Sukta 13

13.1

5 vamadevo gautamah, agnih(lingoktadevata iti eke), trishtup

प्रत्य॒ग्निरु॒षसा॒मग्र॑मख्यद् विभाती॒नां सु॒मना॑ रत्न॒धेय॑म् ।
या॒तम॑श्विना सु॒कृतो॑ दुरो॒णमुत्सूर्यो॒ ज्योति॑षा दे॒व ए॑ति ॥१॥

Pratyagnirushasamagramakhyad vibhatinam sumana ratnadheyam
Yatamashvina sukrito duronamutsuryo jyotisha deva eti

ऊ॒र्ध्वं भा॒नुं स॑वि॒ता दे॒वो अ॑श्रेद् द्र॒प्सं दवि॑ध्वद् गवि॒षो न सत्वा॑ ।
अनु॑ व्र॒तं वरु॑णो यन्ति मि॒त्रो यत्सूर्यं॑ दि॒व्या॑रो॒हय॑न्ति ॥२॥

Urdhvam bhanum savita devo ashred drapsam davidhvad gavisho na satva
Anu vratam varuno yanti mitro yatsuryam divyarohayanti

यं सी॒मकृ॑ण्व॒न् तम॑से वि॒पृचे॑ ध्रु॒वक्षे॑मा॒ अन॑वस्यन्तो॒ अर्थ॑म् ।
तं सूर्यं॑ ह॒रित॑ः स॒प्त य॒ह्वीः स्पशं॒ विश्व॑स्य॒ जग॑तो वहन्ति ॥३॥

Yam simakrinvan tamase vipriche dhruvakshema anavasyanto artham
Tam suryam haritah sapta yahvih spasham vishvasya jagato vahanti

वहि॑ष्ठेभिर्वि॒हर॑न्यासि॒ तन्तु॑मव॒व्यय॒न्नसि॑तं देव॒ वस्म॑ ।
दवि॑ध्वतो र॒श्मय॒ः सूर्य॑स्य॒ चर्मे॒वावा॑धु॒स्तमो॑ अ॒प्स्व१न्तः ॥४॥

Vahishthebhirviharanyasi tantumavavyayannasitam deva vasma
Davidhvato rashmayah suryasya charmevavadhustamo apsva1ntah

अना॑यतो॒ अनि॑बद्धः क॒थायं न्य॑ङ्ङुत्ता॒नोऽव॑ पद्यते॒ न ।
कया॑ याति स्व॒धया॒ को द॑दर्श दि॒वः स्क॒म्भः समृ॑तः पाति॒ नाक॑म् ॥५॥

Anayato anibaddhah kathayam nyannguttanova padyate na
Kaya yati svadhaya ko dadarsha divah skambhah samritah pati nakam