Sukta 65

65.1

6 ratahavya atreyah, mitravarunau, anushtup, 6 panktih

यश्चि॒केत॒ स सु॒क्रतु॑र्देव॒त्रा स ब्र॑वीतु नः । वरु॑णो॒ यस्य॑ दर्श॒तो मि॒त्रो वा॒ वन॑ते॒ गिर॑ः ॥१॥

Yashchiketa sa sukraturdevatra sa bravitu nah, varuno yasya darshato mitro va vanate girah

ता हि श्रेष्ठ॑वर्चसा॒ राजा॑ना दीर्घ॒श्रुत्त॑मा । ता सत्प॑ती ऋता॒वृध॑ ऋ॒तावा॑ना॒ जने॑जने ॥२॥

Ta hi shreshthavarchasa rajana dirghashruttama, ta satpati ritavridha ritavana janejane

ता वा॑मिया॒नोऽव॑से॒ पूर्वा॒ उप॑ ब्रुवे॒ सचा॑ । स्वश्वा॑स॒ः सु चे॒तुना॒ वाजाँ॑ अ॒भि प्र दा॒वने॑ ॥३॥

Ta vamiyanovase purva upa bruve sacha, svashvasah su chetuna vajam abhi pra davane

मि॒त्रो अं॒होश्चि॒दादु॒रु क्षया॑य गा॒तुं व॑नते । मि॒त्रस्य॒ हि प्र॒तूर्व॑तः सुम॒तिरस्ति॑ विध॒तः ॥४॥

Mitro anhoshchidaduru kshayaya gatum vanate, mitrasya hi praturvatah sumatirasti vidhatah

व॒यं मि॒त्रस्याव॑सि॒ स्याम॑ स॒प्रथ॑स्तमे । अ॒ने॒हस॒स्त्वोत॑यः स॒त्रा वरु॑णशेषसः ॥५॥

Vayam mitrasyavasi syama saprathastame, anehasastvotayah satra varunasheshasah

यु॒वं मि॑त्रे॒मं जनं॒ यत॑थ॒ः सं च॑ नयथः ।
मा म॒घोन॒ः परि॑ ख्यतं॒ मो अ॒स्माक॒मृषी॑णां गोपी॒थे न॑ उरुष्यतम् ॥६॥

Yuvam mitremam janam yatathah sam cha nayathah
Ma maghonah pari khyatam mo asmakamrishinam gopithe na urushyatam