Sukta 45

45.1

5 gathino vishvamitrah, indrah, brihati

आ म॒न्द्रैरि॑न्द्र॒ हरि॑भिर्या॒हि म॒यूर॑रोमभिः ।
मा त्वा॒ के चि॒न्नि य॑म॒न्विं न पा॒शिनोऽति॒ धन्वे॑व॒ ताँ इ॑हि ॥१॥

A mandrairindra haribhiryahi mayuraromabhih
Ma tva ke chinni yamanvim na pashinoti dhanveva tam ihi

45.2

वृ॒त्र॒खा॒दो व॑लंरु॒जः पु॒रां द॒र्मो अ॒पाम॒जः ।
स्थाता॒ रथ॑स्य॒ हर्यो॑रभिस्व॒र इन्द्रो॑ दृ॒ळहा चि॑दारु॒जः ॥२॥

Vritrakhado valanrujah puram darmo apamajah
Sthata rathasya haryorabhisvara indro drilaha chidarujah

45.3

ग॒म्भी॒राँ उ॑द॒धीँरि॑व॒ क्रतुं॑ पुष्यसि॒ गा इ॑व ।
प्र सु॑गो॒पा यव॑सं धे॒नवो॑ यथा ह्र॒दं कु॒ल्या इ॑वाशत ॥३॥

Gambhiram udadhinriva kratum pushyasi ga iva
Pra sugopa yavasam dhenavo yatha hradam kulya ivashata

45.4

आ न॒स्तुजं॑ र॒यिं भ॒रांशं॒ न प्र॑तिजान॒ते ।
वृ॒क्षं प॒क्वं फल॑म॒ङ्कीव॑ धूनु॒हीन्द्र॑ स॒म्पार॑णं॒ वसु॑ ॥४॥

A nastujam rayim bharansham na pratijanate
Vriksham pakvam phalamankiva dhunuhindra samparanam vasu

45.5

स्व॒युरि॑न्द्र स्व॒राळ॑सि॒ स्मद्दि॑ष्टि॒ः स्वय॑शस्तरः ।
स वा॑वृधा॒न ओज॑सा पुरुष्टुत॒ भवा॑ नः सु॒श्रव॑स्तमः ॥५॥

Svayurindra svaralasi smaddishtih svayashastarah
Sa vavridhana ojasa purushtuta bhava nah sushravastamah