Sukta 60

60.1

8 shyavashva atreyah, marutognamarutau va, trishtup, 7- 8 jagati

ईळे॑ अ॒ग्निं स्वव॑सं॒ नमो॑भिरि॒ह प्र॑स॒त्तो वि च॑यत् कृ॒तं न॑ः ।
रथै॑रिव॒ प्र भ॑रे वाज॒यद्भि॑ः प्रदक्षि॒णिन्म॒रुतां॒ स्तोम॑मृध्याम् ॥१॥

Ile agnim svavasam namobhiriha prasatto vi chayat kritam nah
Rathairiva pra bhare vajayadbhih pradakshininmarutam stomamridhyam

60.2

आ ये त॒स्थुः पृष॑तीषु श्रु॒तासु॑ सु॒खेषु॑ रु॒द्रा म॒रुतो॒ रथे॑षु ।
वना॑ चिदुग्रा जिहते॒ नि वो॑ भि॒या पृ॑थि॒वी चि॑द् रेजते॒ पर्व॑तश्चित् ॥२॥

A ye tasthuh prishatishu shrutasu sukheshu rudra maruto ratheshu
Vana chidugra jihate ni vo bhiya prithivi chid rejate parvatashchit

60.3

पर्व॑तश्चि॒न्महि॑ वृ॒द्धो बि॑भाय दि॒वश्चि॒त् सानु॑ रेजत स्व॒ने व॑ः ।
यत् क्रीळ॑थ मरुत ऋष्टि॒मन्त॒ आप॑ इव स॒ध्र्य॑ञ्चो धवध्वे ॥३॥

Parvatashchinmahi vriddho bibhaya divashchit sanu rejata svane vah
Yat krilatha maruta rishtimanta apa iva sadhryancho dhavadhve

60.4

व॒रा इ॒वेद् रै॑व॒तासो॒ हिर॑ण्यैर॒भि स्व॒धाभि॑स्त॒न्व॑ः पिपिश्रे ।
श्रि॒ये श्रेयां॑सस्त॒वसो॒ रथे॑षु स॒त्रा महां॑सि चक्रिरे त॒नूषु॑ ॥४॥

Vara ived raivataso hiranyairabhi svadhabhistanvah pipishre
Shriye shreyansastavaso ratheshu satra mahansi chakrire tanushu

60.5

अ॒ज्ये॒ष्ठासो॒ अक॑निष्ठास ए॒ते सं भ्रात॑रो वावृधु॒ः सौभ॑गाय ।
युवा॑ पि॒ता स्वपा॑ रु॒द्र ए॑षां सु॒दुघा॒ पृश्नि॑ः सु॒दिना॑ म॒रुद्भ्य॑ः ॥५॥

Ajyeshthaso akanishthasa ete sam bhrataro vavridhuh saubhagaya
Yuva pita svapa rudra esham sudugha prishnih sudina marudbhyah

60.6

यदु॑त्त॒मे म॑रुतो मध्य॒मे वा॒ यद् वा॑व॒मे सु॑भगासो दि॒वि ष्ठ ।
अतो॑ नो रुद्रा उ॒त वा॒ न्व१स्याऽग्ने॑ वि॒त्ताद्ध॒विषो॒ यद् यजा॑म ॥६॥

Yaduttame maruto madhyame va yad vavame subhagaso divi shtha
Ato no rudra uta va nva1syagne vittaddhavisho yad yajama

60.7

अ॒ग्निश्च॒ यन्म॑रुतो विश्ववेदसो दि॒वो वह॑ध्व॒ उत्त॑रा॒दधि॒ ष्णुभि॑ः ।
ते म॑न्दसा॒ना धुन॑यो रिशादसो वा॒मं ध॑त्त॒ यज॑मानाय सुन्व॒ते ॥७॥

Agnishcha yanmaruto vishvavedaso divo vahadhva uttaradadhi shnubhih
Te mandasana dhunayo rishadaso vamam dhatta yajamanaya sunvate

60.8

अग्ने॑ म॒रुद्भि॑ः शु॒भय॑द्भि॒र्ऋक्व॑भि॒ः सोमं॑ पिब मन्दसा॒नो ग॑ण॒श्रिभि॑ः ।
पा॒व॒केभि॑र्विश्वमि॒न्वेभि॑रा॒युभि॒र्वैश्वा॑नर प्र॒दिवा॑ के॒तुना॑ स॒जूः ॥८॥

Agne marudbhih shubhayadbhirrikvabhih somam piba mandasano ganashribhih
Pavakebhirvishvaminvebhirayubhirvaishvanara pradiva ketuna sajuh