Sukta 47

47.1

5 gathino vishvamitrah, indrah, trishtup

म॒रुत्वाँ॑ इन्द्र वृष॒भो रणा॑य॒ पिबा॒ सोम॑मनुष्व॒धं मदा॑य ।
आ सि॑ञ्चस्व ज॒ठरे॒ मध्व॑ ऊ॒र्मिं त्वं राजा॑सि प्र॒दिव॑ः सु॒ताना॑म् ॥१॥

Marutvam indra vrishabho ranaya piba somamanushvadham madaya
A sinchasva jathare madhva urmim tvam rajasi pradivah sutanam

स॒जोषा॑ इन्द्र॒ सग॑णो म॒रुद्भि॒ः सोमं॑ पिब वृत्र॒हा शू॑र वि॒द्वान् ।
ज॒हि शत्रूँ॒रप॒ मृधो॑ नुद॒स्वाथाभ॑यं कृणुहि वि॒श्वतो॑ नः ॥२॥

Sajosha indra sagano marudbhih somam piba vritraha shura vidvan
Jahi shatrunrapa mridho nudasvathabhayam krinuhi vishvato nah

उ॒त ऋ॒तुभि॑र्ऋतुपाः पाहि॒ सोम॒मिन्द्र॑ दे॒वेभि॒ः सखि॑भिः सु॒तं न॑ः ।
याँ आभ॑जो म॒रुतो॒ ये त्वान्वह॑न् वृ॒त्रमद॑धु॒स्तुभ्य॒मोज॑ः ॥३॥

Uta ritubhirritupah pahi somamindra devebhih sakhibhih sutam nah
Yam abhajo maruto ye tvanvahan vritramadadhustubhyamojah

ये त्वा॑हि॒हत्ये॑ मघव॒न्नव॑र्ध॒न् ये शा॑म्ब॒रे ह॑रिवो॒ ये गवि॑ष्टौ ।
ये त्वा॑ नू॒नम॑नु॒मद॑न्ति॒ विप्रा॒ः पिबे॑न्द्र॒ सोमं॒ सग॑णो म॒रुद्भि॑ः ॥४॥

Ye tvahihatye maghavannavardhan ye shambare harivo ye gavishtau
Ye tva nunamanumadanti viprah pibendra somam sagano marudbhih

म॒रुत्व॑न्तं वृष॒भं वा॑वृधा॒नमक॑वारिं दि॒व्यं शा॒समिन्द्र॑म् ।
वि॒श्वा॒साह॒मव॑से॒ नूत॑नायो॒ग्रं स॑हो॒दामि॒ह तं हु॑वेम ॥५॥

Marutvantam vrishabham vavridhanamakavarim divyam shasamindram
Vishvasahamavase nutanayogram sahodamiha tam huvema