Sukta 45

45.1

7 vamadevo gautamah, ashvinau, jagati, 7 trishtup

ए॒ष स्य भा॒नुरुदि॑यर्ति यु॒ज्यते॒ रथ॒ः परि॑ज्मा दि॒वो अ॒स्य सान॑वि ।
पृ॒क्षासो॑ अस्मिन् मिथु॒ना अधि॒ त्रयो॒ दृति॑स्तु॒रीयो॒ मधु॑नो॒ वि र॑प्शते ॥१॥

Esha sya bhanurudiyarti yujyate rathah parijma divo asya sanavi
Prikshaso asmin mithuna adhi trayo dritisturiyo madhuno vi rapshate

45.2

उद् वां॑ पृ॒क्षासो॒ मधु॑मन्त ईरते॒ रथा॒ अश्वा॑स उ॒षसो॒ व्यु॑ष्टिषु ।
अ॒पो॒र्णु॒वन्त॒स्तम॒ आ परी॑वृतं॒ स्व१र्ण शु॒क्रं त॒न्वन्त॒ आ रज॑ः ॥२॥

Ud vam prikshaso madhumanta irate ratha ashvasa ushaso vyushtishu
Apornuvantastama a parivritam sva1rna shukram tanvanta a rajah

45.3

मध्व॑ः पिबतं मधु॒पेभि॑रा॒सभि॑रु॒त प्रि॒यं मधु॑ने युञ्जाथां॒ रथ॑म् ।
आ व॑र्त॒निं मधु॑ना जिन्वथस्प॒थो दृतिं॑ वहेथे॒ मधु॑मन्तमश्विना ॥३॥

Madhvah pibatam madhupebhirasabhiruta priyam madhune yunjatham ratham
A vartanim madhuna jinvathaspatho dritim vahethe madhumantamashvina

45.4

हं॒सासो॒ ये वां॒ मधु॑मन्तो अ॒स्रिधो॒ हिर॑ण्यपर्णा उ॒हुव॑ उष॒र्बुध॑ः ।
उ॒द॒प्रुतो॑ म॒न्दिनो॑ मन्दिनि॒स्पृशो॒ मध्वो॒ न मक्ष॒ः सव॑नानि गच्छथः ॥४॥

Hansaso ye vam madhumanto asridho hiranyaparna uhuva usharbudhah
Udapruto mandino mandinisprisho madhvo na makshah savanani gachchhathah

45.5

स्व॒ध्व॒रासो॒ मधु॑मन्तो अ॒ग्नय॑ उ॒स्रा ज॑रन्ते॒ प्रति॒ वस्तो॑र॒श्विना॑ ।
यन्नि॒क्तह॑स्तस्त॒रणि॑र्विचक्ष॒णः सोमं॑ सु॒षाव॒ मधु॑मन्त॒मद्रि॑भिः ॥५॥

Svadhvaraso madhumanto agnaya usra jarante prati vastorashvina
Yanniktahastastaranirvichakshanah somam sushava madhumantamadribhih

45.6

आ॒के॒नि॒पासो॒ अह॑भि॒र्दवि॑ध्वत॒ः स्व१र्ण शु॒क्रं त॒न्वन्त॒ आ रज॑ः ।
सूर॑श्चि॒दश्वा॑न् युयुजा॒न ई॑यते॒ विश्वाँ॒ अनु॑ स्व॒धया॑ चेतथस्प॒थः ॥६॥

Akenipaso ahabhirdavidhvatah sva1rna shukram tanvanta a rajah
Surashchidashvan yuyujana iyate vishvam anu svadhaya chetathaspathah

45.7

प्र वा॑मवोचमश्विना धियं॒धा रथ॒ः स्वश्वो॑ अ॒जरो॒ यो अस्ति॑ ।
येन॑ स॒द्यः परि॒ रजां॑सि या॒थो ह॒विष्म॑न्तं त॒रणिं॑ भो॒जमच्छ॑ ॥७॥

Pra vamavochamashvina dhiyandha rathah svashvo ajaro yo asti
Yena sadyah pari rajansi yatho havishmantam taranim bhojamachchha