Sukta 59

59.1

8 shyavashva atreyah, marutah, jagati, 8 trishtup

प्र व॒ः स्पळ॑क्रन् त्सुवि॒ताय॑ दा॒वनेऽर्चा॑ दि॒वे प्र पृ॑थि॒व्या ऋ॒तं भ॑रे ।
उ॒क्षन्ते॒ अश्वा॒न् तरु॑षन्त॒ आ रजोऽनु॒ स्वं भा॒नुं श्र॑थयन्ते अर्ण॒वैः ॥१॥

Pra vah spalakran tsuvitaya davanercha dive pra prithivya ritam bhare
Ukshante ashvan tarushanta a rajonu svam bhanum shrathayante arnavaih

59.2

अमा॑देषां भि॒यसा॒ भूमि॑रेजति॒ नौर्न पू॒र्णा क्ष॑रति॒ व्यथि॑र्य॒ती ।
दू॒रे॒दृशो॒ ये चि॒तय॑न्त॒ एम॑भिर॒न्तर्म॒हे वि॒दथे॑ येतिरे॒ नर॑ः ॥२॥

Amadesham bhiyasa bhumirejati naurna purna ksharati vyathiryati
Duredrisho ye chitayanta emabhirantarmahe vidathe yetire narah

59.3

गवा॑मिव श्रि॒यसे॒ शृङ्ग॑मुत्त॒मं सूर्यो॒ न चक्षू॒ रज॑सो वि॒सर्ज॑ने ।
अत्या॑ इव सु॒भ्व१श्चार॑वः स्थन॒ मर्या॑ इव श्रि॒यसे॑ चेतथा नरः ॥३॥

Gavamiva shriyase shringamuttamam suryo na chakshu rajaso visarjane
Atya iva subhva1shcharavah sthana marya iva shriyase chetatha narah

59.4

को वो॑ म॒हान्ति॑ मह॒तामुद॑श्नव॒त् कस्काव्या॑ मरुत॒ः को ह॒ पौंस्या॑ ।
यू॒यं ह॒ भूमिं॑ कि॒रणं॒ न रे॑जथ॒ प्र यद् भर॑ध्वे सुवि॒ताय॑ दा॒वने॑ ॥४॥

Ko vo mahanti mahatamudashnavat kaskavya marutah ko ha paunsya
Yuyam ha bhumim kiranam na rejatha pra yad bharadhve suvitaya davane

59.5

अश्वा॑ इ॒वेद॑रु॒षास॒ः सब॑न्धव॒ः शूरा॑ इव प्र॒युध॒ः प्रोत यु॑युधुः ।
मर्या॑ इव सु॒वृधो॑ वावृधु॒र्नर॒ः सूर्य॑स्य॒ चक्षु॒ः प्र मि॑नन्ति वृ॒ष्टिभि॑ः ॥५॥

Ashva ivedarushasah sabandhavah shura iva prayudhah prota yuyudhuh
Marya iva suvridho vavridhurnarah suryasya chakshuh pra minanti vrishtibhih

59.6

ते अ॑ज्ये॒ष्ठा अक॑निष्ठास उ॒द्भिदोऽम॑ध्यमासो॒ मह॑सा॒ वि वा॑वृधुः ।
सु॒जा॒तासो॑ ज॒नुषा॒ पृश्नि॑मातरो दि॒वो मर्या॒ आ नो॒ अच्छा॑ जिगातन ॥६॥

Te ajyeshtha akanishthasa udbhidomadhyamaso mahasa vi vavridhuh
Sujataso janusha prishnimataro divo marya a no achchha jigatana

59.7

वयो॒ न ये श्रेणी॑ः प॒प्तुरोज॒सा ऽन्ता॑न् दि॒वो बृ॑ह॒तः सानु॑न॒स्परि॑ ।
अश्वा॑स एषामु॒भये॒ यथा॑ वि॒दुः प्र पर्व॑तस्य नभ॒नूँर॑चुच्यवुः ॥७॥

Vayo na ye shrenih papturojasa ntan divo brihatah sanunaspari
Ashvasa eshamubhaye yatha viduh pra parvatasya nabhanunrachuchyavuh

59.8

मिमा॑तु॒ द्यौरदि॑तिर्वी॒तये॑ न॒ः सं दानु॑चित्रा उ॒षसो॑ यतन्ताम् ।
आचु॑च्यवुर्दि॒व्यं कोश॑मे॒त ऋषे॑ रु॒द्रस्य॑ म॒रुतो॑ गृणा॒नाः ॥८॥

Mimatu dyauraditirvitaye nah sam danuchitra ushaso yatantam
Achuchyavurdivyam koshameta rishe rudrasya maruto grinanah