Sukta 14

14.1

5 vamadevo gautamah, agnih(lingoktadevata iti eke), trishtup

प्रत्य॒ग्निरु॒षसो॑ जा॒तवे॑दा॒ अख्य॑द् दे॒वो रोच॑माना॒ महो॑भिः ।
आ ना॑सत्योरुगा॒या रथे॑ने॒मं य॒ज्ञमुप॑ नो यात॒मच्छ॑ ॥१॥

Pratyagnirushaso jataveda akhyad devo rochamana mahobhih
A nasatyorugaya rathenemam yagyamupa no yatamachchha

14.2

ऊ॒र्ध्वं के॒तुं स॑वि॒ता दे॒वो अ॑श्रे॒ज्ज्योति॒र्विश्व॑स्मै॒ भुव॑नाय कृ॒ण्वन् ।
आप्रा॒ द्यावा॑पृथि॒वी अ॒न्तरि॑क्षं॒ वि सूर्यो॑ र॒श्मिभि॒श्चेकि॑तानः ॥२॥

Urdhvam ketum savita devo ashrejjyotirvishvasmai bhuvanaya krinvan
Apra dyavaprithivi antariksham vi suryo rashmibhishchekitanah

14.3

आ॒वह॑न्त्यरु॒णीर्ज्योति॒षागा॑न्म॒ही चि॒त्रा र॒श्मिभि॒श्चेकि॑ताना ।
प्र॒बो॒धय॑न्ती सुवि॒ताय॑ दे॒व्यु१षा ई॑यते सु॒युजा॒ रथे॑न ॥३॥

Avahantyarunirjyotishaganmahi chitra rashmibhishchekitana
Prabodhayanti suvitaya devyu1sha iyate suyuja rathena

14.4

आ वां॒ वहि॑ष्ठा इ॒ह ते व॑हन्तु॒ रथा॒ अश्वा॑स उ॒षसो॒ व्यु॑ष्टौ ।
इ॒मे हि वां॑ मधु॒पेया॑य॒ सोमा॑ अ॒स्मिन् य॒ज्ञे वृ॑षणा मादयेथाम् ॥४॥

A vam vahishtha iha te vahantu ratha ashvasa ushaso vyushtau
Ime hi vam madhupeyaya soma asmin yagye vrishana madayetham

14.5

अना॑यतो॒ अनि॑बद्धः क॒थायं न्य॑ङ्ङुत्ता॒नोऽव॑ पद्यते॒ न ।
कया॑ याति स्व॒धया॒ को द॑दर्श दि॒वः स्क॒म्भः समृ॑तः पाति॒ नाक॑म् ॥५॥

Anayato anibaddhah kathayam nyannguttanova padyate na
Kaya yati svadhaya ko dadarsha divah skambhah samritah pati nakam