खा इ॑व ।
तत्रा॑ नो॒ ब्रह्म॑ण॒स्पति॒रदि॑ति॒ः शर्म॑ यच्छतु वि॒श्वाहा॒ शर्म॑ यच्छतु ॥१७॥

Yatra banah sampatanti kumara vishikha iva
Tatra no brahmanaspatiraditih sharma yachchhatu vishvaha sharma yachchhatu

75.18

मर्मा॑णि ते॒ वर्म॑णा छादयामि॒ सोम॑स्त्वा॒ राजा॒मृते॒नानु॑ वस्ताम् ।
उ॒रोर्वरी॑यो॒ वरु॑णस्ते कृणोतु॒ जय॑न्तं॒ त्वानु॑ दे॒वा म॑दन्तु ॥१८॥

Marmani te varmana chhadayami somastva rajamritenanu vastam
Urorvariyo varunaste krinotu jayantam tvanu deva madantu

75.19

यो न॒ः स्वो अर॑णो॒ यश्च॒ निष्ट्यो॒ जिघां॑सति । दे॒वास्तं सर्वे॑ धूर्वन्तु॒ ब्रह्म॒ वर्म॒ ममान्त॑रम् ॥१९॥

Yo nah svo arano yashcha nishtyo jighansati, devastam sarve dhurvantu brahma varma mamantaram