Sukta 46

46.1

5 gathino vishvamitrah, indrah, trishtup

यु॒ध्मस्य॑ ते वृष॒भस्य॑ स्व॒राज॑ उ॒ग्रस्य॒ यून॒ः स्थवि॑रस्य॒ घृष्वे॑ः ।
अजू॑र्यतो व॒ज्रिणो॑ वी॒र्या॒३णीन्द्र॑ श्रु॒तस्य॑ मह॒तो म॒हानि॑ ॥१॥

Yudhmasya te vrishabhasya svaraja ugrasya yunah sthavirasya ghrishveh
Ajuryato vajrino virya3nindra shrutasya mahato mahani

46.2

म॒हाँ अ॑सि महिष॒ वृष्ण्ये॑भिर्धन॒स्पृदु॑ग्र॒ सह॑मानो अ॒न्यान् ।
एको॒ विश्व॑स्य॒ भुव॑नस्य॒ राजा॒ स यो॒धया॑ च क्ष॒यया॑ च॒ जना॑न् ॥२॥

Maham asi mahisha vrishnyebhirdhanaspridugra sahamano anyan
Eko vishvasya bhuvanasya raja sa yodhaya cha kshayaya cha janan

46.3

प्र मात्रा॑भी रिरिचे॒ रोच॑मान॒ः प्र दे॒वेभि॑र्वि॒श्वतो॒ अप्र॑तीतः ।
प्र म॒ज्मना॑ दि॒व इन्द्र॑ः पृथि॒व्याः प्रोरोर्म॒हो अ॒न्तरि॑क्षादृजी॒षी ॥३॥

Pra matrabhi ririche rochamanah pra devebhirvishvato apratitah
Pra majmana diva indrah prithivyah prorormaho antarikshadrijishi

46.4

उ॒रुं ग॑भी॒रं ज॒नुषा॒भ्यु१ग्रं वि॒श्वव्य॑चसमव॒तं म॑ती॒नाम् ।
इन्द्रं॒ सोमा॑सः प्र॒दिवि॑ सु॒तास॑ः समु॒द्रं न स्र॒वत॒ आ वि॑शन्ति ॥४॥

Urum gabhiram janushabhyu1gram vishvavyachasamavatam matinam
Indram somasah pradivi sutasah samudram na sravata a vishanti

46.5

यं सोम॑मिन्द्र पृथि॒वीद्यावा॒ गर्भं॒ न मा॒ता बि॑भृ॒तस्त्वा॒या ।
तं ते॑ हिन्वन्ति॒ तमु॑ ते मृजन्त्यध्व॒र्यवो॑ वृषभ॒ पात॒वा उ॑ ॥५॥

Yam somamindra prithividyava garbham na mata bibhritastvaya
Tam te hinvanti tamu te mrijantyadhvaryavo vrishabha patava u